Të Dielën, 15 Gusht 2010, ditën e të Kremtes së Fjetjes së Tërëshenjtës Mari, Kryepiskopi Anastas ishte mes besimtarëve në enorinë e madhe, por disi të izoluar të Dhrovjanit. Në Kishën e madhe të Shën Nikollës ai kreu Liturgjinë Hyjnore dhe kungoi besimtarët e shumtë me misteret e shenjta. Atmosfera në kishë dhe në oborrin e saj dhe në të gjithë qendrën e fshatit ishte e gëzuar dhe festive. Ishin të ngrohta fjalët që të gjithë, të mëdhenj dhe të vegjël, kishin për të thënë për Kryepiskopin, falënderimi i tyre ishte nga shpirti. Dukej lehtë se në veçanti të rinjtë, ndonëse larg vendlindjes ndjekin me kujdes gjithçka që realizohet në Kishën tonë nën frymën e urtë të Kryepiskopit dhe ndihen për këtë krenarë. Ishin të shumtë që ia thoshin këtë gjë Atit tonë shpirtëror: na bën të ndihemi krenarë kudo ku jemi dhe punojmë dhe jetojmë.
Për ta bërë më konkrete atmosferën e gëzimit dhe si për të dëshmuar fuqinë dhe guximin që jep të besuarit e thellë tek Perëndia, ditë veç të tjerash në qendër të fshatit Dhrovjan ishte organizuar edhe ceremonia për përurimin e ujësjellësit të fshatit. Kryepiskopi Anastas kreu Shërbesën e Ajazmës në një çezmë të ndërtuar në mënyrë tradicionale, e cila pikërisht do të përjetësojë këtë vepër që zgjidhi nevojën më jetësore të banorëve. Falë kontributit financiar, por kryesisht besimit që ngjalli te komuniteti i banorëve se kjo vepër mund të realizohej, i tërë ky ujësjellës u realizua në tre vitet e kaluara nga Kryepiskopi.
Fjala e kryeplakut dhe pllaka përkujtimore e vendosur në oborrin e kishës është shprehja e mirënjohjes për Kryepiskopin që bëri realitet ëndrrën për të pasur ujë në fshat. Dhe tashmë uji arriti jo vetëm në fshat, por në shtëpinë e çdo banori të Dhrovjanit. Për të realizuar këtë vepër tejet të vështirë (gjatësi nga burimi 5.5 km dhe diferenca niveli lartësie mbi 400 m, me ndërtim stacioni pompimi, shtrim të tubacionit dhe punime të tjera si depo uji dhe veprën e marrjes së ujit), u desh që Kryepiskopi jo vetëm të gjejë fondet, por edhe të ndjekë me kujdes çdo fazë të punimeve dhe të mbajë gjallë shpresën se vepra do të përfundonte. Në këtë gëzim të veçantë ishin të pranishëm edhe Zv/Prefekti i Sarandës Gj. Mano, deputeti dhe Kryetar i PBDNJ V. Dule, Kryetari i Komunës Th. Kaishi etj. Kryeplaku P. Taçi mbajti fjalën e rastit mbushur me falënderime sepse Kryepiskopi para disa vjetësh ndihmoi edhe në përmirësimin rrënjësor të rrugës automobilistike dhe në restaurimin e kishës.
Kryetari i Komunës Mesopotam, që përfshin në administrimin e saj edhe Dhrovjanin, në letrën e tij të falënderimit dhe mirënjohjes për Fortlumturinë e Tij, thekson mes të tjerash, se së bashku me Shkollën Profesionale Apostull Pavli (që me kujdesin e Kryepiskopit u themelua dhe funksionon në qendër të Komunës) dhe këto punë në Dhrovjan e të tjera ndërhyrje në shumë fshatra të kësaj njësie administrative, Kryepiskopi Anastas është bërë bamirësi i madh i zonës dhe ka kryer në të punë që financiarisht kapërcejnë të gjitha ndërhyrjet me financim buxhetor nga shteti.
(Korresp. i gazetës “NGJALLJA”)
