Zyra e Katekizmit e Kishës sonë zhvilloi një cikël mësimesh mbi katekizmin e krishterë orthodhoks në zonën e Shpatit të Sipërm, në fshatrat Zavalinë dhe Seltë, ku këto mësime kanë munguar për arsye të kushteve të vështira, si rrugët e prishura dhe largësia, moti i keq në dimër etj.Në fshatin Zavalinë po ndërtohet edhe kisha e re, me bekimin dhe fondet e siguruara nga Kryepiskopi Anastas. Ndaj, krahas ndërtimit të saj u pa me vend edhe puna për ndërtimin e Kishës si komunitet i gjallë. Mësimet u mbështetën mbi Dhjatën e Vjetër, kryesisht mbi krijimin, rënien e njeriut në mëkat, udhëtimin e popullit të Perëndisë për në tokën e premtuar dhe qëllimin e ardhjes së Jisu Krishtit në tokë si shpëtimtar i botës.
Në katekizëm morën pjesë rreth 120 persona nga Zavalina dhe 60 nga Selta.
Elisabeta Shqau
