KISHA E \u201cSH\u00cbN M\u00cbRIS\u00cb\u201d,
LABOV\u00cb E KRYQIT, SHEK. X
Kisha e "Sh\u00ebn M\u00ebris\u00eb" (Fig.2) (Fig.3) \u00ebsht\u00eb n\u00eb mes t\u00eb fshatit Labov\u00eb. Sipas nj\u00eb mbishkrimi q\u00eb gjendet i shkruar rreth pjes\u00ebs s\u00eb poshtme t\u00eb timbanit t\u00eb kubes\u00eb, kisha mendohet se \u00ebsht\u00eb nd\u00ebrtuar n\u00eb vitin 551. Ktitor i kish\u00ebs ka qen\u00eb perandori bizantin, Justiniani I (527-565)[1]. K\u00ebt\u00eb e v\u00ebrteton mbishkrimi i shkruar rreth pjes\u00ebs s\u00eb poshtme t\u00eb timbanit t\u00eb kubes\u00eb s\u00eb kish\u00ebs: \u0395\u03c4\u03bf\u03c2 55\u03b1 \u03b7\u03c3\u03bf\u03b4\u03b7\u03bc\u03b1 \u03b7\u03b3\u03b5 \u0399\u03bf\u03c5\u03c3\u03c4\u03b9\u03bd\u03b9\u03b1\u03bd\u03bf\u03c5 \u03c4\u03bf\u03c5 \u03bc\u03b5\u03b3\u03b1\u03bb\u03bf\u03c5 \u03b2\u03b1\u03c3\u03b9\u03bb\u03b5\u03bf \u03b7\u03c0\u03b5\u03c1 \u03c3\u03b9\u03bd-\u03b4\u03c1\u03bf\u03bc\u03b7\u03c2 \u03b5\u03c0\u03b7\u03c4\u03c1\u03bf\u03c0\u03bf\u03c5 \u039a\u03bf\u03bd\u03c3\u03c4\u03b1\u03bd\u03c4\u03b9\u03bd\u03bf\u03c5 \u039b\u03b1\u03b4\u03bf\u03b2\u03bf\u03c5 \u03c4\u03b7\u03c2 \u03c7\u03bf\u03c1\u03b1\u03c2 \u03c4\u03b1\u03c5\u03c4\u03b7\u03c2 \u03b5\u03ba\u03c4\u03b9\u03c3\u03b8\u03b7 \u03bf \u03c0\u03b1\u03bd\u03c3\u03b5\u03c0\u03c4\u03bf\u03c2 \u03b8\u03b7\u03bf\u03c2 \u03bd\u03b1\u03bf\u03c2…(\u03c4\u03b7\u03c2 \u03c5\u03c0\u03b5\u03c1\u03b1\u03b3\u03af\u03b1\u03c2 \u0398\u03b5\u03bf\u03c4\u03cc\u03ba\u03bf\u03c5 \u03ba\u03b1\u03af) \u03b1\u03b7\u03c0\u03b1\u03c1\u03b8\u03b5\u03bd\u03bf\u03c5 \u039c\u03b1\u03c1\u03b9\u03b1\u03c2. 1806 \u039c\u03b1\u03c1\u03c4\u03b7\u03bf…..\u201cKy tempull i gjithnderuar dhe hyjnor i s\u00eb mbishenjt\u00ebs Hyjlind\u00ebse dhe gjithmon\u00eb virgj\u00ebresh\u00ebs Mari u nd\u00ebrtua (n\u00eb) vitin 551 me shpenzimet e Justinianit, mbretit t\u00eb madh dhe (u meremetua) me kontributin e epitrop Kostandinit t\u00eb k\u00ebtij katundi, Labov\u00eb (n\u00eb vitin) 1806, mars\u201d[2].\u00a0
Ky fakt p\u00ebrmendet edhe n\u00eb Kronik\u00ebn e Dropullit (\u03a4\u03bf \u03c7\u03c1\u03bf\u03bd\u03b9\u03ba\u03bf \u03c4\u03b7\u03c2 \u0394\u03c1\u03bf\u03c0\u03bf\u03bb\u03b7\u03c2)[3], e cila ka pasur disa botime. Kronika e Dropullit \u00ebsht\u00eb botuar s\u00eb pari n\u00eb vitin 1821 nga Puk\u00ebvili[4]; n\u00eb vitin 1871 \u00ebsht\u00eb botuar nga Athanasios Petridhi[5], m\u00eb 1906 nga Nikolaos Mistiakidhis[6] dhe n\u00eb vitin 1913 nga Dh. Evangjelidhis[7]. Justiniani i pati dhuruar kish\u00ebs s\u00eb Sh\u00ebn M\u00ebris\u00eb n\u00eb Labov\u00ebn e Kryqit dy mullinj dhe 20 pend\u00eb tok\u00eb, si edhe nj\u00eb