Ky himn këndohet në Liturgjinë Hyjnore të Vasilit të Madh në vendin e himnit të njohur “Axion estin” që dëgjojmë zakonisht. Pastaj Shën Joani u bë murg në manastirin e Shën Savës së Shenjtëruar dhe mori me vete ikonën e mrekullueshme. Me kalimin e kohës, Lavra i dha Tricherusa-s si bekim për Shën Sava, kryeepiskop i Serbisë, i cili përkujtohet në janar. Kur turqit pushtuan Serbinë, besimtarët u frikësuan për fatin e saj dhe ia besuan atë mbrojtjes së vetë Virgjëreshës. Kështu e vendosën ikonën mbi një gomar, i cili, pa udhërrëfyes, nisi i vetëm udhëtimin e tij të gjatë për në Malin Athos. Më në fund ai mbërriti para manastirit të Hilandarit dhe aty qëndroi i palëvizshëm, për të demonstruar mrekullisht vullnetin hyjnor. Murgjit e pritën me nderim të thellë ikonën e shenjtë dhe e vendosën brenda katolikonit të manastirit të tyre të shenjtë. Në një kohë polemikash për zgjedhjen e një abati të ri, Hyjlindësja deshi ta merrte vetë igumeninë e manastirit. Që atëherë, ikona e saj e shenjtë zë vendin e igumenit dhe murgjit marrin bekimin e saj për çdo shërbesë.