Gëzimi i festës së Lindjes së Krishtit filloi të mbushë ambientin e Qendrës Studentore të Kishës orthodhokse që prej fillimit të dhjetorit. Dritat e shumta që ndriçonin Qendrën shpërndanin qetësisht lajmin më të bukur në botë, që së shpejti Drita e botës do të lindë në shpellë të errët. Ditët pasojnë njëra tjetrën dhe ja, të enjten, më 17 Dhjetor 2009, Qendra Studentore do të organizonte një takim të veçantë me rastin e Lindjes së Shpëtimtarit të botës. Kjo ditë nisi me një bekim të veçantë. Nikolla, një anëtar i rregullt i Qendrës Studentore, paraditen e së enjtes, u bë anëtar i Kishës sonë. Pagëzimi u krye nga atë Viktor Bërdufi, në Kishën e Ungjillëzimit, Tiranë. Së bashku me të afërmit e tij në gëzim merrnin pjesë dhe miqtë e tij studentë. Ndërsa pasditja e së enjtes, do të mblidhte së bashku rreth 70 studentë për të medituar mbi përgatitjen e ardhjes së Shpëtimtarit. Meditimi përmbante shpjegime mbi kuptimin e festës së Krishtlindjes, këngë dhe himne të ndryshme, dhe përgjigje të rëndësishme për pyetjen se çfarë do t’i dhurojmë ne Krishtit që po vjen të lindë në shpellën e ftohtë të Betlehemit.
Pas meditimit, Luranti i veshur me “kostumin” tradicional, u shpjegoi studentëve historinë e shenjtorit dhe pse ndajmë dhurata këto ditë festive. Ky meditim u mbyll në tingujt e urimit “Gëzuar Krishtlindjet”. Ai i dha çdo studenti nga një dhuratë për Krishtlindje, e cila përmbante librin “Mesazhe Hyjnore”, Kalendarin e vogël të vitit 2010, një komboskin dhe nga një ikonë shenjtori. Me kuptim më të thellë për këtë të kremte të madhe studentët u larguan nga Qendra studentore duke iu uruar secilit: “Krishtlindje të bekuara”.
Ana Baba
 |
 |
 |
 |