cop\u00ebz druri nga kryqi i Krishtit, (Fig.4) e cila peshonte afro 60 derhem[8]. Ajo \u00ebsht\u00eb sjell\u00eb n\u00eb vitin 559 prej Kostandinit nga Labova, i cili ishte bashk\u00ebpun\u00ebtor i ngusht\u00eb i perandorit Justinian. N\u00eb momentin q\u00eb Druri i Shenjt\u00eb mb\u00ebrriti n\u00eb Labov\u00eb, episkopi i Drinopoj\u00ebs, Kostandini celebroi nj\u00eb liturgji, gjat\u00eb s\u00eb cil\u00ebs u b\u00eb edhe shenjt\u00ebrimi i kish\u00ebs[9]. Gjithnj\u00eb sipas burimeve t\u00eb tradit\u00ebs, thuhet se kryemjeshtri q\u00eb nd\u00ebrtoi kish\u00ebn ishte nga Pirsojani i Konic\u00ebs. Kisha \u00ebsht\u00eb nd\u00ebrtuar nd\u00ebrmjet viteve 527-565, pra p\u00ebr 38 vjet.\u00a0
Justiniani urdh\u00ebroi q\u00eb m\u00eb 8 shtator, dit\u00ebn q\u00eb kremtonte kisha, n\u00eb Lunxhat t\u00eb b\u00ebhej nj\u00eb panair i madh, n\u00eb t\u00eb cilin mblidheshin rreth 10-12 mij\u00eb njer\u00ebz[10]. N\u00eb dit\u00ebn q\u00eb kremtonte kisha n\u00eb Labov\u00eb zhvillohej nj\u00eb panair i madh me pjes\u00ebmarrjen e mij\u00ebra njer\u00ebzve, t\u00eb cil\u00ebt vinin nga Lunxh\u00ebria, Libohova, Dropulli, Zagoria, Pogoni, Gjirokastra etj. Pasi zhvillohej ceremonia n\u00eb kish\u00eb, t\u00eb pranishmit shkonin n\u00eb L\u00ebmin e Valleve, ku shtrohej gostia e madhe. Panairi i Sh\u00ebn M\u00ebris\u00eb zgjaste tri dit\u00eb. N\u00eb dit\u00ebt e panairit pleq\u00ebsia e fshatit merrte masa p\u00ebr pritjen e pelegrin\u00ebve. Sipas numrit t\u00eb pelegrin\u00ebve caktohej sasia e mishrave, q\u00eb do t\u00eb piqeshin dhe \u00e7do gj\u00eb q\u00eb nevojitej p\u00ebr panairin. Pleq\u00ebsia caktonte burra dhe djem nga fshati, q\u00eb t\u00eb mbanin rregullin dhe qet\u00ebsin\u00eb gjat\u00eb zhvillimit t\u00eb panairit. Nj\u00eb dit\u00eb para panairit vinin tregtar\u00ebt ambulant\u00eb nga Gjirokastra dhe Libohova, t\u00eb cil\u00ebt tregtonin artikuj industrial\u00eb dhe ushqimor\u00eb te L\u00ebmi i Valleve. Gjat\u00eb nat\u00ebs shum\u00eb besimtar\u00eb flinin brenda n\u00eb kish\u00eb, duke u lutur p\u00ebr problemet e tyre familjare[11].\u00a0
N\u00eb lidhje me datimin e sakt\u00eb t\u00eb kish\u00ebs, studiuesit kan\u00eb mendime t\u00eb ndryshme. N\u00eb vitin 1916, kisha e Sh\u00ebn M\u00ebris\u00eb \u00ebsht\u00eb vizituar (Fig.5) nga Frederikos Versakis[12], i cili ka b\u00ebr\u00eb nj\u00eb planimetri hipotetike t\u00eb gjendjes fillestare. Peter Megav, Moutsopoulos dhe Guntram Koch[13] mendojn\u00eb se kisha daton n\u00eb shek. X. F. Versakis e daton kish\u00ebn n\u00eb shek. XII. Velenis propozon fundin e shek. XII dhe fillimin e shek. XIII. Meksi dhe Pallas e datojn\u00eb kish\u00ebn