Kopshti “Frymë dashurie” pranë kishës Shën Nikolla në Kavajë organizoi në fund të janarit festën “Takim brezash”. Pas më shumë se 10 vjet pune e veprimtarie të gjallë, gjeneratat vendosën të mblidheshin brenda ambjenteve të kopshtit.“Është kënaqësi të shikojmë të takohen me njëri-tjetrin përfaqësues të brezave të mëparshëm. Ata u rritën dhe morën njohuritë e tyre të para në këtë kopësht. Jemi mbledhur të përjetojmë edhe njëherë me mall këtë histori të vyer” – tha përgjëgjësja e kopshtit, znj. Dhurata Xoxi.Ky takim i kishte në qendër të vëmendjes të gjithë dhe s’kishte si të ndodhte ndryshe.Fëmijët treguan para të pranishmëve ato çfarë kishin mësuar në kopësht dhe kishin përgatitur një program shumë të bukur artistik ku morën pjesë vajza dhe djem, të cilët kanë qenë në këtë kopësht, duke kënduar këngë që kishin mësuar aty. Një ndërthurrje e këndshme vullnetesh që ishin bërë unik në atë moment. Në fund, znj. Nafsika Melo, drejtoreshë e kopshteve të Kishës falenderoi të pranishmit, duke u shprehur: “Do doja të kthehesha disa vite mbrapa, atëherë kur nën krismën e pushkëve, në mars të vitit 1997 kemi hapur këtë kopësht. Ishte në vazhdimësi të kopshteve, të cilat i kishte hapur me shumë dashuri Kryepiskopi dhe që vijon t’i mbajë, duke i furnizuar ato qoftë me dashurinë e Tij, me përkujdesjen, me bazën materiale dhe me çdo gjë tjetër. Nuk do mund t’i realizonim të gjitha këto në rast se nuk do të kishim atë në krye.”
Një përshëndetje të veçantë në fund të takimit dha edhe prifti i kësaj kishe, At Joan Tereziu, i cili shprehu mirënjohjen për prindërit që ua kanë besuar edukimin e fëmijëve tuaj Kishës sonë. “Nuk kemi vënë re asnjëherë se çfarë prejardhje kanë këta fëmijë. Ne na intereson edukimi dhe formimi i tyre për tu bërë të denjë për shoqërinë tonë” – theksoi ai.
Isidor Koti
