"Ai q\u00eb ka m\u00ebshir\u00eb p\u00ebr t\u00eb varfrin i jep hua Zotit,
i Cili do t'ia kthej\u00eb ato q\u00eb i ka dh\u00ebn\u00eb". (Fjal\u00ebt e Urta 19:17)
Me bekimin e Mitropolitit t\u00eb Apollonis\u00eb dhe Fierit, Hir\u00ebsis\u00eb s\u00eb Tij, Imzot Nikoll\u00ebs, dhe me ndihm\u00ebn e katekist\u00ebve, sipas porosis\u00eb s\u00eb Zotit p\u00ebr t\u00eb dashur dhe p\u00ebr t\u00eb mbajtur barrat e nj\u00ebri-tjetrit, grupet e katekizmit t\u00eb Mitropolis\u00eb son\u00eb u organizuan p\u00ebr t\u00eb ndihmuar familje me nevoja ekonomike n\u00eb fshatrat e tyre. Ndodh zakonisht q\u00eb kur d\u00ebgjojm\u00eb q\u00eb nj\u00eb njeri \u00ebsht\u00eb n\u00eb gjendje t\u00eb mjerueshme, t\u00eb z\u00ebn\u00eb n\u00eb rutin\u00ebn ton\u00eb, q\u00ebndrojm\u00eb indiferent dhe nuk b\u00ebjm\u00eb hapa p\u00ebr ta ndihmuar sadopak, duke menduar q\u00eb duhet t\u00eb shikojm\u00eb vet\u00ebm brenda familjes son\u00eb. Pik\u00ebrisht p\u00ebr t\u00eb m\u00ebsuar q\u00eb ne t\u00eb krishter\u00ebt orthodhoks\u00eb nuk mund t\u00eb jemi indiferent ndaj nj\u00ebri-tjetrit, por edhe ndaj atij q\u00eb nuk i p\u00ebrket enoris\u00eb son\u00eb, nd\u00ebrmor\u00ebm k\u00ebt\u00eb nism\u00eb. Grupet e grave dhe f\u00ebmij\u00ebve t\u00eb Verris\u00eb, Pojanit, Agimit, Metaj, Libofsh\u00ebs u treguan edhe k\u00ebt\u00eb her\u00eb t\u00eb gatsh\u00ebm p\u00ebr t\u00eb ndihmuar disa familje t\u00eb cilat nuk jan\u00eb pjes\u00eb e grupit t\u00eb katekizmit, por q\u00eb jan\u00eb n\u00eb gjendje t\u00eb mjerueshme ekonomike.\u00a0
Sa g\u00ebzim t\u00eb shoh\u00ebsh f\u00ebmij\u00eb, t\u00eb rinj, gra dhe burra t\u00eb cil\u00ebt me aq mund\u00ebsi sa kan\u00eb, pavar\u00ebsisht se mund t\u00eb jen\u00eb edhe ata vet\u00eb n\u00eb v\u00ebshtir\u00ebsi ekonomike, t\u00eb sillnin di\u00e7ka nga sht\u00ebpit\u00eb e tyre p\u00ebr k\u00ebto familje. Pasanik i v\u00ebrtet\u00eb \u00ebsht\u00eb vet\u00ebm njeriu shpirt\u00ebror i cili edhe at\u00eb q\u00eb ka e ndan me tjetrin, sepse ai mbledh thesare n\u00eb qiell. Le t\u00eb zbatojm\u00eb porosit\u00eb e Zotit: "Mos mblidhni p\u00ebr vete thesare mbi tok\u00eb, ku i brejn\u00eb tenja dhe ndryshku, dhe ku vjedh\u00ebsit shp\u00ebrthejn\u00eb dhe vjedhin, p\u00ebrkundrazi mblidhni p\u00ebr vete thesare n\u00eb qiell, ku as tenja as ndryshku nuk prishin dhe ku vjedh\u00ebsit nuk shp\u00ebrthejn\u00eb dhe nuk vjedhin". (Mattheu 6:19-20)\u00a0
Bamir\u00ebsia nuk na varf\u00ebron, p\u00ebrkundrazi na pasuron shpirtin dhe na mbush duart me vepra t\u00eb mira p\u00ebrpara Per\u00ebndis\u00eb! Gjithashtu me k\u00ebto grupe, p\u00ebrve\u00e7 ndihmave ushqimore, zhvilluam disa vizita baritore n\u00eb sht\u00ebpit\u00eb e t\u00eb moshuarve t\u00eb cil\u00ebt edhe pse kan\u00eb t\u00eb mira materiale kan\u00eb ngelur vet\u00ebm. Emigracioni i theksuar ka ndikuar shum\u00eb n\u00eb k\u00ebto zona dhe sht\u00ebpit\u00eb jan\u00eb pothuajse vet\u00ebm me t\u00eb moshuar. Bamir\u00ebsi nuk do t\u00eb thot\u00eb vet\u00ebm t\u00eb fal\u00ebsh t\u00eb mira materiale, por edhe t\u00eb themi fjal\u00eb t\u00eb mira, t\u00eb japim k\u00ebshilla shpirt\u00ebrore, t\u00eb jemi af\u00ebr t\u00eb vetmuarve dhe t\u00eb vejave. Kjo vep\u00ebr \u00ebsht\u00eb e mir\u00eb p\u00ebrpara syve t\u00eb Zotit.\u00a0
Fal\u00ebnderojm\u00eb p\u00ebrzem\u00ebrsisht dhe lutemi p\u00ebr t\u00eb gjith\u00eb ata q\u00eb u b\u00ebn pjes\u00eb e k\u00ebsaj nisme! Le t\u00eb presim me g\u00ebzim Lindjen e Shp\u00ebtimtarit!
Ingrida Bida
MEDIA NGJALLJA, 16.12.2025<\/p>\n