n\u00eb shek. XIII. Duke u nisur nga forma e narteksit, Panayotis Vokotopulos (Fig.6) \u00ebsht\u00eb i mendimit se kisha daton n\u00eb gjysm\u00ebn e par\u00eb t\u00eb shek. XI[14]. Sipas Aleksand\u00ebr Meksit, e par\u00eb n\u00eb aspektin e vlerave arkitektonike, (Fig.7) kisha \u00ebsht\u00eb monument i arrir\u00eb. Duke gjykuar n\u00eb t\u00ebr\u00ebsi vlerat arkitekturore t\u00eb k\u00ebtij monumenti, si ato t\u00eb brend\u00ebsis\u00eb, ashtu dhe t\u00eb an\u00ebs s\u00eb jashtme, kisha bart vlera arkitektonike t\u00eb dor\u00ebs s\u00eb par\u00eb[15].\u00a0
Kisha \u00ebsht\u00eb e tipit n\u00eb form\u00eb kryqi me nj\u00eb kube cilindrike. Nga ana e jashtme \u00ebsht\u00eb e zbukuruar me dekoracione tullash. N\u00eb an\u00ebn jugore t\u00eb kish\u00ebs, mbi dritaren bifore gjenden dy tulla t\u00eb m\u00ebdha. N\u00eb pjes\u00ebn e sip\u00ebrme kan\u00eb vrima katrore. K\u00ebto jan\u00eb koshere blet\u00ebsh (Fig.8). P\u00ebrdorimi i k\u00ebsaj simbolike paleokristiane \u00ebsht\u00eb nj\u00eb gjetje e p\u00ebrkryer e arkitektit q\u00eb ka nd\u00ebrtuar kish\u00ebn. Besimtar\u00ebt futen n\u00eb kish\u00eb ashtu si blet\u00ebt n\u00eb koshere. Bleta p\u00ebrfaq\u00ebson Shpirtin e Shenjt\u00eb, nd\u00ebrsa mjalti evokon zem\u00ebrgjer\u00ebsin\u00eb dhe pasionin e Krishtit. Blet\u00ebt jan\u00eb p\u00ebrdorur gjithashtu n\u00eb kish\u00ebn e hershme si simbol i ringjalljes. Et\u00ebrit e kish\u00ebs e krahasonin kish\u00ebn me blet\u00ebrrit\u00ebsin dhe komunitetin e krishter\u00eb me blet\u00ebt.\u00a0
Motivin e blet\u00ebve e hasim edhe n\u00eb teknik\u00ebn strukturore t\u00eb kish\u00ebs; Nd\u00ebrmjet gur\u00ebve t\u00eb baraslarguar nga nj\u00ebri-tjetri \u00ebsht\u00eb aplikuar nj\u00eb motiv paleokristian >I<. Nj\u00eb tull\u00eb \u00ebsht\u00eb e vendosur vertikalisht, nd\u00ebrsa kat\u00ebr copa tullash sa gjysma e saj drejtohen diagonal p\u00ebr n\u00eb qend\u00ebr, duke simbolizuar monogram\u00ebn paleokristiane >I<. P\u00ebrdorimi i motivit t\u00eb blet\u00ebve n\u00eb teknik\u00ebn strukturore ka kuptim simbolik paleokristian. Kisha p\u00ebrfaq\u00ebson kosheren, nd\u00ebrsa besimtar\u00ebt si blet\u00ebt vijn\u00eb rrotull saj. Si p\u00ebrfundim, mund t\u00eb themi se prania e nj\u00eb koshereje blet\u00ebsh n\u00eb hyrjen e vjet\u00ebr t\u00eb kish\u00ebs \u201cLindja e Hyjlind\u00ebses\u201d n\u00eb Labov\u00ebn e Kryqit, na shtyn t\u00eb mendojm\u00eb se dekori strukturor >I<, q\u00eb zbukuron muret e kish\u00ebs, \u00ebsht\u00eb nj\u00eb p\u00ebrfytyrim figurativ i blet\u00ebve, t\u00eb cilat futen n\u00eb koshere, ashtu si\u00e7 futen besimtar\u00ebt n\u00eb kish\u00eb[16].
