Përshëndetja, “Krishti u Ngjall” është mesazhi më i madh i gëzimit dhe i shpresës, mburrja dhe fuqia e çdo besimtari. Një jetë e re lind tani nga varri i Jisuit. “Njeriu i rënë” ringjallet dhe çlirimi i tij nga mëkati vuloset dhe vërtetohet zyrtarisht. Bota pushtohet nga gëzimi i pashprehur dhe ngazëllimi hyjnor. Kisha jonë psal në mënyrë triumfale dhe me ton fitimtar. “Të gjitha mbushen me gëzim, duke përjetuar Ngjalljen e Zotit”.
     Kjo atmosferë melodioze, e cila përshkruhet në mesazhin e Mitropolitit të Beratit, Vlorës, Kaninës dhe gjithë Myzeqesë, Imzot Ignatit drejtuar Klerit dhe Besimtarëve shpresëtarë të mitropolisë, u ndje dhe u përjetua në të gjithë qytetin e Beratit ditën e Ngjalljes së Zotit.
     Këto momente janë tepër madhështore, por bëhen edhe më tepër emocionuese nëse ndjek hap pas hapi shërbesat e shenjta të Javës së Madhe, ngjarjet tronditëse të cilat të shpien në Ngjallje. Dhe padyshim ishin të shumtë shpresëtarët beratas, të cilët përjetuan këto ngjarje nëpërmjet Shërbesave të Shenjta në dy kisha të qytetit, në kishën katedrale të Shën Dhimitrit si edhe në kishën e Shën Spiridhonit.
    Tradhëtia, torturat, kryqëzimi, dhe padyshim varrimi i cili u finalizua me  procesionin madhështor të dy epitafeve në bulevardin kryesor të qytetit i dhuruan çdo besimtari emocione të veçanta dhe të paharrueshme.
    Kulmi i kësaj jave, nata më e shenjtë e gjithë vitit liturgjikal ose ndryshe e quajtur e Kremtja e të Kremteve është patjetër Ngjallja e Zotit Krisht. Me qindra besimtarë të mbledhur përpara katedrales dëgjuan nga goja e Imzot Ignatit thirrjen “Krishti u Ngjall!” dhe morën prej tij Dritën e Shenjtë, ndoqën Kanunin e Pashkës, morën pjesë në Liturgjinë e Shenjtë dhe u Kunguan me Trupin dhe Gjakun e Zotit Krisht.
    Në Mitropolinë e Shenjtë, pas Mbrëmësores së Dashurisë, u kryen nga Imzot Ignati edhe pritjet e rastit ku erdhën për të uruar personalitet vendore si edhe besimtarë të shumtë.
    Përfundoi kështu një javë intensive mes torturave dhe dhimbjeve, por e shpërblyer në fund me gëzimin e madh që sjell Ngjallja. Pikërisht këto donte të shprehte Imzot Ignati i cili, Natën e Ngjalljes, ndër të tjera tha: “Mishërimi dhe Ngjallja e Shpëtimtarit janë, pra, dy stacionet kulmore të veprës së Ekonomisë Hyjnore. Nëpërmjet trupëzimit të Fjalës, Perëndia hyn në histori dhe nëpërmjet ngjalljes së Tij, njeriu hyn në përjetësi! Mishërimi i Fjalës është fillimi i bekuar, ndërsa Ngjallja është mbarimi triumfues i veprës hyjnore për shpëtimin e botës. Pra, përshëndetja “Krishti u Ngjall!” le të jetë mesazhi ynë i gëzueshëm tek të gjithë njerëzit.”
 
           Krishti u Ngjall!
Për Mitropolinë e Beratit
Joan Qako
 
 
Post Views: 125