Në një atmosferë të mbushur me solemnitet dhe gëzim shpirtëror, në katedralen “Ngjallja e Krishtit” në Tiranë u kremtua sot Liturgjia Hyjnore, në prani të Fortlumturisë së Tij, Kryepiskopit të Tiranës, Durrësit dhe gjithë Shqipërisë, imzot Joanit. Të shumtë ishin besimtarët që u mblodhën për të marrë pjesë në këtë shërbesë të veçantë, e cila u shoqërua me një predikim të thellë dhe frymëzues të Kryepiskopit.
Në fjalën e tij, Kryepiskopi Joan u ndal te jeta dhe misioni i Apostull Andreas, një prej figurave të para të krishtërimit dhe pararendës i ungjillëzimit në shumë vende të botës së lashtë. Ai theksoi se jetët e shenjtorëve nuk janë thjesht biografi, por dëshmi të prekshme të veprës së Shpirtit të Shenjtë.
“Këta njerëz ishin të shenjtëruar. Duke i kujtuar jetët e tyre, ne mund të ndjejmë fuqinë e Shpirtit të Shenjtë dhe të kuptojmë se si Zoti vepron përmes atyre që jetojnë me besim dhe përkushtim,” u shpreh imzot Joani.
Shembulli i Shën Andreas: guxim, predikim dhe martirizim
Gjatë predikimit, Kryepiskopi solli para besimtarëve rrugëtimin e Apostull Andreas, i cili, si dëshmitar i kryqëzimit dhe ngjalljes së Krishtit, udhëtoi “deri në viset e Ukrainës së sotme”, duke përhapur lajmin e shpëtimit. Jo gjithkund u mirëprit. Në një qytet të Azisë së Vogël ai u rrah dhe u përndoq, por ai nuk ndaloi së predikuari.
Në Patra, ku ai dha dëshminë e tij të fundit, predikimi i tij ndikoi në kthimin e shumë paganëve në të krishterë. Ky sukses shpirtëror solli edhe armiqësi nga autoritetet pagane të kohës, të cilët e dënuan me vdekje. “Shën Andrea u kryqëzua në kryq ashtu si vëllai i tij, Shën Pjetri,” kujtoi Kryepiskopi Joan, duke nënvizuar forcën e besimit të apostullit, i cili edhe përpara kryqit nuk e humbi guximin dhe dashurinë për Krishtin.
“Pse i përmendim jetët e shenjtorëve?”
Duke iu drejtuar besimtarëve, imzot Joani theksoi arsyen e vërtetë të nderimit të shenjtorëve:
“Ne i kujtojmë jetët e shenjtorëve që t’i imitojmë. Si ata, edhe ne jemi të thirrur ta përhapim lajmin e mirë, sepse bota ka nevojë për këtë mesazh, ka nevojë për këto vlera.”
Ai shtoi se e keqja mund të mposhtet vetëm përmes dritës së Ungjillit, ashtu siç bënë apostujt që e shpallën Krishtin me fuqinë e së vërtetës dhe dashurisë.
Lipsani i Shën Andreas dhe trashëgimia e tij
Në kujtesën historike të Kishës, Kryepiskopi përmendi edhe lëvizjen e lipsanit të shenjtorit, i cili u mor fillimisht nga Patra në Konstandinopojë dhe më pas u nda në vende të ndryshme të botës së krishterë, duke u bërë burim frymëzimi dhe bekimi për breza të tërë besimtarësh.
Liturgjia e së dielës në katedralen “Ngjallja e Krishtit” u mbyll me lutje dhe bekimin nga Kryepiskopi Joan për gjithë popullin shpresëtar, ndërsa besimtarët u larguan me mesazhin e qartë të ditës: Të jetojmë me dritën e Ungjillit dhe të bëhemi bartës të lajmit të mirë, ashtu si Shën Andrea dhe Apostujt e tjerë.
Në këtë mënyrë, dita e sotme shërbeu si një rikujtesë e gjallë e thirrjes për gjithësecilin prej nesh: për besim, guxim dhe dëshmi në çdo rrethanë të jetës.
Në mbyllje të Shërbesave Atë Spiro Topanxha njoftoi besimtarët se në datat 5–6 dhjetor në Tiranë do të zhvillohet Konferenca e Parë Shkencore Ndërkombëtare “Shqipëria në periudhën bizantine”, e organizuar nga KOASH në bashkëpunim me institucione të tjera akademike. Hapja bëhet të premten, ora 10:00, në Hotel Tirana, ku Kryepiskopi Imzot Joan do të mbajë fjalën kryesore në këtë aktivitet për rolin e Kishës në hapësirën shqiptare nga Iliriku në Bizant e deri sot.
Seancat e ditës së dytë zhvillohen në Akademinë e Shkencave.
Paralelisht do të ketë dy aktivitete të hapura për besimtarët: të premten në 19:00 në Arkivin Qendror hapet ekspozita e kodikëve bizantinë dhe pasbizantinë; të shtunën në 19:00 në Katedralen “Ngjallja e Krishtit” jepet koncert premierë i muzikës bizantine me vepra të Shën Joan Kukuzelit.
Besimtarët janë të ftuar të marrin pjesë në këto ngjarje shpirtërore dhe kulturore.
Media Ngjallja 30 Nëntor 2025
Shënim: Burimi: Radio Ngjallja. Lidhja origjinale: Radio Ngjallja.
#RadioNgjallja #Lajme #KishaOrthodhokse