Kisha Orthodhokse
me studentë e vizitorë të ardhur nga Amerika
E Diela e Etërve të Sinodit I Ekumenik mblodhi në Kishën e Ungjillëzimit të Hyjlindëses Mari, në Tiranë, 90 të rinj nga Berati, Fieri, Tirana, Durrësi dhe Qendra Studentore e Kishës sonë në një takim ditor rinor organizuar nga Zyra Rinore e Kryepiskopatës në bashkëpunim me Qendrën Studentore në Tiranë dhe Zyrën Rinore të Mitropolisë së Beratit.
Pas Liturgjisë Hyjnore, të rinjtë vazhduan programin dhe aktivitetet e tyre në Qendrën “Thavor” ku u bashkuan me grupin e studentëve të ardhur nga Amerika, grup ky i drejtuar nga atë Luka Veronis, i cili ka shërbyer në Kishën tonë si misionar, për më shumë se 10 vjet.
Pas drekës vijoi referati “T’ia përkushtojmë jetën tonë Krishtit” drejtuar nga vetë atë Luka. Ai e filloi referatin e tij me historinë e një djali që kishte jetuar për shumë kohë i varur nga droga dhe gjithmonë i shoqëruar nga njerëz që e nxitnin në këtë rrugë. Pasi njohu besimin, Zoti filloi të transformonte jetën e tij dhe tashmë ai shërben si ndihmës gjatë shërbesave adhuruese në kishë. Përpjekja e tij vazhdon ende, dhe ai lufton çdo ditë e më tepër që të ndjekë porositë e Zotit e të jetojë gëzimin e jetës me Të.
“ Zoti zbulon të bukurën që është brenda çdo njeriu dhe na trajton me dinjitet. Edhe pse bëjmë gabime, mëkate dhe ligësi të ndryshme, dashuria e tij e transformon jetën tonë. Jeta me Zotin është udhëtim i pafund, i cili kërkon prej nesh përpjekje dhe disiplinë të vazhdueshme. Nuk duhet të qëndrojmë në vend, por duhet të rritemi çdo ditë e më tepër më Zotin ”.
Atë Luka e mbylli bisedën e tij, duke u shpjeguar të gjithë të rinjve pjesëmarrës 10 hapa konkrete që na ndihmojnënë udhëtimin tonë drejt Zotit:
1. Përqendrohu në gjërat themelore: Bëje lutjen, agjërimin dhe lëmoshën pjesë të rregullt të jetës sate.
2. Studio dhe rriti vazhdimisht njohuritë e tua për besimin.
3. Gjej shoqëri të krishterë, që do të të mbështesë në besimin tënd.
4. Merr pjesë në jetën e Mistereve të Kishës – kryesisht në Kungimin dhe Rrëfimin e Shenjtë.
5. Shërbeju përditë të tjerëve.
6. Tregoju të tjerëve për besimin tënd.
7. Ruaje dhe mbroje zemrën dhe mendjen tënde.
8. Mëso nga çdo sfidë dhe vështirësi e jetës.
9. Kujto gjithmonë gjënë më të rëndësishme në jetë.
10. Asnjëherë mos u kënaq me arritjet e jetës tënde shpirtërore, por kërko ripërtëritje të vazhdueshme.
Programi vazhdoi me takimin në grupe të vogla, të cilët u drejtuan nga të rinjtë tanë në bashkëpunim me studentët nga Amerika. Të rinjtë diskutuan se si po ecin në jetën shpirtërore dhe si do t’i praktikojnë 10 hapat e lartpërmendura në jetën tonë të përditshme. Gjithashtu, të rinjtë ndanë me njeri-tjetrin edhe vështirësitë që hasin në ambientet ku jetojnë, shkollë, familje etj, të cilët nuk i mbështetin në jetën e krishterë.
Lutja e Tipikosë mbylli këtë takim rinor, i cili shërbeu si frymëzim dhe ripërtëritje për të gjithë të rinjtë pjesëmarrës. Ashtu si psalmisti edhe ne përjetuam vargun “sa mirë kur bijtë banojnë bashkë”.
Ana Baba
Arkiv historik i faqes së vjetër. Burimi: OldWebpage/Shqip/Shtypi & Publikimet/Year2011/takimirinor.htm