Shkollat 9-vjeçare dhe të mesme, bashkë me ato profesionale të Kishës kanë përfunduar me sukses vitin arsimor 2011-2012. Këtë e treguan edhe rezultatet e nxënësve, në mësime dhe në sjellje. Ata mbyllën ciklin e studimeve me arritje të spikatura. Madje, nxënësit e vitit të fundit i kaluan me sukses “ethet” e provimeve të Maturës Shtetërore dhe tani presin tetorin për të ndjekur studimet në Akademinë Teologjike “Ngjallja e Krishtit”, në Shën Vlash të Durrësit, ose studimet në universitetet brenda dhe jashtë vendit. Gjithashtu mbylli vitin mësimor edhe shkolla profesionale në Mesopotam të Sarandës, duke përgatitur në mënyrë dinjitoze nxënës në degët: Teknologji informimi dhe komunikimi, Elektronikë, Termohidraulikë, Shërbime sociale dhe shëndetësore, duke shërbyer si një fidanishte e të ardhmes së Kishës dhe të shoqërisë shqiptare. Mësuesit shqiptarë dhe të huaj dhanë eksperiencën e tyre në dijet shkencore, duke i njohur nxënësit edhe me elementët më bashkëkohorë të degëve përkatëse.
Shkolla 9 – vjeçare shqiptaro-amerikane “Protagonistët”, vijoi edhe këtë vit suksesin e paraqitjes së shkëlqyer me metodat më bashkëkohore të mësimarrjes. Gjithashtu, shkolla 9-vjeçare shqiptaro-greke “Frymë Dashurie”, në Durrës, përfundoi vitin shkollor me përparime në fushën e dijes për nxënësit e shtatë klasave të para të saj.
Shkollat e Kishës sonë shërbejnë si laboratorë të ringjalljes shpirtërore dhe morale të shoqërisë sonë dhe përgatitjes cilësore në profesionet e jetës. Organizimi shumë i mirë për mbylljen me sukses të vitit të ri shkollor, me bekimin dhe mundësitë e krijuara nga Fortlumturia e Tij, Kryepiskopi Anastas, tregon vlerësimin e madh që i jepet formimit të një brezi të ri me dije e kulturë për të ardhmen e Kishës dhe vendit.
Isidor Koti
