Lutje për paqe në të dielën e orthodhoksisë.
Çdo vit, të Dielën e Parë të Kreshmës, të Orthodhoksisë, Kisha jonë kremton fitoren kundër herezisë ikonoklaste. Kjo fitore përkon me rivendosjen e ikonave në Kishat Orthodhokse, në vitin 843, pas një vale të gjatë persekutimi. Që atëherë u vendos të kremtohet me madhështi kjo ngjarje e madhe. Njëkohësisht, kjo ditë fitoi një përmbajtje më të gjerë dhe arriti të shënojë triumfin e Orthodhoksisë sonë, kundër gjithë herezive dhe gjithë kundërshtarëve të saj ndër shekuj.
Sot, më 13 mars 2022, u krye Liturgjia Hyjnore në Katedralen “Ngjallja e Krishtit”, në Tiranë, nga Mitropoliti Nathanail, në prani të Kryepiskopit Anastas, bashkë me klerikë të kryeqytetit. Për të Dielën e Orthodhoksisë besimtarëve të shumtë të mbledhur për këtë të kremte të shënuar u foli Ikonom Stavrofor atë Aleks Ndoni.
Në mbyllje të Liurgjisë u krye litania e ikonave.
Në përfundim, besimtarëve iu lexua thirrjet e Kryepiskopit Anastas për ndalimin e luftës dhe paqen në Ukrainë dhe u bë një lutje e posaçme për paqe:
* * * * *
E diel, 27 shkurt 2022
Lutje e nxehtë për ndalimin e luftës vëllavrasëse dhe paqtimin në Ukrainë
Duke marrë shkas nga ngjarjet dramatike në Ukrainë, Fortlumturia e Tij, Kryepiskopi i Tiranës dhe i Gjithë Shqipërisë, Anastasi, i fton besimtarët dhe çdo njeri vullnetmirë të intensifikojnë lutjen e tyre për paqe dhe thekson se:
“Dhimbja dhe hidhërimi i thellë mbushin shpirtrat e njerëzve kur ndërpritet dialogu për paqen dhe nis lufta vëllavrasëse me monologun e dhunës së të fortit dhe me viktima, zakonisht njerëz të pafajshëm, të pambrojtur dhe valët e refugjatëve.
Ndërgjegjja e krishterë dënon çdo formë akti dhune, duke nxitur fort secilin të kontribuojë sipas mundësisë në arritjen e paqes dhe pajtimit në Ukrainën e shumëvuajtur dhe kudo në botë.
Parimi ynë i përhershëm mbetet fjala e Krishtit: “Lum ata që bëjnë paqe, sepse këta do të quhen bij Perëndie”.
* * * * *
E diel, 13 mars 2022
Në datën 13 mars 2022, të Dielën e Orthodhoksisë, në Kishën Katedrale të Tiranës, gjithashtu tha:
“Le të intensifikojmë lutjen tonë për ndalimin e menjëhershëm të luftës vëllavrasëse të Rusisë kundër Ukrainës, për shërimin e plagëve, për lehtësimin e gjendjes së refugjatëve dhe për shmangien e përshkallëzimit të mëtejshëm të konfliktit të armatosur.
Gjithashtu le të fuqizojmë lutjen tonë për rivendosjen e unitetit midis orthodhoksëve, për paqtimin, për faljen, për solidaritetin, për pajtimin, që me ndërgjegje të pastër t’I drejtojmë himn dhe lutje Zotit të kryqëzuar dhe të ngjallur, Atij që i paqëson të gjitha”.
Lutemi edhe për pushimin e menjëhershëm të luftës vëllavrasëse të Rusisë kundër Ukrainës, për shërimin e plagëve, për lehtësimin e gjendjes së refugjatëve, për ndalimin e përshkallëzimit të mëtejshëm të konfliktit të armatosur.
Lutemi edhe për rivendosjen e shpejtë të unitetit të orthodhoksëve, për paqtimin, faljen, solidaritetin, pajtimin, që me ndërgjegje të pastër, ti drejtojmë himn dhe lutje Zotit të kryqëzuar dhe të ngjallur, Atij që i paqëson të gjitha.”
Foto Album:
