Kisha Orthodhokse
Në datën 26 dhjetor veç atmosferës së bukur të krijuar nga festa e Krishtlindjeve, të rinjtë orthodhoksë nga të 4 dioqezat e vendit morën pjesë në Festivalin Kombëtar të Rinisë Orthodhokse të organizuar nga Zyra Qendrore e Rinisë, nën kujdesin e Kryepiskopit të Tiranës, Durrësit dhe gjithë Shqipërisë Imzot Anastasit.
Në këtë aktivitet, që u zhvillua në sallën pranë kishës së Ungjillëzimit, në Tiranë, grupet u prezantuan me këngë, valle tradicionale, këngë popullore me motive nga vendet prej të cilat vinin, si dhe me krijimtari të reja.
Ishin të pranishëm Kryepiskopi Anastas, mitropoliti i Beratit Imzot Ignati, episkopët ndihmës të Kryepiskopit Hirësia Nikolla dhe Hirësi Andoni, klerikë, të rinj dhe besimtarë nga zona të ndryshme të Shqipërisë.
Entuziazmi rinor nuk mungoi për asnjë çast gjatë gjithë këtij aktiviteti.
Vendin e parë e mori grupi i Liceut Kishtar “Kryqi i nderuar” të Sukthit, por ashtu siç tha edhe kryetari i jurisë prof. Milto Vako të gjithë ishin fitues në këtë festival.
Në fund përshëndeti kryebari i Kishës Fortlumturia e Tij Imzot Anastasi ku ndër të tjera rikujtoi edhe një herë të rinjtë për 4 shtyllat, në të cilat duhet të mbështetet rinia orthodhokse: 1. Studimi, rritja në dije me Krishtin 2. Miqësia 3. Dëshmia 4. Shërbimi.
Festivali Kombëtar i Rinisë është një aktivitet që zhvillohet çdo vit në Tiranë duke u dhënë kështu mundësi të rinjve të afrohen dhe të njihen me njeri tjetrin në emër të Krishtit dhe të shfaqin talentet e tyre artistike.
Joan Meni
Foto: Nektar Pashko
Arkiv historik i faqes së vjetër. Burimi: OldWebpage/Shqip/Shtypi & Publikimet/Year2010/festivalrinise.htm