Atmosfera festive e Krishtlindjes nisi të ndihej që më parë, me përgatitjet për ta pritur sa më mirë Krishtin-Foshnje, pas një periudhe të gjatë kreshmimi dhe lutjeje, si edhe me veprimtaritë e të rinjve dhe fëmijëve etj.
Kremtimi i parë ishte ai të Dielën e Para-Krishtlindjes, pasditen e së cilës besimtarët të mbledhur në kishën “Ungjillëzimi i Perëndilindëses Mari”, morën pjesë në Misterin e Efqelisë, atë të lyerjes me vaj të shenjtëruar. Një traditë kjo tashmë e konsoliduar në pritje të kësaj të kremteje të madhe.
Të hënën, 24 dhjetor, herët në mëngjes besimtarët morën pjesë në shërbesën e bukur të Orëve të Mëdha të Krishtlindjes, të mbushur me tropare dhe me lexime nga Dhiata e Vjetër dhe e Re, që flasin për Lindjen e Krishtit, duke u pasuar më pas me shërbesën e Mbrëmësores dhe atë të Liturgjisë Hyjnore të Vasilit të Madh.
E veçanta e kësaj dite ishte një grup i madh fëmijësh dhe të rinjsh, të cilët këndonin kolendrat tradicionale, duke shkuar nëpër shtëpitë e besimtarëve. Ata shkuan edhe në Kryepiskopatën e Hirshme dhe gëzuan e bashkëbiseduan me Kryepiskopin Anastas.
|
|
Të gjitha veprimtaritë dhe përgatitjet shpirtërore të besimtarëve orthodhoksë kulmuan, në datë 25 Dhjetor, me Shërbesat festive dhe Liturgjinë Hyjnore të Krishtlindjes, të cilat u kryen nga Fortlumturia e Tij Anastasi, i cili lexoi Mesazhin e festës, që këtë vit kishte si temë “Mërgimin”. |
|
Pas kremtimit, gëzimi dhe atmosfera festive vazhdoi tërë ditën, nga mijëra e mijëra besimtarë e banorë të kryeqytetit, që vazhdonin të vinin në kishë për gjatë gjithë ditës. Një atmosferë e tillë ishte krijuar edhe në mjediset e Kryepiskopatës së Shenjtë, ku priteshin vizitat e urimit të përfaqësuesve të komuniteteve të tjera fetare, personaliteteve të larta shtetërore, intelektualëve të shquar dhe shumë besimtarëve. “Një ditë jo vetëm e gëzimit, por edhe e dashurisë dhe e shpresës”, do ta cilësonte Kryepiskopi Anastas, të kremten e Krishtlindjes, kur Presidenti i Republikës, z. Bamir Topi do të vinte për të uruar Komunitetin Orthodhoks, duke vazhduar: “…Ne e dimë që në përpjekjet tuaja për të përmbushur misionin keni vështirësi, kështu ne me gjithë zemër ju urojmë urtësinë e Perëndisë, fuqi dhe gëzim që të përmbushen të gjitha angazhimet tuaja dhe të ndihmoni vendin tonë të dashur të jetë në ballë të historisë evropiane, por patjetër edhe asaj ballkanike”. |
|
|
|
Më pas, Presidenti Topi uroi dhe falënderoi Kryepiskopin Anastas për rolin e madh që ka luajtur për bashkëjetesën fetare në vend: “Ne vlerësojmë shumë rolin tuaj Hirësi dhe vlerësimi juaj është tek zemrat e të gjithëve, jo vetëm tek besimtarët, por besoj edhe tek politikanët, ku diku e predikojnë, diku jo. Por besoj se mesazhi më i rëndësishëm është për politikanët, që t’i kthehen dialogut, të shohin më shumë tek njerëzit e thjeshtë se sa të merren me veten e tyre”. |
|
Për urim erdhën e Kryetarja e Parlamentit znj. Jozefina Topalli, përfaqësues të opozitës, drejtues të komuniteteve të tjera fetare, përfaqësues të Trupit Diplomatik etj.
|
|
|
|
Por edhe Kryeministri z. Sali Berisha, pas vizitës që bëri në qytetin e Korçës, erdhi për urim në orët e mesditës në Kryepiskopatë. Ai uroi: “… besimtarët orthodhoksë, të krishterët dhe të gjithë besimtarët shqiptarë për këtë ditë të madhe të lindjes së Krishtit… Lindja e Krishtit është ngjarja më e madhe për njerëzimin dhe prandaj ai është i hyjnizuar e i respektuar në të gjitha besimet”. |
|
Kryepiskopi Anastas pasi shprehu gëzimin për vizitën e Kryeministrit cilësoi: “… feja ka përherë rëndësi … Krishtlindjet tregojnë se Perëndia erdhi jo thjesht të na vizitonte, por të banonte me ne. Ky është sekreti i madh, që Krishti është bashkë me ne dhe të gjitha përpjekjet e dashurisë vijnë nga Ai”. |
|
|
|
Po atë ditë të rinjtë orthodhoksë u mblodhën së bashku në një darkë në ambientet e Shtëpisë së Rinisë “Bethlehem”, duke uruar njeri-tjetrin dhe duke ndarë mesazhin dhe përvojën festive mes tyre. |
Julia Pjetri
