 Në periudhën e Kreshmës së Madhe dhe në pritje të vigjiljes së Pashkës, gratë e lidhjes orthodhokse të grave “Përhapja e Dashurisë”, të qytetit të Tiranës zhvilluan shumë aktivitete të larmishme shpirtërore dhe sociale. Ato morën pjesë në takimet e të mërkurave, në lutjet dhe shërbesat e Kishës. Gjatë kësaj periudhe gratë orthodhokse iu përkushtuan mësimit të himneve dhe tropareve të zgjedhura, kushtuar Krishtit të Ngjallur, duke formuar në këtë mënyrë edhe një kor të vogël. Ndër shërbimet sociale më të rëndësishme gjatë kësaj periudhe kanë qenë vizitat te të sëmurët në shtëpi e në spitale, ku vlen të veçohen takimet me dy besimtarët Kristo Dingo dhe nëna Antigoni, të cilët u larguan nga kjo jetë me besim të madh te Krishti dhe që do të kujtohen me mall e respekt nga i gjithë komuniteti i Kishës. Me rastin e Pashkës, gratë orthodhokse kryen edhe një vizitë ngushëllimi, në familjen e të ndjerit atë Sotir Xhaferri, në kujtim të 10-vjetorit të fjetjes së tij.
 Të moshuarit, të cilët strehohen në azilin e motrave të nënë Terezës, janë përherë pjesë e vizitave dhe e kujdesit treguar nga grupi i grave orthodhokse. Kleriku, i cili shoqëronte gratë vullnetare, kungoi me Trupin dhe Gjakun e Krishtit, të moshuarit, të cilët ishin pregatitur për marrë brenda tyre Kungatën Hyjnore.Në këto shërbime sociale, organizuar nga gratë orthodhokse, me rastin e Pashkës, morën ndihma rreth 100 persona. Ndihmat e dhëna janë siguruar nga fondet e Kryepiskopit Anastas, i cili ka treguar gjithmonë një kujdes të veçantë në këtë asppekt.  Komuniteti i Kishës së Ungjillëzimit, Tiranë, grumbulloi një fond, i cili shërbeu për drekën e organizuar për 30 të moshuar, në azilin shtetëror., e përgatitur nga gratë aktiviste të Kishës Veprimtaria nisi me vezët e kuqe dhe me lajmin festiv “Krishti u Ngjall!”. Lajmin e Ngjalljes së Zotit, e pritën me gëzim të madh, edhe këtë vit, dhe të dënuarit e Burgut 325 në Tiranë. Grupi përfaqësues i Kishës, përfaqësuar nga një klerik dhe gra të grupit të grave, vizituan repartin e burrave dhe të grave. Fillimisht, atë Aleksi transmetoi mesazhin e Pashkës, duke përcjellë gjithashtu edhe urimet e ngrohta e të përzemërta të Kryepiskopit Anastas.
 Në fund të kësaj vizite të ngrohtë, të gjithë së bashku kënduan troparin “Krishti u Ngjall” si edhe u shpërndanë dhurata, për 170 të burgosur. Pako ushqimore u shpërndanë edhe për rreth 500 persona dhe familje të varfra, të sëmurë, jetimë, të pastrehë, të paralizuar, të verbër, lypësa etj. në shumë zona të dioqezës së Tiranës si në Lezhë, Gramsh, Elbasan, Shpat, Librazhd, Cërrik, Shtërmen etj.
Rajmonda Shqevi
|
