Veprimtaria filloi ditën e shtunë 7 shkurt. Ditën e diel, 8 shkurt të gjithë pjesëmarrësit morën pjesë në Liturgjinë Hyjnore, që u krye në kishën “Ungjillëzimi i Hyjlindëses Mari”, Tiranë, nga Kryepiskopi i Tiranës dhe i gjithë Shqipërisë Anastasi (Zëvendëspresidenti i KEK), së bashku me Mitropolitin Genadios i Sasimës (përfaqësues i Patriarkanës Ekumenike) dhe Mitropolitin Athanasin e Akaias (përfaqësues i Kishës së Greqisë pranë BE, në Bruksel). Hirësia e Tij Genadios mbajti edhe predikimin e ditës.
Në fund të Liturgjisë përshëndeti besimtarët Presidenti i KEK, Rev. Jean-Arnold de Clermont, nga Franca, i cili shprehu gëzimin e gjithë anëtarëve të Presidencës për këtë vizitë dhe njohje me një kishë që është “manifestimi i fuqisë së ngjalljes”.
Presidenti Clermont falënderoi veçanërisht Kryepiskopin Anastas për “kohën, energjinë dhe urtësinë” që i ka kushtuar lëvizjes ekumenike, veçanërisht pas zgjedhjes së tij si Zëvendëspresident i KEK, në vitin 2003.
Pas Liturgjisë anëtarët e Presidencës së KEK vizituan katedralen në ndërtim të Tiranës, qendrën shpirtërore-arsimore Thavor etj.
Pasditen e të dielës filluan seancat e mbledhjes, në mjediset e Akademisë Teologjike “Ngjallja e Krishtit”, në Manastirin e Shën Vlashit dhe u mbyllën të martën në darkë, 10 shkurt. Në të u diskutua dhe u morën vendime në lidhje me asamblenë e ardhshme të KEK, që do të zhvillohet në Lion të Francës, nga 15-21 korrik 2009, e cila do të celebrojë edhe 50-vjetorin e krijimit të Konferencës Evropiane të Kishave, si edhe për çështje të tjera që kanë të bëjnë me kishat anëtare.
Gjithashtu u diskutua edhe për problemet ekonomike, duke pasur parasysh krizën ekonomike që po kalon Evropa dhe mbarë bota dhe u vendos që këto probleme të reflektojnë edhe në buxhetin e ardhshëm.
Së fundi ata bënë edhe një deklaratë për kthimin e vendeve të shenjta në Shqipëri. (
kliko)Në fund pjesëmarrësit falënderuan Kryepiskopin Anastas për mikpritjen e ngrohtë.