Tamburi i kish\u00ebs (Fig.9) p\u00ebrb\u00ebhet nga dy breza t\u00eb zbukuruar. N\u00eb brezin e posht\u00ebm jan\u00eb kat\u00ebr dritare, q\u00eb k\u00ebmbehen me kat\u00ebr nike, t\u00eb cilat jan\u00eb me dy radh\u00eb tullash t\u00eb shkall\u00ebzuara. Brezi i sip\u00ebrm i tamburit p\u00ebrb\u00ebhet nga breza tullash t\u00eb vendosura n\u00eb form\u00eb zigzake. Mbi t\u00eb gjendet nj\u00eb korniz\u00eb e dyfisht\u00eb tullash t\u00eb vendosura n\u00eb form\u00eb dh\u00ebmb\u00eb sharre. Elementet dekorative q\u00eb zbukurojn\u00eb kish\u00ebn jan\u00eb t\u00eb larmish\u00ebm. Pllakat e shtrira e t\u00eb nd\u00ebrfutura nd\u00ebrmjet shiritave t\u00eb tullave kan\u00eb shenj\u00ebn \u201cX\u201d, n\u00eb form\u00eb kanelyre. Brezi i dyt\u00eb i dekorit t\u00eb frontonit ka nj\u00eb motiv zigzag me trek\u00ebnd\u00ebsha pllakash terakote. Mbi sip\u00ebrfaqen e zbukuruar ka motive n\u00eb form\u00eb rombi, si dhe tulla n\u00eb profil. Te brezi me pllaka n\u00eb form\u00eb rombi, hap\u00ebsirat nd\u00ebrmjet tyre plot\u00ebsohen me trek\u00ebnd\u00ebsha t\u00eb vegj\u00ebl. P\u00ebrdorimi i shenj\u00ebs \u201cX\u201d n\u00eb dekorin e tamburit p\u00ebrkon me shkronj\u00ebn \u201cX\u201d n\u00eb greqishten bizantine, e cila si num\u00ebr \u00ebsht\u00eb e barabart\u00eb me 600. N\u00eb k\u00ebt\u00eb rast, arkitekti ka kombinuar zbukurimin nga nj\u00ebra an\u00eb dhe datimin e kish\u00ebs, nga ana tjet\u00ebr. Dekori[17] i brezave t\u00eb tamburit t\u00eb kish\u00ebs zhvillohet n\u00eb dymb\u00ebdhjet\u00eb breza, ku i shtati dhe i dymb\u00ebdhjeti paraqesin muajt ekstrem\u00eb: korrikun (si muaji m\u00eb i nxeht\u00eb) dhe dhjetorin (si muaji m\u00eb i ftoht\u00eb). N\u00eb an\u00ebn verilindore t\u00eb tamburit gjenden pllaka n\u00eb form\u00eb rombi, i cili \u00ebsht\u00eb simbol paleokristian i vuvl\u00ebs. Brezi n\u00eb form\u00eb rombi korrespodon me muajin gusht. Brezi mbi t\u00eb \u00ebsht\u00eb me tulla vertikale. Ky \u00ebsht\u00eb shtatori, muaji kur zhvillohej panairi n\u00eb Lunxhat[18].\u00a0
N\u00eb qend\u00ebr t\u00eb kupol\u00ebs s\u00eb kish\u00ebs \u00ebsht\u00eb pikturuar "Pandokratori" dhe posht\u00eb tij, skena me "Liturgjin\u00eb e engj\u00ebjve". N\u00eb harkad\u00ebn per\u00ebndimore, p\u00ebrball\u00eb me ikonostasin gjendet skena "Deisis", e cila daton n\u00eb shek. XII. N\u00eb harqet e brendshme t\u00eb harkadave jan\u00eb skenat: "Zbritja nga Kryqi", "Krishti para Pilatit", "Fjetja e Hyjlind\u00ebses", "V\u00ebnia e kuror\u00ebs me gjemba" etj. T\u00eb gjitha skenat e sip\u00ebrp\u00ebrmendura datojn\u00eb n\u00eb shek. XIII. T\u00eb gjitha jan\u00eb t\u00eb d\u00ebmtuara nga lag\u00ebshtira. N\u00eb qend\u00ebr t\u00eb harkad\u00ebs veriore \u00ebsht\u00eb skena e "Trinis\u00eb s\u00eb Shenjt\u00eb", nd\u00ebrsa n\u00eb apsid\u00ebn e kish\u00ebs, "Platitera", e cila paraqitet me krah\u00ebt e hapur dhe Krishin n\u00eb preh\u00ebr[19].\u00a0
