Në qendrën shpirtërore-arsimore “Thavor” të Kishës sonë, që ngrihet madhështore në një pjesë periferike të kryeqytetit, pranë Malit të Dajtit, u zhvillua më 20 dhjetor koncerti festiv me rastin e Krishtlindjes dhe Vitit të Ri nga nxënësit e shkollës 9-vjeçare shqiptaro-amerikane “Protagonistët”. Prindër, mësues dhe të ftuar morën pjesë në programin që zgjati rreth dy orë.
Skena e koncertit interpretonte në mënyrë figurative gëzimin e kësaj feste. Ikona e Krishtlindjes me Krishtin në qendër, yjet dhe magët, barinjtë rreth grazhdit, shoqëroheshin nga fytyrat engjëllore të fëmijëve. Mes tyre ishte i ftuar edhe Kryepiskopi Anastas, i cili ndoqi me dashuri këngët, recitimet dhe urimet e fëmijëve.
Nxënësit kishin përgatitur nga secila klasë një program të veçantë, duke sjellë mes emocioneve para të pranishmëve gëzim dhe shumë buzëqeshje.
Në fund të aktivitetit, Kryepiskopi Anastas i takoi fëmijët dhe u shpërndau lule, në shenjë dashurie dhe përulësie ndaj krijesave të shumëdashura të Perëndisë. Vetë Krishti iu tha dishepujve se për të fituar Mbretërinë e Perëndisë duhet të imitojmë këta fëmijë, në shembullin e pastërtisë së tyre dhe paqes që ata rrezatojnë.
Në fund të koncertit festiv, për të gjithë të ftuarit ishte përgatitur një kokteil.
Isidor Koti
Arkiv historik i faqes së vjetër. Burimi: OldWebpage/Shqip/Shtypi & Publikimet/christmas06/protag06.htm