Gëzim dhe shpresë në Zotin Krisht. (Nëntor 2007)

    “Rruga drejt lirisë”, ishte kjo tema dhe mesazhi i takimit së rinisë orthodhokse “Bij të Dritës”, që u zhvillua në Pogradec, nga 19 – 21 tetor. Veprimtaria, ku morën pjesë 85 përfaqësues nga e gjithë dioqeza, u organizua nga Zyra e Rinisë pranë Mitropolisë së Shenjtë të Korçës, e mbështetur nga Zyra Kombëtare Rinore, pranë Kryepiskopatës së Shenjtë.

    Tema ishte interesante dhe të rinjve iu shpjegua nën këndvështrimin e krishterë, se frika vjen si pasojë e natyrës sonë të rënë. Si rrjedhojë, kjo frikë mund të kapërcehet vetëm duke qenë të lirë më Zotin. Gjatë aktivitetit, përveç shërbesave kishtare dhe veprimtarive kulturore e sportive u krye edhe një ekskursion në Volorekun e bukur dhe piktoresk.

    E diela, që ishte edhe dita përmbyllëse e takimit, filloi me pjesëmarrjen në Liturgjinë Hyjnore, e cila u krye nga Mitropoliti i Korçës, Hirësia e Tij Joani. Menjëherë pas saj, Imzot Joani zhvilloi një takim me të rinjtë dhe mbajti një fjalë mbi temën qendrore të veprimtarisë, ku ndër të tjera theksoi se: “Historia e gjatë e njerëzimit e ka provuar, ndonëse jo teorikisht, se jo çdo plotësim i kënaqësive trupore do të thotë një gjendje lirie për trupin; ai jo vetëm që nuk është i lirë, por dalëngadalë fillon dhe skllavërohet edhe më shumë, si nga jashtë ashtu edhe nga brenda dhe kufizimet e ndryshme janë ndihmë për njeriun që të arrijë lirinë e tij të plotë…”

    Pataj, në katin e poshtëm të kishës u shtrua edhe një drekë, në të cilën mori pjesë edhe Hirësia e Tij Joani. Në fund të rinjtë u ndanë me njëri – tjetrin, duke falënderuar Zotin, sepse ky aktivitet iu dha atyre një dritë tjetër në jetën e tyre.

    Qyteti 2400-vjeçar i njëmijë e një dritareve, Berati, mirëpriti nga datat 2 – 4 nëntor, të rinjtë orthodhoksë të kësaj Mitropolie, në takimin me temë: “Të gëzuar me shpresën e Zotit”. Në këtë takim merrnin pjesë disa nga studentët e Akademisë Teologjike “Ngjallja e Krishtit”, Shën Vlash, Durrës, të cilët ishin dhe drejtuesit e grupeve.

    Referati i parë u mbajt nga Mitropoliti i Beratit, Hirësia e Tij Ignati, i cili tha ndër të tjera se: “Ekzistenca jonë ngjan me një anije që çan detin e jetës dhe ka si paracaktim qiellin. Por shpesh herë ky det tronditet nga dallgët e ngasjeve dhe sulmohet nga erërat e fuqishme të provave të ndryshme.

    Dhe në këtë rast skafi i ekzistencës sonë lëkundet dhe rrezikon të përplaset në shkëmbinjtë nënujorë të dëshpërimit dhe të pabesisë. Kështu që na duhet spiranca, domethënë shpresa, por me një ndryshim, se kjo nuk mbështetet në rërën e fundit të detit të paqëndrueshëm, por në shkëmbin e palëkundur të Perëndisë së tërëfuqishëm. Nuk lëshohet poshtë, por depërton në qiellin, që mbahet nga vetë Zoti i gjithëpushtetshëm… II lumur, me të vërtetë, është ai, i cili ka shpresë të tillë në Perëndinë. Sepse “shpresa nuk të gënjen” (Rom: 5, 5).

    Më pas, murgu Serafim foli mbi temën e vetëvrasjes dhe pasojave të saj. Programi vijoi në kalanë e lashtë të qytetit, të njohur për kishat e saj orthodhokse, ku kush nuk e kishte vizituar më parë u njoh me vlerat e saja historike.

    Takimi vazhdoi me referatin e z. Miron Çako, me temë: “Mos kini frikë, unë e munda botën”. Ai foli rreth frikës nga Perëndia, vetvetja, njerëzit, natyra dhe vdekja, duke theksuar se duke zbatuar porositë e Perëndisë një i krishterë nuk duhet të ketë frikë nga asgjë, sepse për të kujdeset Zoti. Në mbrëmje, studentët e Akademisë prezantuan veprimtarinë dhe jetën e shkollës me anën e pamjeve nga mësimi dhe veprimtaritë e ndryshme.

    Ditën e diel, Liturgjia Hyjnore u krye në kishën e Shën Spiridhonit dhe u drejtua nga Hirësia e Tij Ignati. Momenti kulmor i saj ishte kur pjesa më e madhe e të rinjve u kunguan me Trupin dhe Gjakun e Krishtit. Të rinjtë u larguan nga ky takim, duke marrë bekimet e Imzot Ignatit, i cili me dashurinë e tij atërore i ftoi të merrnin pjesë sërish në veprimtaritë e ardhshme të gëzuar me shpresën e Zotit.