Ishte ditë e veçantë për Kishën tonë që 14 shtatorin, festën e Kryqit të Nderuar, e kremtuam bashkë me ditën e parë të këtij viti të ri shkollor. Tradicionalisht Kisha është e lidhur me shkollën dhe kulturën. Dija mbetet ndër rrënjët kryesore të edukimit dhe formimit të personalitetit të çdo të krishteri.
 
    Romeo Boçi këtë vit është nxënës në vitin e fundit të shkollës së mesme kishtare “Kryqi i Nderuar” në Sukth të Durrësit. Ai e njeh mirë ambientin, duke përfituar edukimin dhe kulturën e lëndëve në orët e mësimit, por edhe jetën e krishterë brenda komunitetit të moshatarëve të tij. “Në këtë shkollë kam përfituar mbi të gjitha një fryt të madh që na e jep Kisha jonë, dashurinë. Tani shkolla është e kompletuar, jemi të ndërgjegjshëm për mbarëvajtjen e mësimit dhe do përpiqemi të ndihmojmë njëri-tjetrin me stafin pedagogjik që të ecim përpara” – thotë ai në mënyrë konçize dhe tërheqëse. Në këtë shkollë janë marrë të gjitha masat didaktike dhe pedagogjike në mënyrë që nxënësit të dalin me rezultate të kënaqshme. Edhe drejtuesi i këtij institucioni, z. Anastas Dodbiba e konsideron eksperiencën tre vjeçare të funksionimit të shkollës si një sfidë me shumë arritje. Sivjet i është dhënë një rëndësi e veçantë ndërtimit të konviktit, rritjes së nivelit pedagogjik, duke sjellë në shkollë mësues të rinj dhe të talentuar, ndërsa nxënësit i nënshtrohen programit të rregullt mësimor e ndërsa gjatë ditës ata ndjekin kohën e lutjes, studimit, diskutimeve të ndryshme dhe programeve e aktiviteteve të larmishme. Është hapur klasa e dhjetë, parashikohen ndërtimet e konviktit, shtimi i numrit të nxënësve dhe mësuesve.
 
    Në këtë sfond pune dhe përkushtimi ka nisur udhëtimin e këtij viti të ri mësimor, në vitin e saj të njëmbëdhjetë të funksionimit, edhe shkolla tjetër e mesme kishtare “Kryqi i Nderuar” në Gjirokastër. Në kontaktin telefonik me drejtorin e kësaj shkolle z. Thanas Bej, mësuam se procesi mësimor ka nisur me të gjitha kushtet dhe nxënësit janë pritur në mënyrën më të mirë nga stafi pedagogjik dhe ai administrativ. E reja e këtij viti është integrimi në klasën e dhjetë i nxënësve të rinj që kanë ardhur në këtë shkollë. Stafi ka punuar me përkushtim për përshtatjen më këtë sistem të ri, ndërkohë që këtë vit do stimulohen edhe më shumë nxënësit për të qenë më krijues në të gjitha veprimtaritë, për të rritur edhe më shumë standardin dhe cilësinë e rezultateve.
 
 
    Më datën 15 shtator pas Ajazmës së kryer nga Hirësia e Tij Dhimitri, Mitropoliti i Gjirokastrës, nisi viti shkollor 2009-2010 në shkollën e mesme profesionale “Apostull Pavli”, në fshatin Mesopotam të Delvinës. Ky është viti i katërt i funksionimit të kësaj shkolle me degët: informatikë, instalime elektrike, instalime hidraulike, instalime kondicionimi. Numri i regjistrimeve edhe për këtë vit ka qenë i kënaqshëm. Të pranishëm në ceremoninë e hapjes së shkollës kanë qenë Kryetari i komunës Finiq z. Ziso Lluci dhe i komunës Mesopotam z. Themistokli Kaishi. Gjithashtu bekimin dhe urimet për një vit të mbarë shkollor në oborrin e shkollës “Apostull Pavli”, morën edhe nxënësit dhe mësuesit e shkollës publike fillore dhe 9-vjeçare të fshatit Mesopotam. Këtë vit me ndryshimet e sistemit 9-vjeçar organizimi i shkollës profesionale do të vijojë programin 2+1+1 vjet me të drejtën e vijimit të shkollës se lartë. Në fjalën e tij Mitropoliti i Gjirokastrës theksoi se kjo shkollë e themeluar nën përkujdesjen dhe mbështetjen e gjithanshme të Kryepiskopit Anastas ka si synim jo vetëm të përgatisë profesionistë të aftë, por edhe njerëz me virtyte të larta, të cilët me ndihmën dhe besimin te Zoti, do të asistojnë në krijimin e një shoqërie të shëndetshme. Prindërit dhe personeli pedagogjik shfaqën mirënjohjen e thellë për veprën shpresëdhënëse të fëmijëve që u ka dhuruar Kryepiskopi Anastas.
 
    Kisha jonë e ShenjtëOrthodhokse krahasmisionit të saj shpirtëror për të gjitha grupmoshat, ku një vend të veçantë zënë edhe fëmijët, ka edhe misionin human. Me ndihmën dhe fondet e mbledhura nga Kryepiskopi Anastas, në të gjithë Shqipërinë ndër vite janë hapur edhe shkolla të ndryshme 9-vjeçare.
 
    Në shkollën shqiptaro-amerikane “Protagonistët“, në Tiranë, u mirëpritën sivjet, në vitin e saj të shtatë të funksionimit, më shumë se 30 nxënës në klasën e parë, ndërkohë që një pjesë e mirë e totalit të nxënësve tashmë i zhvillojnë mësimet në kushte të reja dhe bashkëkohore në ambientet e reja në rrugën e Kavajës. Në intervistën që zhvilluam me mësuesen e kësaj shkolle znj. Juliana Kaba u informuam se me programin e shkollës, miratuar nga Ministria e Arsimit, “Fëmija është në qendër të mësimit dhe ne bëjmë të mundur që t’i aktivizojmë në çdo moment. Metodat që zhvillohen në Amerikë i përdorim gjatë procesit mësimor” – theksoi ajo. Ndërkohë që vijon me intensitet të lartë puna për rritjen e cilësisë në mësimdhënie në mënyrë që edhe këtë vit nxënësit të dalin ndër më të mirët në konkurset dhe olimpiadat kombëtare dhe ndërkombëtare.
 
      Edhe shkolla tjetër 9 vjeçare shqiptaro-greke “Frymë Dashurie”, pranë kishës së shën Gjergjit, Durrës  , në vitin e pestë të funksionimit të saj, po punon me 82 nxënës nga të cilët 20 prej tyre janë ulur për herë të parë në bankat e shkollës. Drejtori z. Kristaq Mile u shpreh i gëzuar që viti i ri mësimor nisi me entuziazëm nga stafi pedagogjik dhe vetë nxënësit, të cilët janë pajisur me të gjithë librat dhe mjetet didaktike, duke punuar me seriozitet në kushte shumë të mira, me kabinete të rregulluara dhe klasa me parametra bashkëkohore.

           

 
 Isidor Koti
Post Views: 0