Mjedisi i altarit ndahet nga naosi me an\u00ebn e nj\u00eb ikonostasi[20] prej druri t\u00eb gdhendur. Ikonostasi (Fig.10) t\u00eb krijon p\u00ebrshtypjen e nj\u00eb pjergulle t\u00eb harlisur. N\u00eb t\u00eb jan\u00eb skalitur pjergulla dhe bistak\u00eb rrushi dhe zogjt\u00eb q\u00eb \u00e7ukisin mbi to. Ikonostasi \u00ebsht\u00eb gdhendur prej Kost\u00eb Tunit nga Me\u00e7ova[21] n\u00eb vitin 1805. Ky fakt v\u00ebrtetohet nga nj\u00eb mbishkrim i gdhendur n\u00eb dru mbi port\u00ebn jugore t\u00eb ikonostasit: + \u0395\u03c4\u03bf\u03c2 1805 \u03b1\u03c5\u03b3\u03bf\u03c5\u03c3\u03c4\u03bf\u03c2 26 (\u03b5)\u03c0\u03c5\u03c4\u03c1\u03bf\u03c0\u03b5\u03c5\u03bf\u03bd\u03c4\u03b1\u03c2 \u03a0\u03b1\u03c0\u03b1\u03ba\u03c5\u03c1\u03c5\u03c4\u03b6\u03b9\u03c2 \u03c7\u03c1\u03b9\u03c3\u03c4\u03bf\u03c5 \u03b4\u03c5\u03b1 \/ \u03c7\u03c5\u03c1\u03c9\u03c2 \u039a\u03c9\u03c3\u03c4\u03b1 \u03a4\u03bf\u03c5\u03bd\u03bf\u03c5 \u039c\u03b5\u03c4\u03b6\u03c9\u03b2\u03c5\u03c4\u03b7\u03c2. \u201cViti 1805, gusht 26, n\u00eb koh\u00ebn e epitripit Kristo Papaqirisit, me dor\u00ebn e Kost\u00eb Tunit[22] Me\u00e7ovitit\u201d[23]. \u00a0
N\u00eb qend\u00ebr t\u00eb ikonostasit madh\u00ebshtor jan\u00eb dyert e bukura dhe sip\u00ebr tyre \u00ebsht\u00eb gdhendur nj\u00eb shqiponj\u00eb dykrenore. Mbi dyert e bukura t\u00eb ikonostasit gjendet skena "Darka mistike" (Fig.11). Ikonat e m\u00ebdha t\u00eb ikonostasit jan\u00eb: "Krishti", "Sh\u00ebn M\u00ebria me Krishtin" (Fig.12), "Joan Pag\u00ebzori", "Lindja e Hyjlind\u00ebses", "Tre hierark\u00ebt", "Sh\u00ebn Parashqevia", "Sh\u00ebn Kolli" etj. N\u00eb pjes\u00ebn e sip\u00ebrme t\u00eb ikonostasit jan\u00eb 12 ikonat e vogla: "Pag\u00ebzimi", "Krishtlindja", "Mandili i shenjt\u00eb", "Hyrja e Krishtit n\u00eb Tempull", "Hyrja e Hyjlind\u00ebses n\u00eb tempull", "Lindja e Hyjlind\u00ebses", "Trinia e Shenjt\u00eb", "Ngjallja e Llazarit", "Sh\u00ebrimi i t\u00eb verbrit", "Shp\u00ebrfytyrimi", "Pendikostia" dhe "Kryqi i Shenjt\u00eb". Ikona e fundit tregon si u gjet kryqi, ku u kryq\u00ebzua Krishti prej Elen\u00ebs, n\u00ebn\u00ebs s\u00eb Kostandinit t\u00eb Madh. Kjo ikon\u00eb \u00ebsht\u00eb vendosur jasht\u00eb programit standard ikonografik t\u00eb paraqitjes s\u00eb festave kryesore. Vendosja e ikon\u00ebs ka p\u00ebr q\u00ebllim t\u00eb kujtoj\u00eb se n\u00eb k\u00ebt\u00eb kish\u00eb ekziston nj\u00eb pjes\u00eb nga Kryqi i Shenjt\u00eb, mbi t\u00eb cilin \u00ebsht\u00eb kryq\u00ebzuar Krishti.
