Zyra “Diakonia Agapes” e Kishës sonë, ka nisur zbatimin e projektit “Fuqizim dhe praktika institucionale përfshirëse për komunitetin egjiptian të Shushicës, Elbasan”, për të rritur integrimin dhe shkallën e përfshirjes së tyre sociale. Projekti do të realizohet me mbështetjen e Fondacionit të Shoqërisë së Hapur për Shqipërinë. Ai do të zgjasë për një periudhë gjashtëmujore (1 korrik – 31 dhjetor, 2013).Projekti synon të forcojë kapacitetet e punonjësve të institucioneve publike në komunën Shushicë, Elbasan, për të siguruar praktika institucionale përfshirëse dhe funksionale për komunitetin Egjiptian të zonës, në kuadër të zbatimit efektiv të Planit të Veprimit të Dekadës Rome (PVDR), hartuar nga Organizata e Kombeve të Bashkuara – Shqipëri. Përmes këtij projekti “Diakonia Agapes” synon gjithashtu të ndihmojë anëtarë të komunitetit egjiptian, për të njohur realitetin social, kuadrin ligjor dhe ndërveprimin me institucionet e tyre lokale. Në fokus do të jetë përmirësimi i shërbimeve publike të shikuara në perspektivën e PVDR – së si dhe fuqizimi i anëtarëve të komunitetit egjiptian të komunës Shushicë, nëpërmjet njohjes së të drejtave të njeriut në kuadër të PVDR-së.
Pritet që në përfundim të zbatimit të tij të ketë rritje të ndërveprimit mes institucioneve publike të komunës së Shushicës dhe komunitetit Egjiptian të kësaj komune bazuar në një plan të përbashkët veprimi që do të hartohet.
