#Deklarat\u00eb p\u00ebr shtyp\u00a0
Komunitetet fetare n\u00eb Shqip\u00ebri vler\u00ebsojn\u00eb r\u00ebnd\u00ebsin\u00eb e barazis\u00eb n\u00eb p\u00ebrfshirjen sociale dhe n\u00eb mosdiskriminim, sepse kjo pasqyron barazin\u00eb e dinjitetit, q\u00eb t\u00eb gjith\u00eb njer\u00ebzit kan\u00eb p\u00ebrpara Zotit.
Nisur nga k\u00ebto parime dhe bazuar n\u00eb t\u00eb drejtat e tij statutore, K\u00ebshilli Nd\u00ebrfetar i Shqip\u00ebris\u00eb, i p\u00ebrb\u00ebr\u00eb nga pes\u00eb komunitetet fetare (Komuniteti Mysliman i Shqip\u00ebris\u00eb, Kisha Orthodhokse Autoqefale e Shqip\u00ebris\u00eb, Kisha Katolike n\u00eb Shqip\u00ebri, Kryegjyshata Bot\u00ebrore Bektashiane, V\u00ebllaz\u00ebria Ungjillore e Shqip\u00ebris\u00eb), pasi u njoh me projektligjin \u201cP\u00ebr barazin\u00eb gjinore\u201d, mblodhi sot m\u00eb 23 shtator 2025 Bordin e Presidenc\u00ebs, s\u00eb bashku me nj\u00eb grup pune t\u00eb miratuar nga pes\u00eb komunitetet fetare, t\u00eb p\u00ebrb\u00ebr\u00eb nga specialist\u00eb dhe ekspert\u00eb t\u00eb fushave t\u00eb ndryshme.
Krer\u00ebt dhe drejtuesit e t\u00eb gjitha komuniteteve fetare shpreh\u00ebn shqet\u00ebsimin e tyre p\u00ebr disa nene dhe p\u00ebrkufizime t\u00eb projektligjit, t\u00eb cilat bien n\u00eb kund\u00ebrshtim me parimet teologjike dhe tradit\u00ebn e familjes shqiptare. N\u00eb ve\u00e7anti, p\u00ebrkufizimi i termit \u201cgjini\u201d, si koncept gjith\u00ebp\u00ebrfshir\u00ebs, p\u00ebrdorimi i nocioneve, \u201cidentitet gjinor\u201d, \u201cshprehje gjinore\u201d, si dhe t\u00eb gjitha neneve t\u00eb tjera t\u00eb lidhura me to, krijojn\u00eb paqart\u00ebsi ligjore dhe hap\u00ebsira p\u00ebr keqinterpretim.
Ne, si komunitete fetare, theksojm\u00eb r\u00ebnd\u00ebsin\u00eb e familjes tradicionale t\u00eb bazuar mbi dy gjinit\u00eb biologjike: burr\u00eb dhe grua. P\u00ebr k\u00ebt\u00eb arsye, k\u00ebrkojm\u00eb sakt\u00ebsimin e p\u00ebrkufizimit t\u00eb termit \u201cGjini\u201d n\u00eb projektligj, duke e lidhur qart\u00eb me gjinin\u00eb e p\u00ebrcaktuar n\u00eb lindje \u2013 burr\u00eb, grua, vajz\u00eb, djal\u00eb \u2013 n\u00eb p\u00ebrputhje me parimet e barazis\u00eb dhe mosdiskriminimit.
Komunitetet fetare kan\u00eb mb\u00ebshtetur gjithmon\u00eb p\u00ebrpjekjet e Shqip\u00ebris\u00eb p\u00ebr p\u00ebrafrimin e legjislacionit me direktivat e Bashkimit Evropian. Njohja tradicionale e dy gjinive nuk p\u00ebrb\u00ebn penges\u00eb p\u00ebr k\u00ebt\u00eb proces \u2013 fakt q\u00eb reflektohet edhe n\u00eb praktikat e shumic\u00ebs s\u00eb shteteve an\u00ebtare t\u00eb BE-s\u00eb, t\u00eb cilat vazhdojn\u00eb t\u00eb p\u00ebrdorin nj\u00eb p\u00ebrkufizim binar burr\u00eb\u2013grua.
Me d\u00ebshir\u00ebn q\u00eb k\u00ebto shqet\u00ebsime t\u00eb merren n\u00eb konsiderat\u00eb nga institucionet p\u00ebrgjegj\u00ebse, riafirmojm\u00eb angazhimin ton\u00eb p\u00ebr dialog dhe bashk\u00ebpunim n\u00eb nd\u00ebrtimin e nj\u00eb shoq\u00ebrie t\u00eb drejt\u00eb, t\u00eb barabart\u00eb dhe t\u00eb sigurt p\u00ebr brezat e rinj, duke u mb\u00ebshtetur n\u00eb besimin te Zoti dhe respektin p\u00ebr ligjin.
Zoti e bekoft\u00eb Shqip\u00ebrin\u00eb dhe t\u00eb gjith\u00eb qytetar\u00ebt e saj!
Bordi i Presidenc\u00ebs s\u00eb K\u00ebshillit Nd\u00ebrfetar t\u00eb Shqip\u00ebris\u00eb
Haxhi Bujar Spahiu, Kryetar i Komunitetit Mysliman t\u00eb Shqip\u00ebris\u00eb
Fortlumturia e Tij, Joani, Kryepiskop i Kish\u00ebs Orthodhokse Autoqefale t\u00eb Shqip\u00ebris\u00eb
Imzot Gjergj Meta, Kryetar i Konferenc\u00ebs Ipeshkvnore t\u00eb Shqip\u00ebris\u00eb
Haxhi Dede Edmond Brahimaj, Kryegjysh Bot\u00ebror i Kryegjyshat\u00ebs Bektashiane
Pastor Ergest Biti, Kryetar i V\u00ebllaz\u00ebris\u00eb Ungjillore t\u00eb Shqip\u00ebris\u00eb
https:\/\/knfsh.al\/deklarate-per-shtyp-4\/ \u00a0
Date: 23.09.2025<\/p>\n