22 janari, e kremtja e shën Anastas Persianit është një ditë e shënuar edhe për Kishën tonë, sepse kujton ditën e emrit të Kryebariut, Fortlumturisë së Tij, Imzot Anastasit. Me këtë rast, si çdo vit, klerikë, besimtarë dhe miq të shumtë të Kryepiskopit e urojnë atë: “Për shumë vjet o Kryezot”, që Perëndia t’i falë vite të gjata e të bekuara.
    Festa e kësaj dite nisi me Liturgjinë Hyjnore në Katedralen e Tiranës, ku merrnin pjesë mitropolitët dhe klerikë të shumtë të enorive si dhe qindra besimtarë të të gjitha moshave. Pas Liturgjisë Hyjnore, në sallën përballë Katedrales, Kryepiskopi priti urimet e të pranishmëve dhe shumë dhurata e lule. 
    Në pasdite u rezervua një tjetër pritje në ambjentet e Kryepiskopatës. Personalitete, besimtarë dhe njerëz të thjeshtë krijuan një atmosferë të ngrohtë familjare mes gëzimit dhe urimeve të përzemërta.
 
 
    Festa vijoi në një mënyrë të veçantë
    Kjo ditë nuk është vetëm dita e emrit të tij, por ai vetë e ka bërë ditë gëzimi edhe për shumë të tjerë. Për vite me radhë, Kryepiskopi Anastas e ndan gëzimin e tij, edhe me shumë njerëz, të cilëve u dërgon nga lulet e dhuruara.
    Gratë orthodhokse bashkë me të rinjtë përcollën gëzim në shumë persona dhe në azil. Të rinjtë nën drejtimin e përgjegjëses së Zyrës së grave znj. Rajmonda Shqevi, shpërndanë lulet te azili i grave të  motrave të Nënë Terezës. Gëzimi dhe mirënjohja mbushi zemrat e tyre, të cilat me gjithë shpirt uronin vite të bekuara, si dhe shprehnin falënderimin për gjithçka që Kisha jonë ka ofruar për vite të tëra në shërbim të tyre.
 
 
 
Isidor Koti & Ana Baba
 
Post Views: 142