Ikonat e vogla t\u00eb ikonostasit (Fig.13) jan\u00eb pikturuar nga Joan Athanasi dhe datojn\u00eb n\u00eb shek. XIX. Fatkeq\u00ebsisht, ato jan\u00eb grabitur[24] n\u00eb vitin 2002, menj\u00ebher\u00eb pas restaurimit t\u00eb kish\u00ebs. N\u00eb k\u00ebt\u00eb kish\u00eb gjendet nj\u00eb ikon\u00eb e "Krishtit Pandokrator", anash s\u00eb cil\u00ebs jan\u00eb 12 skena q\u00eb paraqesin udh\u00ebn e kryqit: "N\u00eb malin e ullinjve", "Vizioni i Abrahamit", "Larja e k\u00ebmb\u00ebve", "Puthja e Jud\u00ebs", "Krishti p\u00ebrpara Kajaf\u00ebs", "Krishti para Pilatit", "Larja e duarve t\u00eb Pilatit", "Vendosja e kuror\u00ebs me gjemba", "Etja e Krishtit", "Mbajtja e kryqit", "Kryq\u00ebzimi" dhe "Zbritja nga kryqi"[25].
Disa ikona nga kjo kish\u00eb jan\u00eb n\u00eb fondet e Muzeut Historik Komb\u00ebtar, Tiran\u00eb[26]. Kisha e "Sh\u00ebn M\u00ebris\u00eb" n\u00eb Labov\u00ebn e Kryqit \u00ebsht\u00eb meremetuar disa her\u00eb. Nj\u00eb restaurim \u00ebsht\u00eb b\u00ebr\u00eb n\u00eb vitin 1776 nga papa Zoto. Apsida qendrore dhe apsidat an\u00ebsore t\u00eb kish\u00ebs jan\u00eb rr\u00ebnuar dhe jan\u00eb rind\u00ebrtuar n\u00eb vitin 1776. Ky fakt v\u00ebrtetohet nga mbishkrim, q\u00eb gjendet i gdhendur n\u00eb mesin e apsid\u00ebs jasht\u00eb kish\u00ebs: \u0399(\u03b7\u03c3\u03bf\u03c5)\u03c3 \u03a7(\u03c1\u03b9\u03c3\u03c4\u03cc)\u03c3 \u039d\u03b9\u03ba\u03b1. \u0395\u03c4\u03bf\u03c5\u03c2 1776. \u03a0\u03b1\u03c0\u03b1 \u0396\u03c9\u03c4\u03c9. \u201cJezu Krishti fiton, viti 1776, papa Zoto\u201d[27]. Bamir\u00ebsi Vangjel Zhapa n\u00eb testamentin e tij ka l\u00ebn\u00eb shum\u00ebn e 1700 florinjve, me t\u00eb cil\u00ebn do t\u00eb paguheshin epitrop\u00ebt e kish\u00ebs, dy prift\u00ebrinjt\u00eb dhe dy psalt\u00ebt[28]. Kisha e "Sh\u00ebn M\u00ebris\u00eb" \u00ebsht\u00eb shpallur monument kulture[29] n\u00eb vitin 1963.
N\u00eb vitin 1990 kisha e Labov\u00ebs s\u00eb Kryqit iu n\u00ebnshtrua nj\u00eb restaurimi t\u00ebr\u00ebsor me fondet e labovites Eftimi Petridhi, e cila banon n\u00eb Amerik\u00eb. Rikonstruksioni i jasht\u00ebm dhe i brendsh\u00ebm kapi shifr\u00ebn e 100 mij\u00eb dollar\u00ebve amerikan\u00eb[30]. Restaurimi i ikonave dhe i afreskeve u realizua nga restauratori Gazmend Muka[31].
[1] -\u0392\u03b1\u03c3\u03b9\u03bb\u03b5\u03b9\u03bf\u03c5 \u039c\u03c0\u03b1\u03c1\u03b1, \u03a4\u03bf \u0394\u03b5\u03bb\u03b2\u03b9\u03bd\u03bf \u03c4\u03b7\u03c2 \u0392\u03bf\u03c1\u03b5\u03b9\u03bf\u03c5 \u0397\u03c0\u03b5\u03b9\u03c1\u03bf\u03c5 \u03ba\u03b1\u03b9 \u03bf\u03b9 \u03b3\u03b5\u03b9\u03c4\u03bf\u03bd\u03b9\u03ba\u03b5\u03c2 \u03c4\u03bf\u03c5 \u03c0\u03b5\u03c1\u03b9\u03bf\u03c7\u03b5\u03c2, \u0391\u03b8\u03b7\u03bd\u03b1\u03b9, 1966, \u03c3\u03b5\u03bb. 205.
