Doli në qarkullim CD “Këngë të krishtera” për grupet rinore dhe kampet e Rinisë Orthodhokse, vol.1, prodhim i Kishës Orthodhokse Autoqefale të Shqipërisë.
Këngët e përfshira në këtë CD përbëjnë një pjesë të këngëve më të preferuara e të përzgjedhura gjatë viteve si në kampet verore, ashtu edhe të grupeve rinore. Disa janë përkthime dhe përshtatje, të tjerat janë krijime e kompozime origjinale nga të rinjtë shqiptarë.
Qëllimi i kësaj CD është që të rinjtë dhe kampistët të përcjellin “gëzimin e eksperiencës së tyre shpirtërore” në shtëpi, në kisha, në grupe rinore dhe në kampe. Kjo CD është realizuar nga Orkestra dhe Kori i Radios “Ngjallja”, nën drejtimin e znj. Joli Nano (Goro), regjistruar në studion e Radios “Ngjallja”, Fm 88.5 Mhz.
Kjo CD është përkushtim i të rinjve drejtuar Fortlumturisë së Tij, Kryepiskopit Anastas, ku dashuria, mbështetja dhe investimi i të cilit bëjnë të mundur realizimin e aktiviteteve të grupeve dhe kampeve rinore.
Frymëzimi dhe iniciativa për këtë prodhim muzikor buroi nga drejtueset e kampit të vajzave, të cilat ofronin me gëzim e dashuri ndihmën e tyre për të kënduar bashkë me qindra kampiste çdo verë.
