Ka dalë në qarkullim libri për fëmijë “Bibla për fëmijë” me autor Zoi Kanava, ilustrimet, Kristo Gusidhi dhe përkthyes, Thoma Qendro.
Ky është një libër me tregime nga Shkrimi i Shenjtë dhe ka për qëllim zbatimin e kësaj porosie të Zotit: “Lërini fëmijët të vijnë tek unë, dhe mos i ndalni; sepse e këtillëve është mbretëria e Perëndisë” (Mk. 10:14).
Libri përmban 17 tregime me temë nga Dhiata e Vjetër dhe 23 me temë nga Dhiata e Re, nëpërmjet të cilave lexuesi i vogël njihet me tërë ecurinë e ngjarjeve që nga krijimi i botës nga Perëndia, me kryerjen e mëkatit të parë nga dy njerëzit e parë të krijuar prej Tij, Adamit dhe Evës, të cilët duke mos dëgjuar fjalën e Perëndisë humbën parajsën, si dhe me ngjarje të tjera. Ai njihet gjithashtu edhe me shpirtmadhësinë e pakufi të Perëndisë, që i do aq shumë njerëzit, sa për shpëtimin e tyre dërgoi në botë Birin e Tij të vetëmlindur, Jisu Krishtin, i cili për këtë qëllim u sakrifikua në kryq dhe u ngjall të tretën ditë sipas Shkrimeve dhe u ngjit në qiell tek Perëndia – Atë.
Jetën, veprën dhe mësimin e Tij, besimin tek Ai, Krishterimin, i përhapën nëpër botë nxënësit e Tij, siç i porositi vetë Zoti.
Ky libër është shkruar me një gjuhë të thjeshtë e të kuptueshme, i konceptuar për fëmijët e moshave 5-11 vjeç.
Libri u botua nga Shtëpia Botuese “Akritas”, me botues z. Dh. Koqino.
Këtë botim të ri të Kishës sonë, mund ta gjeni pranë kishave dhe grupeve të katekizmit.