[2]- \u03a0. \u03a0\u03bf\u03c5\u03bb\u03af\u03c4\u03c3\u03b1, \u0395\u03c0\u03b9\u03b3\u03c1\u03b1\u03c6\u03b1\u03af \u03ba\u03b1\u03b9 \u0395\u03bd\u03b8\u03c5\u03bc\u03ae\u03c3\u03b5\u03b9\u03c2 \u03b5\u03ba \u03c4\u03b7\u03c2 \u0392\u03bf\u03c1\u03b5\u03af\u03bf\u03c5 \u0397\u03c0\u03b5\u03af\u03c1\u03bf\u03c5, \u0395\u03c0\u03b5\u03c4\u03b7\u03c1\u03af\u03c2 \u0395\u03c4\u03b1\u03b9\u03c1\u03b5\u03af\u03b1\u03c2 \u0392\u03c5\u03b6\u03b1\u03bd\u03c4\u03b9\u03bd\u03ce\u03bd \u03a3\u03c0\u03bf\u03c5\u03b4\u03ce\u03bd, \u0391\u03b8\u03ae\u03bd\u03b1\u03b9, 1928, \u03c3\u03b5\u03bb. 64; Theofan Popa, Mbishkrime t\u00eb kishave n\u00eb Shqip\u00ebri, Tiran\u00eb, 1998, nr. 518, faqe 219.
[3]-N\u00eb koh\u00ebn e Justinianit t\u00eb Madh (527-565) zona ka qen\u00eb vend pelegrinazhi, ashtu si\u00e7 ka qen\u00eb n\u00eb koh\u00ebn e mbret\u00ebrimit t\u00eb Kostandinit. At\u00ebher\u00eb u nis\u00ebn dhe shkuan te Justiniani i Madh dhjet\u00eb drinopojas dhe dymb\u00ebdhjet\u00eb kaonas, burra t\u00eb zgjedhur, me fam\u00eb, trupm\u00ebdhenj dhe t\u00eb ditur. Kur i pa ata perandori, u g\u00ebzua shum\u00eb nga bukuria dhe men\u00e7uria a tyre. Menj\u00ebher\u00eb pas tri dit\u00ebsh iu dha atyre grada dhe i mbajti pran\u00eb vetes. N\u00eb vendin e tyre d\u00ebrgoi kryekordh\u00ebtarin \u00a0Aleksand\u00ebr \u00a0p\u00ebr t\u00eb v\u00ebzhguar dhe qeverisur gjith\u00eb ato vende t\u00eb Aidhonis\u00eb, Finiqit, Himar\u00ebs dhe deri n\u00eb Vlor\u00eb dhe Belegrad. Me koh\u00eb u paqtuan vendet, si\u00e7 desh\u00ebn. Me vdekjen e kryekordh\u00ebtarit Aleksand\u00ebr, qeveritar i vendit u b\u00eb Kostandin Drinopoliti, nga Labova, i cili me an\u00eb t\u00eb nj\u00eb dekreti perandorak nd\u00ebrtoi n\u00eb at\u00eb vend kish\u00ebn kushtuar Lindjes s\u00eb T\u00ebr\u00ebshenjt\u00ebs Hyjlind\u00ebse, t\u00eb bukur dhe t\u00eb mrekullueshme, ashtu si\u00e7 e meritonte ai vend q\u00eb p\u00ebrb\u00ebhej nga 910 sht\u00ebpi. Njer\u00ebzit qen\u00eb t\u00eb denj\u00eb dhe burr\u00ebror\u00eb, t\u00eb bukur e t\u00eb gatsh\u00ebm n\u00eb p\u00ebrgjigje. Ata e b\u00ebn\u00eb at\u00eb vend Stavropigjik (n\u00eb var\u00ebsi direkte nga patriku ekumenik), autodespotik. T\u00eb gjith\u00eb t\u00eb krishter\u00ebt qen\u00eb kurdoher\u00eb t\u00eb gatsh\u00ebm p\u00ebr detyrimet mbret\u00ebrore. P\u00ebrsa i p\u00ebrket lagjes s\u00eb sip\u00ebrme, qe n\u00eb var\u00ebsi t\u00eb kish\u00ebs s\u00eb Sh\u00ebn Athanasit, e cila ishte n\u00eb juridiksionin e kryepriftit, si\u00e7 qe e gjith\u00eb zona. Ata qen\u00eb nj\u00ebqind e tet\u00ebdhjet\u00eb