Ditën e shtunë, dt. 18 mars, në mesditë, në Qendrën Diagnostike Orthodhokse “Ungjillëzimi” në kryeqytet, u përurua skaneri tomografik më modern në Shqipëri. Në vazhdim të kontributit të gjithanshëm që jep për shoqërinë shqiptare, Kisha Orthodhokse Autoqefale e Shqipërisë fut teknologjinë më të fundit në mjekësi. Ky skaner i ri, i pari në vend dhe i dyti në Ballkan, me vlerë një milion euro, do të kontribuojë për shëndetin e popullatës.
Në përurim morën pjesë ministri i Shëndetësisë z. Maksim Cikuli, ministri i Punës, Çështjeve Sociale dhe Shanseve të Barabarta z. Kosta Barka, ambasadori i Greqisë z. Pandelis Karkabasis, zv/ ambasadori i Rusisë, diplomatë, personalitete të shkencës dhe mjekësisë, si dhe përfaqësuesi për Ballkanin i kompanisë amerikane General Electric, prodhim i të cilit është skaneri. Në fillim u krye shërbesa e Ajazmës dhe Përurimit.
Më pas, në fjalën përshëndetëse, drejtori shkencor Prof. Dr. Thoma Kristo falënderoi Kryepiskopin Anastas për iniciativën morale dhe materiale në sjelljen e këtij skaneri dhe në çeljen e kësaj qendre, për të ndihmuar të sëmurët që vijnë nga të gjitha zonat e Shqipërisë në Qendrën Diagnostike të Kishës Orthodhokse. “Pajisjet e shumta që janë sjellë – shtoi ai, vazhdojnë ta pasurojnë edhe më shumë qendrën me aparatura, laboratorë e mjete të tjera duke patur mundësinë për përcaktimin e një diagnoze të saktë, të shpejtë dhe bashkëkohore”.
Pasja e këtij skaneri u realizua me iniciativën dhe përkujdesjen e Kryepiskopit Anastas dhe me bashkëpunimin e Kishës Orthodhokse Autoqefale të Shqipërisë, të dy organizatave joqeveritare greke (të Qendrës Ndërorthodhokse “Porefthendes”, Athinë dhe të Human Net, Rrjeti Europian i Zhvillimit Humanitar, Janinë) si dhe u financua 75% nga Shërbimi i Bashkëpunimit Ndërkombëtar për Zhvillim (YDhAS), i ministrisë së Jashtme të Greqisë. Përpjekja nisi para 5 vjetësh (në kohën e ish-Zëvendësministrit të Jashtëm z. A. Loverdhos) dhe përfundoi me kontributin e madh të Zëvendësministrit të Jashtëm z. E. Stilianidhi.
“Dua të theksoj se për të arritur deri këtu kishte nevojë për këmbëngulje dhe përpjekje të madhe. Ky do të jetë një mjet shumë i rëndësishëm për Qendrën Diagnostike Orthodhokse që t’i shërbejë mbarë popullit, për të mësuar se si është shëndeti i njerëzve. Përdorimi i kësaj aparature duhet që të bëhet nga të gjithë duke vazhduar zinxhirin e dashurisë që e solli deri këtu. Shoqëria jonë është në një fazë të rritjes dhe çdo hap pozitiv që kryhet nga çdo lloj grupimi shoqëror është një dhuratë për mbarë shoqërinë e Shqipërisë. Ne urojmë që gjithsecili, kudo që të ndodhet, të rrezatojë këtë dashuri dhe shpresë” – tha Kryepiskopi Anastas duke falënderuar edhe donatorët që ndihmuan në realizimin e këtij projekti.
Në fund të aktivitetit, të ftuarit panë nga afër skanerin si dhe morën pjesë në kokteil.
Të dhëna për skanerin:
Skaneri (ose Tomografia e kompjuterizuar), është i tipit spiral, multidetektor, me 32 prerje në një rrotullim dhe është një hap i ndjeshëm përpara edhe në raport me skanerat e mëparshëm multidetektor. Ai karakterizohet nga një shpejtësi tepër e lartë e ekzaminimit, sidomos krahasuar me aparatet që janë në përdorim në vendin tonë, gjë që e bën të përshtatshëm jo vetëm për ekzaminimet konvencionale, por edhe të atyre të enëve të gjakut.
Meqenëse ky aparat realizon ekzaminimin me një shpejtësi të lartë, mund të përfundojë me një frymëmbajtje të vetme ekzaminimin e toraxit apo të abdomenit. Gjithashtu, për këtë arsye mund të përdoret një dozë e vetme kontrasti për të ekzaminuar dy pjesë të trupit njëkohësisht. Skanimi i zemrës mund të kryhet në 12-15 sekonda. Ky skaner arrin rezolucione të larta dhe mund të realizojë imazhe 3-dimensionale në një kohë të shkurtër dhe me cilësi. Ky aparat do të përdoret nga një personel me kualifikim të posaçëm jashtë vendit. Skaneri i blerë për Qendrën Diagnostike është prodhim i kompanisë amerikane General Electric, Light Speed Pro32.
Të dhëna për Qendrën Diagnostike:
Qendra Diagnostike Orthodhokse “Ungjillëzimi” tek Rruga e Dibrës, është hapur në vitin 1999 duke qenë ndër më bashkëkohoret dhe më konkurueset me simotrat e saj në vend dhe në rajon. Kjo qendër është një nga më modernet në Shqipëri dhe në të ekzistojnë kabinete të ndryshme si ai i: Fizioterapisë, Reumatologjisë (i pajisur me aparatin e teknologjisë së fundit dhe të vetmin e këtij lloji në Shqipëri për matjen e densitetit kockor), Radiologjisë, Kardiologjisë (provë ushqimore, holteri, Echo, Ekg etj), Neurologji, Psikiatri, Kirurgji, Gjinekologji, Pediatri si dhe laboratorët: klinik, biokimik, mikrobiologjik, cito-histo patologjik dhe ai dentar të cilët u vijnë në ndihmë mijëra pacientëve. Shërbimi u ofrohet të gjithë njerëzve pa dallim besimi. Qendra është me karakter jofitimprurës. Pagesa është e arsyeshme dhe të ardhurat shkojnë për mirëmbajtjen, funksionimin, rinovimin dhe pajisjet e reja.
