Në 10 shtator nisi dita e parë e shkollës me entuziazmin e nxënësve dhe mobilizimin e mësuesve. Sipas informacioneve që kemi marrë nga drejtuesit e këtyre shkollave mësuam se stafi ka punuar me përkushtim për përshtatjen me program bashkëkohor mësimdhënieje, ndërkohë që këtë vit do stimulohen edhe më shumë nxënësit për të qenë më krijues në të gjitha veprimtaritë, për të rritur edhe më shumë standardin dhe cilësinë e rezultateve. Numri i regjistrimeve edhe për këtë vit ka qenë i kënaqshëm. Nxënësit e të gjitha shkollave të Kishës sonë janë pajisur me të gjithë librat dhe mjetet didaktike, duke pasur kushte shumë të mira, me kabinete të rregulluara dhe klasa me parametra moderne. Në vitin e tetë të funksionimit, shkolla 9 vjeçare shqiptaro-greke “Frymë Dashurie”, pranë kishës së shën Gjergjit, Durrës, sivjet ka risi laboratorin e fizikës dhe kimisë, që çelen për herë të parë në funksionim të mësimdhënies.Shkolla e mesme kishtare “Kryqi i Nderuar” në Sukth të Durrës, ka shtuar numrin e kompjuterave në laboratorin e informatikës, ndërkohë që për lëndën e kimisë është marrë bazë e veçantë materiale.Shkolla e mesme profesionale “Apostull Pavli”, në fshatin Mesopotam të Delvinës, sivjet pati prurje të shumta nga emigracioni, ku të rinj të kthyer në Shqipëri si rezultat i krizës ekonomike në Greqi, kanë nisur studimet në këtë institucion edukues të Kishës sonë.
Lajmi më i veçantë vjen nga shkolla shqiptaro-amerikane “Protagonistët” në Tiranë, e cila për herë të parë çeli gjimnazin, në vazhdimësi të përvojës zinxhirr dhe disavjeçare të shkollës 9-vjeçare. Deri tani ka interes të lartë të nxënësve për të frekuentuar vitin e parë. Edhe shkollat e tjera të themeluara nën përkujdesjen dhe mbështetjen e gjithanshme të Kryepiskopit Anastas i hapën dyert për nxënësit me të gjitha pajisjet didaktike dhe stafin profesional.
Kisha jonë e Shenjtë Orthodhokse i kushton shumë rëndësi misionit edukues për të gjitha grupmoshat. Me ndihmën dhe fondet e mbledhura nga Kryepiskopi Anastas, në të gjithë Shqipërinë ndër vite janë hapur shkolla të ndryshme, ku vlen të përmendim: shkollën 9-vjeçare dhe liceun shqiptaro-amerikan “Protagonistët”, në Tiranë, shkolla tjetër 9 vjeçare shqiptaro-greke “Frymë Dashurie”, pranë kishës së shën Gjergjit, Durrës dhe Gjirokastër, shkolla e mesme kishtare “Kryqi i Nderuar” në Gjirokastër dhe në Sukth të Durrës, shkolla e mesme profesionale “Apostull Pavli”, në fshatin Mesopotam të Delvinës.
Isidor Koti
