Bashkë me stinën e bukur të verës dhe përfundimin e mësimeve shkollore, fëmijët pritën me padurim kampin “Rilindja” që organizon çdo vit në këtë sezon Kisha Orthodhokse e Shqipërisë. Ky kamp ndryshe nga vitet e tjera nuk u zhvillua në manastirin e Zvërnecit, por në manastirin e Shën Vlashit, në Durrës, dhe ishte përshtatur për moshat 11-14 vjeç. Kampi filloi në datën 26 qershor dhe përfundoi në 6 korrik. Në të morën pjesë rreth 130 fëmijë nga i gjithë vendi. Programi ishte rregulluar aq bukur që fëmijët të pushonin, të argëtoheshin, të njiheshin e të miqësoheshin me njeri-tjetrin, të mësonin dhe zhvillonin më shumë përjetimin e tyre rreth besimit të krishterë orthodhoks.
Tema e kampit të sivjetshëm ishte: “Lumërimet”, fragment nga predikimi në mal i Jisu Krishtit, temë që referohej vazhdimisht me shembuj praktikë nga jeta e përditshme dhe fëminore. Çdo ditë zhvilloheshin shërbesa kishtare si dhe tema shpirtërore që referoheshin nga katekistët që ishin drejtues grupesh ose nga klerikë e teologë të ftuar.
Programi niste me shërbesën e Mëngjesores duke u pasuar me ngrënien e mëngjesit, vjatjen në plazh, drekën, kohën e pushimit dhe më pas me aktivitetet argëtuese e sportive. Pasdite vazhdonte me ngrënien e zemrës (një ëmbëlsirë/ fruta) e më pas me bisedat shpirtërore, gjatë të cilave fëmijët bënin shumë pyetje për të mësuar edhe më shumë rreth besimit të krishterë orthodhoks. Në këtë kamp pati edhe bekime të veçanta, ndër të cilat vlen të përmendim pagëzimin e 28 fëmijëve katikumenë, të cilët u bënë edhe ata anëtarë të Kishës.
Gjithashtu një gëzim i veçantë për ta ishte takimi me Kryepiskopin Anastas, i cili kujdeset për mbarëvajtjen e kampeve dhe krijimin e kushteve të mira në to. Në një drekë me Kryepiskopin ata prezantuan një program me këngë të krishtera dhe recitime, duke e falënderuar atë për këtë dhuratë të bukur që iu bën çdo verë. Nga ana e tij, Kryepiskopi iu premtoi fëmijëve se edhe në të ardhmen Kisha do të qëndrojë gjithmonë pranë tyre, duke iu kërkuar në të njëjtën kohë të jenë aktivë në jetën kishtare dhe në të gjitha veprimtaritë që organizon Kisha Orthodhokse për të njohur edhe më shumë Krishtin dhe për të jetuar brenda miqësisë së krishterë. Dita e fundit e kampit ishte 6 korriku. Të gjithë fëmijët u larguan nga kampi me mbresat më të mira për t’u rikthyer sërish vitin tjetër.
