Nga 16- 23 shtator 2011, në mjediset e Manastirit të Ri të Shën Vlashit dhe të Akademisë Teologjike “Ngjallja e Krishtit”, pranë Durrësit, zhvilloi punimet Komisioni Miks për Dialogun Anglikano-Orthodhoks. Është hera e parë që ky Komision mblidhet në vendin tonë, me ftesë të Kryepiskopit të Tiranës dhe të gjithë Shqipërisë, Anastasit. Të dielën, 18 shtator, miqtë nga Kishat Orthodhokse dhe Anglikane morën pjesë në Liturgjinë Hyjnore, në Kishën “Ungjillëzimi i Hyjlindëses”, në Tiranë, ku Hierarkët orthodhoksë bashkëcelebruan. Predikimin e rastit e mbajti Episkopi Kalistos (Ware), nga Britania, Patriarkana Ekumenike, teolog i njohur botërisht dhe bashkëkryetar i këtij Komisioni.
Midis dy Kishave ka pasur marrëdhënie miqësore që prej disa shekujsh, por ky dialog teologjik i drejtpërdrejtë ka nisur që nga viti 1973, në Oksford. Rrjedhojë kanë qenë tre raporte, për tema teologjike me interes të përbashkët. Tani ka nisur një fazë e re, ku po diskutohet për përgjegjësinë e të krishterëve për Krijesën e Perëndisë dhe për mjedisin, si dhe për përgjegjësinë e tyre për mbrojtjen e të drejtave të njeriut.
Kisha Orthodhokse u përfaqësua në takim nga Mitropoliti Kalistos, Patriarkana Ekumenike; Mitropoliti Serafim i Zimbabves, Patriarkana e Aleksandrisë; Mitropoliti Nifon i Tërgovishtes, Patriarkana e Rumanisë, Mitropoliti Krisostom i Kitiut, Kisha e Qipros; Episkopi Ilia, Kisha e Shqipërisë, si dhe nga teologë laikë dhe klerikë nga Kishat e Rusisë, Serbisë, Greqisë, Polonisë. Bashkëkryetari Anglikan i komisionit ishte episkopi Roger Heft, nga Australia.23. 9. 2011
Zyra e Shtypit
e Kishës Orthodhokse Autoqefale të Shqipërisë
