Faza e parë e ndihmave përqëndrohet në lagjen “Xhabije” dhe te komuniteti rom i evakuar në komunën “Rrenc”
Ende pa hyrë në qytet, syri të rrok vetëm ujë. Kushdo e ka mjaft të vështirë të shquajë rrugë. Banesat rreth e rrotull janë zhytur në humbëtirë aq sa disave prej tyre u duken vetëm çatitë. Lumi Drin shfaqet i frikshëm. Pamja që të ofron u ngjason skenave të filmave.
 
    E vështirë të besosh që mbi atë tokë ku fermerët punonin para pak ditësh, uji ka mbuluar gjithçka dhe nuk të zë syri asnjë pëllëmbë dhė, por vetëm varka me motorr. Sa kalon rrugën e vjetër, automjeti hyn në afërsi të qendrës së Shkodrës. Kjo pjesë e qytetit nuk është mbuluar nga uji. Por sapo del pak prej saj shikon përtej lagjes Xhabije se Kalaja e Rozafës po përballet me “ushtarë të padukshëm” që lundrojnë gjithandej me varka. Duke e parë veten të rrethuar nga uji ndihesh i frikësuar nga kjo situatë dramatike. Ndaj ne u ndalëm në hyrje të kësaj lagjeje ku jetojnë mbi 20 mijë banorë. Për të shkuar në shtëpitë e tyre, ata prej ditësh udhëtojnë me makinat e ushtrisë ose me varkat e sajuara.
    Me qindra pako ndihma për qindra mijëra qytetarë, të cilët prej kateve të sipërme të kërkojnë ndihmë, ndërsa mbërrijnë pakot e para me ushqime për në varkat “e shpëtimit”. Atë Emanuel Lusha, i ardhur bashkë me stafin e Kishës Orthodhokse Autoqefale të Shqipërisë nga Tirana, del nga makina dhe hidhet i pari për në varkë, duke u afruar në hyrje të kamionit dhe duke shoqëruar njerëzit e tjerë që transportonin ndihmat. Varkat e para nisin të udhëtojnë drejt shkollës kryesore të kësaj lagjeje, ndërsa kryeplaku me banorë të tjerë na pret me dashamirësi. Ai tregon se pako të tilla me kaq shumë asortimente nuk kanë ardhur me këtë sasi gjatë këtyre ditëve. Falenderimet e qytetarëve për Kishën Orthodhokse dhe ndihmën e saj të përcjellin deri në dalje, ndërsa zbresim nga varka për të shkuar në një tjetër destinacion, pikërisht për në komunën Rrenc.
    Duke iu përgjigjur në vazhdim situatës dramatike në këtë zonë, për të gjitha familjet rome që jetojnë aty, u realizua brenda ditës shpërndarja tjetër e ndihmave. Kujdesi i Kishës Orthodhokse ndaj këtyre familjeve të evakuara në këtë komunë është treguar edhe më parë me ndihma ushqimore dhe në veshmbathje kur ata jetonin buzë lumit Buna. Evakuimi i tyre drejt kësaj komune për shkak të përmbytjeve bëri që ata të na prisnin në këtë komunë me shumë dashuri dhe besim, pasi ata e njohin prej vitesh kontributin e çmuar të Kishës.
 
   Ndihmat u siguruan me kujdesin e drejtpërdrejtë të Kryepeshkopit Anastas, përmes financimit të Organizatës Zviceriane HEKS (Swiss Interchurch Aid) në vlerën e pesë mijë eurove. Kjo ishte ndihma e parë për këtë periudhë e dhuruar prej Kishës Orthodhokse për zonën e përmbytur të Shkodrës. Ndihmesa të tjera janë dhënë që në çastet e para në Shtabin e Emergjencës së këtij qyteti në muajin janar me 5 tonë ndihma, ndërsa në muajin shkurt u dha një sasi e konsiderueshme të ardhurash të mbledhura nga besimtarët orthodhoksë në të gjithë Shqipërinë. Gjatë ditëve në vazhdim do të vijojnë fazat e tjera të ndihmave për banorë të tjerë të qytetit dhe rrethinave të tjera që po vuajnë nga fatkeqësia e përmbytjeve.
 
Nga: Anisia Koti
Fotot: Isidor Koti
 
 
Post Views: 161