†Anastasi
Kryepiskopi i Tiranës, Durrësit dhe i gjithë Shqipërisë
Duke marrë pjesë me gjithë zemër në hidhërimin e fjetjes në Zotin të Papës së Nderuar, Benediktit XVI, me të cilin kam patur kënaqësinë të njihem prej shumë vitesh, shprehim ngushëllimet tona të sinqerta.
Ai ka qenë një personalitet i shquar, i pajisur me dhunti të mrekullueshme intelektuale dhe besim të patundur ndaj Perëndisë Triadik, me integritet, mirësjellje dhe ndjeshmëri. Një teolog i dalluar me horizont të gjerë, profesor me një kontribut shkrimesh të denja për t’u studiuar; ka punuar në mënyrë të qëndrueshme për mbrojtjen e besimit, për nxitjen e mëtejshme të dëshmisë së krishterë, për dialogun ndërfetar dhe për forcimin e paqes në mbarë botën “Të lumur janë që tani ata të vdekur që vdesin në Zotin. Po, thotë Fryma, që të prehen nga mundimet e tyre; edhe veprat e tyre i ndjekin pas, bashkë me ata (Zbu. 14:13).”
