Duke ndarë dhimbjen me vëllezërit në nevojë
|
|
Disa ditë pas tragjedisë së Gërdecit, një përfaqësi nga Akademia Teologjike “Ngjallja e Krishtit” pranë Manastirit të Hirshëm të Shën Vlashit në Durrës, dhe nga Komunitetit Orthodhoks i kishave të Durrësit dhe të Kavajës, të kryesuar nga Episkop Nikolla, Atë Spiro Tola, Dhjakon Spiro Kostoli dhe një grup studentësh, realizoi shpërndarjen e disa ndihmave materiale tek banorët e dëmtuar në fshatin Marikaj. Ndihmat u ofruan nga të ardhurat e mbledhura prej studentëve, pedagogëve dhe punonjësve të Akademisë Teologjike si edhe të shumë besimtarëve orthodhoks të qyteteve fqinj. |
|
Më 26 mars, kjo përfaqësi u takua në Bashkinë e Vorës me kryetarin z. Fiqeri Ismaili dhe nënkryetarin z. Aqif Muça. Ata shprehën falënderimet e tyre për mbështetjen dhe ndihmën që u dha nga ana e Komunitetit Orthodhoks. Ndër të tjera kryetari i Bashkisë Z. Fiqeri Ismaili theksoi: “Për vetë vendin ku ndodhi tragjedia ishte një pikë strategjike, ishte vërtet një mrekulli që përmasat nuk ishin shumë të mëdha dhe numri i viktimave do kishte qenë shumë më i madh. Nëse Zoti bën mrekulli kjo është një prej tyre”. |
|
|
|
Ndihmësdrejtori i Akademisë Teologjike, Hirësi Nikolla shprehu mbështetjen e Kishës sonë dhe të Kryepiskopit Anastas për të lënduarit në këtë katastrofë. “Kisha Orthodhokse mendoi për lehtësimin e dhimbjes dhe të plagëve të banorëve të dëmtuar nga kjo tragjedi duke e bërë këtë gjë realitet me lutjen dhe ndihmën materiale që Ajo ofroi për familjet e dëmtuara”. |
|
Kjo përfaqësi, së bashku me studentët e Akademisë Teologjike, e shoqëruar nga kryeplaku z. Fiqeri Subashi, bëri shpërndarjen e 160 pakove me ndihma nëpër shtëpitë e banorëve të fshatit Marikaj. Banorët shprehën mirënjohjen duke theksuar se kjo ishte ndihma e parë që iu ishte ofruar atyre. |
|
|
Ndihma ndaj të dëmtuarve është bërë evidente çdo ditë. Akademia Teologjike dërgon çdo pasdite katër studentë për të qëndruar pranë fëmijëve dhe të rinjve me veprimtari të ndryshme kulturore e argëtuese. Gjithashtu Kisha jonë Orthodhokse ka atashuar një person që qëndron gjatë gjithë kohës në ambientet e Shtëpisë së Pushimit të Ministrisë së Brendshme (Kovaleshencës) në Durrës, duke iu përgjigjur çdo kërkese dhe nevoje imediate nga familjarët e shumtë që ndodhen aty përkohësisht.
|
|
|
Nestilda Dangaj |
|
