 13 qershori, dita e të kremtes së Shpirtit të Shenjtë, për të diplomuarit e rinj të Akademisë Teologjike “Ngjallja e Krishtit” në shën Vlash të Durrësit, ishte më shumë se një ceremoni tradicionale festive. Në këtë ditë kaq të veçantë, merrte pjesë Kryepiskopi Anastas bashkë me disa anëtarë të Sinodit të Shenjtë, Mitropolitin e Beratit Ignati, Ndihmës-Dekani i Akademisë, Episkop Nikolla, Protopresviter Jani Trebicka si edhe klerikë të ardhur nga disa qytete të vendit, familjarë të të sapodiplomuarve, pedagogë, studentë si edhe të ftuar të tjerë. Pas Liturgjisë Hyjnore, të gjithë të pranishmit u mblodhën në sallën “Sion”, për të ndjekur programin e përgatitur posaçërisht për këtë ceremoni. Fjalën e hapjes e mbajti Hirësi Nikolla, i cili theksoi rëndësinë e sakrificës: “Nëse do duhet të punojmë në vreshtin e Zotit, duhet sakrificë. Në Kishë nuk ka punë, por shërbesë. Tani për ju studentë do nisë një periudhë e re me angazhime dhe me vështirësi, por mos u shqetësoni. Perëndia do t’ju japë atë çfarë është më e mira. Kujtoni Apostull Petron kur thotë: “Përuluni në dorën e përjetshme të Perëndisë, që ai t’ju lartësojë në kohën e duhur”.
 Më tej përshëndeti kori i Akademisë, për të pasuar leximin e tekstit “Rëndësia e Ngushëlluesit në jetët tona”, nga një prej studenteve më të mira të këtij brezi, Odeta Davidhi. Pas saj, u mbajt fjalimi i studentit më të mirë. Këtë vit, studentja nga Gjirokastra, Gabriela Dalipi, u zgjodh më e spikatura në mësime, duke merituar edhe fjalimin, në të cilin ajo dëshmoi si u bë anëtare e Kishës, bekimet që përfitoi gjatë katër viteve të shkollës si edhe gatishmërinë për të kontribuar në vazhdimësi në vreshtin e Zotit. Pas emocioneve që përcolli Gabriela, fjalën e mori Kryepiskopi Anastas, i cili ndau me studentët e diplomuar dhe të gjithë të pranishmit shumë mesazhe dhe përjetime:
“Të falënderojmë Perëndinë, sepse Shpirti i Shenjtë brenda situatave shumë të vështira vazhdon të drejtojë Kishën tonë në rrugë të bekuara, me vetësakrifikimin e njerëzve të njohur e të panjohur. Shumë njerëz u gjendën jashtë besimit dhe Shpirti i Shenjtë i ka sjellë dhe orientuar në Kishë. Ka me mijëra të rinj që presin të njohin të vërtetën dhe ju duhet të bëheni mbartës të Shpirtit të Shenjtë për të vazhduar misionin. Nevojat në Shqipëri janë të shumta. Kisha e Shqipërisë nuk është e vogël, jemi me mijëra, por duhet të jemi llambadhe të ndezura, jo të fikura. Përpiquni të jeni të bashkuar, vetëm atëherë Shpirti i Shenjtë, është më i kapshëm dhe më i ndjeshëm në jetën tonë. Bekimet e Perëndisë të mos i mbajmë vetëm për veten, por t’i shpërndajmë edhe te të tjerët, që t’iu japim më shumë dashuri. Duhet të kemi më shumë shpresë dhe optimizëm” – theksoi Kryepiskopi.
Në fund të ceremonisë u shpërndanë diplomat dhe për të gjithë së bashku dreka në sallën e ngrënies së Akademisë, ku harmonia, këngët, kujtimet dhe falënderimet e studentëve dhe të prindërve të tyre e bënë më të ngrohtë këtë ditë të bukur jo vetëm për të diplomuarit, por edhe për të pranishmit e tjerë.
Isidor Koti
|
