“Të rritemi me Krishtin” Në kampet ditore të fëmijëve, të organizuar nga Kisha Orthodhokse. (Gusht 2007)

    Edhe këtë vit, me bekimin e Fortlumturisë së tij Kryepiskopit Anastas, në shumë enori të Kishës sonë u zhvilluan kampet ditore njëjavore për fëmijë, me temë qendore: “Të rritemi me Krishtin”.

    Ato u organizuan nga fundi i gushtit deri në fillim të shtatorit, me pjesëmarrje të gjerë të fëmijëve, të drejtuar nga priftërinjtë, katekistët dhe shumë vullnetarë të rinj. Programi zhvillohej nga ora 08.00 deri në 12.00. 

    Çdo ditë e kampit niste me lutjen e mëngjesit dhe vazhdonte me bisedën shpirtërore, punën e dorës, këngët dhe mund të përfundonte me drekë të përbashkët.

    Fëmijët kaluan disa ditë me freski shpirtërore dhe trupore, duke u përgatitur për fillimin e vitit të ri arsimor. Nëntemat shpirtërore ishin: “Të rritemi në besim”,“Të rritemi në të vërtetën”,“Të rritemi në dashuri” dhe“Të rritemi në mendime, fjalë dhe vepra”.

    Në Tiranë nga 20-26 gusht u organizuan kampe ditore në dy qendra; paradite në mjediset e përkujdesjes ditore “Ungjillëzimi” dhe pasdite në mjediset e Kishës në rrugën “Qemal Stafa”. Morën pjesë dhjetëra fëmijë, të cilët ndoqën me interes programin e përgatitur nga koordinatorët e Zyrës Qendrore të Fëmijëve, e cila ishte edhe organizatorja e kësaj veprimtarie kombëtare.

    Në Kavajë kampi ditor u organizua nga 27 gusht–2 shtator, në mjediset e kishës “Shën Nikolla”. Sipas moshës, fëmijët u ndanë në 3 grupe: “Dashuria”, “Besimi” dhe “E Vërteta”. Ky kamp ishte një mundësi për ta, jo vetëm për të mësuar më shumë rreth besimit, por edhe për t’u argëtuar, sepse zhvilloheshin edhe lojëra të ndryshme.

    Në Shkodër mbi 50 fëmijë morën pjesë në veprimtaritë e zhvilluara në qytet dhe në fshatin Vrakë.

    Nga 24–31 gusht ky kamp u zhvillua edhe në qytetin e Gramshit, me më shumë se 100 pjesëmarrës. Kampi u zhvillua në mjediset e kishës “Metamorfoza e Shpëtimtarit”. Kontribuan në mbarëvajtjen e tij klerikët e zonës, katekistët e Zyrës Qendrore të Katekizmit, studentë të Akademisë Teologjike, si edhe të rinj vullnetarë nga zona e Gjinarit dhe qyteti i Gramshit.

    Kampi niste me shërbesën e Mëngjesit dhe vazhdonte me komentin e Ungjillit të ditës, mësim kënge, biseda shpirtërore, lojëra të ndryshme, punë dore etj. Gjithashtu, u organizuan ekskursione në pika të ndryshme të qytetit, por ai më mbresëlënësi ishte në Manastirin e hirshëm të shën Vlashit. Aty fëmijët u pritën nga Episkopi i Apollonisë, Hirësia e tij, Nikolla, i cili bëri me ta një bisedë të ngrohtë.

    Nga 13-22 gusht aktiviteti u organizua në zonën e Gjinarit. Në këtë kamp morën pjesë rreth 120 fëmijë, nga 7-14 vjeç. Tema e këtij kampi ishte: “Të rritemi në Krishtin”. Temat u zhvilluan nga katekistë dhe studentë të Akademisë Teologjike. Për organizimin e këtij kampi ndihmoi dhe kleriku i kishës atë Jani Ranxha, i cili kryente edhe shërbesat e ndryshme. Këta fëmijë që jetojnë në një zonë të thellë malore, treguan sa e duan Perëndinë dhe u shprehën mirënjohës ndaj Kishës dhe Kryebariut të saj, i cili u mundësoi këtë aktivitet.
 

    Duke parë që në zonat rurale ka mungesë të theksuar aktivitetesh, Zyra Qendrore e Fëmijëve e Kishës sonë organizoi një kamp veror edhe në zonën Mëlizë-Shelcan, ku morën pjesë fëmijë të këtyre fshatrave. Veç programit të larmishëm, u organizua gjithashtu një marshim në kishën e shën Nikollës, si edhe një ekskursion në Manastirin e shën Vlashit, në Durrës.

    Në kamp morën pjesë rreth 65 veta, nga të cilët ishin 45 fëmijë nga Shelcani dhe 20 nga Mëliza. Një veprimtari e tillë u realizua edhe në fshatin Kuqan të komunës Shirgjan, ku në të morën pjesë 58 fëmijë të moshës nga 7-14 vjeç.