Lutja, fjala q\u00eb ngjitet drejt Qiellit me p\u00ebrul\u00ebsi
N\u00eb nj\u00eb nga intervistat javore t\u00eb zhvilluara n\u00eb studion e Radios \u201cNgjallja\u201d, Miron \u00c7ako, p\u00ebrgjegj\u00ebs i Zyr\u00ebs s\u00eb Katekizmit pran\u00eb Kryepiskopat\u00ebs Orthodhokse, u ndal gjer\u00ebsisht te kuptimi i lutjes dhe m\u00ebnyra e drejt\u00eb se si besimtari duhet t\u2019i afrohet Zotit.
Sipas tij, lutja nuk \u00ebsht\u00eb thjesht nj\u00eb list\u00eb k\u00ebrkesash apo nj\u00eb p\u00ebrpjekje p\u00ebr t\u2019i imponuar Per\u00ebndis\u00eb d\u00ebshirat tona personale. Ajo \u00ebsht\u00eb nj\u00eb dialog i gjall\u00eb dhe nj\u00eb sinergji e vazhdueshme mes njeriut dhe Zotit, ku njeriu m\u00ebson t\u00eb dor\u00ebzohet, t\u00eb fal\u00ebnderoj\u00eb, t\u00eb pendohet dhe t\u00eb besoj\u00eb.
Miron \u00c7ako theksoi se lutja e krishter\u00eb ka nj\u00eb rend t\u00eb qart\u00eb shpirt\u00ebror, i cili pasqyrohet edhe n\u00eb lutjen liturgjike t\u00eb Kish\u00ebs.
Hapi i par\u00eb i lutjes \u00ebsht\u00eb adhurimi. Besimtari i drejtohet Zotit me lavdi dhe n\u00ebnshtrim t\u00eb plot\u00eb, duke pranuar se adhurimi i p\u00ebrket vet\u00ebm Atij. Ky moment \u00ebsht\u00eb nj\u00eb akt i thell\u00eb p\u00ebrul\u00ebsie, ku njeriu vendos Zotin n\u00eb qend\u00ebr dhe jo veten. Fjal\u00eb si \u201cLavdi Per\u00ebndis\u00eb n\u00eb vendet m\u00eb t\u00eb larta\u201d shprehin pik\u00ebrisht k\u00ebt\u00eb q\u00ebndrim themelor t\u00eb shpirtit.
M\u00eb pas vjen fal\u00ebnderimi. Besimtari fal\u00ebnderon Zotin p\u00ebr \u00e7do t\u00eb mir\u00eb q\u00eb merr, nga dhuratat m\u00eb t\u00eb vogla t\u00eb p\u00ebrditshme \u2013 drita e m\u00ebngjesit, ajri, natyra \u2013 deri te bekimet m\u00eb t\u00eb m\u00ebdha t\u00eb jet\u00ebs. Fal\u00ebnderimi e ndihmon njeriun t\u00eb kuptoj\u00eb se gjith\u00e7ka e mir\u00eb ka burimin te Krijuesi dhe se asgj\u00eb nuk \u00ebsht\u00eb e vet\u00ebkuptueshme.
Hapi i tret\u00eb \u00ebsht\u00eb pendimi. Duke qen\u00eb se njeriu jeton n\u00eb nj\u00eb bot\u00eb t\u00eb prekur nga m\u00ebkati dhe \u00ebsht\u00eb vet\u00eb i brisht\u00eb shpirt\u00ebrisht, ai thirret t\u00eb k\u00ebrkoj\u00eb falje p\u00ebr m\u00ebkatet e kryera me mendime, fjal\u00eb dhe vepra. Pendimi nuk \u00ebsht\u00eb thjesht nj\u00eb ndjenj\u00eb faji, por nj\u00eb kthes\u00eb e brendshme drejt Zotit, nj\u00eb d\u00ebshir\u00eb p\u00ebr sh\u00ebrim dhe pastrim shpirt\u00ebror.
Vet\u00ebm pas k\u00ebtyre tre hapave vijn\u00eb k\u00ebrkesat personale. Miron \u00c7ako theksoi se k\u00ebto k\u00ebrkesa nuk duhet t\u00eb jen\u00eb kurr\u00eb imponuese apo urdh\u00ebruese ndaj Zotit. Ato duhet t\u00eb shoq\u00ebrohen gjithmon\u00eb me dor\u00ebzim dhe besim, duke p\u00ebrfunduar me fjal\u00ebt: \u201cU b\u00ebft\u00eb vullneti Yt\u201d. Ky q\u00ebndrim tregon pranimin se Zoti e di m\u00eb mir\u00eb se \u00e7far\u00eb \u00ebsht\u00eb e dobishme p\u00ebr shpirtin e njeriut.
N\u00eb k\u00ebt\u00eb kontekst, ai p\u00ebrmendi edhe shembullin e nj\u00eb shenjti, i cili tregonte se sa her\u00eb q\u00eb arrinte t\u2019ia \u201cimpononte\u201d nj\u00eb k\u00ebrkes\u00eb Zotit, m\u00eb von\u00eb pendohej, sepse rezultati nuk ishte ai q\u00eb i sh\u00ebrbente v\u00ebrtet shp\u00ebtimit dhe paqes s\u00eb tij shpirt\u00ebrore. Ky shembull sh\u00ebrben si paralajm\u00ebrim se jo \u00e7do gj\u00eb q\u00eb d\u00ebshirojm\u00eb \u00ebsht\u00eb domosdoshm\u00ebrisht e mir\u00eb p\u00ebr ne.
Kjo m\u00ebnyr\u00eb lutjeje ndjek drejtp\u00ebrdrejt modelin e m\u00ebsuar nga vet\u00eb Jisu Krishti, i cili na fton t\u00eb k\u00ebrkojm\u00eb me besim, por edhe me bindjen se vullneti i Atit Qiellor \u00ebsht\u00eb gjithmon\u00eb m\u00eb i larti dhe m\u00eb i dobishmi. Zoti respekton lirin\u00eb njer\u00ebzore dhe pret q\u00eb njeriu t\u2019i drejtohet Atij me lutje, por p\u00ebrgjigjja e Tij p\u00ebrfundimtare \u00ebsht\u00eb ajo q\u00eb i sh\u00ebrben v\u00ebrtet shp\u00ebtimit t\u00eb shpirtit.
N\u00eb p\u00ebrfundim, Miron \u00c7ako theksoi se lutja nuk ka p\u00ebr q\u00ebllim ta detyroj\u00eb Zotin t\u00eb veproj\u00eb sipas d\u00ebshirave tona, por t\u00eb na ndryshoj\u00eb ne vet\u00eb, duke na m\u00ebsuar t\u00eb besojm\u00eb, t\u00eb p\u00ebrulemi dhe t\u2019i l\u00ebm\u00eb gjithmon\u00eb Zotit \u201ct\u00eb drejt\u00ebn e vet\u00ebveprimit\u201d. Pik\u00ebrisht kjo e b\u00ebn lutjen nj\u00eb p\u00ebrvoj\u00eb t\u00eb gjall\u00eb, transformuese dhe thelb\u00ebsore p\u00ebr jet\u00ebn shpirt\u00ebrore t\u00eb besimtarit.
NGA JOANA MOLLA\u00a0
MEDIA NGJALLJA, 27 JANAR 2026<\/p>\n