sht\u00ebpi. P\u00ebr at\u00eb kish\u00eb perandori fali 20 pend\u00eb qe, tok\u00eb dhe dy mullinj, t\u00eb cil\u00ebt do t\u00eb sh\u00ebrbenin p\u00ebr t\u00eb ushqyer dymb\u00ebdhjet\u00eb prift\u00ebrinjt\u00eb. Me an\u00ebn e nj\u00eb dekreti perandorak u fali drurin e shenjt\u00eb, si dhe orendi me vler\u00eb nj\u00eb mij\u00eb t\u00eb florinjta; \u03a6\u03b9\u03bb\u03b9\u03c0\u03c0\u03b1\u03c2 \u039b\u03b9\u03c4\u03c3\u03b9\u03bf\u03c2, \u03a4\u03bf \u03c7\u03c1\u03bf\u03bd\u03b9\u03ba\u03bf \u03c4\u03b7\u03c2 \u0394\u03c1\u03bf\u03c0\u03bf\u03bb\u03b7\u03c2, Neraida, \u03c3\u03b5\u03bb. 19-20; Moikom Zeqo, Kisha q\u00eb strehon kryqin e v\u00ebrtet\u00eb t\u00eb Krishtit, Gazeta Shqiptare, 29 tetor 1999, faqe 19.
[4]-I pari q\u00eb botoi Kronik\u00ebn e Dropullit ka qen\u00eb konsulli francez n\u00eb Janin\u00eb, F. Puk\u00ebvil. M\u00eb 1806 Puk\u00ebvili b\u00ebri nj\u00eb vizit\u00eb tek episkopi i Drinopoj\u00ebs n\u00eb qytetin e Gjirokastr\u00ebs. Nj\u00eb intelektual i Gjirokastr\u00ebs i dhuroi nj\u00eb dor\u00ebshkrim pa fund e pa krye. Kuptohet edhe pa titull. Puk\u00ebvili e publikoi kronik\u00ebn me titull: \u201cKronika e Gjirokastr\u00ebs\u201d, pasi dor\u00ebshkrimin e kishte marr\u00eb nga ai qytet. Puk\u00ebvili e p\u00ebrktheu kronik\u00ebn n\u00eb gjuh\u00ebn fr\u00ebnge dhe e botoi. F.C.H.L. Puqueville, Voyage dans la Greece, V, Paris, 1821, faqe 356-357.
[5] -Athansios Petridhis nga Dropulli ishte nj\u00eb k\u00ebrkues pasionant. Ai udh\u00ebtoi fshat m\u00eb fshat, manastir m\u00eb manastir dhe n\u00ebp\u00ebr sitet arkeologjike p\u00ebr t\u00eb mbledhur dokumente historike, tradita popullore dhe sh\u00ebnime t\u00eb tjera, q\u00eb lidhen me fshatrat e zon\u00ebs dhe p\u00ebrgjith\u00ebsisht, t\u00eb t\u00eb gjith\u00eb Epirit. Petridhis \u00ebsht\u00eb i pari, q\u00eb publikoi nga fillimi e deri n\u00eb fund Kronik\u00ebn e Dropullit. N\u00eb vitin 1864, Petridhis e kishte p\u00ebrfshir\u00eb Kronik\u00ebn e Dropullit n\u00eb nj\u00eb koleksion me materiale gjuh\u00ebsore p\u00ebr Epirin, t\u00eb cilin e paraqiti p\u00ebr ta vler\u00ebsuar n\u00eb Kolegjin Filologjik t\u00eb Kostandinopoj\u00ebs. Pjes\u00eb nga kronika u botuan n\u00eb gazetat dhe revistat e koh\u00ebs. \u0391\u03b8\u03b1\u03bd\u03ac\u03c3\u03b9\u03bf\u03c2 \u00a0\u03a0\u03b5\u03c4\u03c1\u03af\u03b4\u03b7\u03c2, \u00a0\u03a7\u03c1\u03bf\u03bd\u03b9\u03ba\u03cc\u03bd \u0394\u03c1\u03c5\u03bf\u03c0\u03af\u03b4\u03bf\u03c2, \u039d\u03b5\u03bf\u03b5\u03bb\u03bb\u03b7\u03bd\u03af\u03ba\u03b1 \u0391\u03bd\u03ac\u03bb\u03b5\u03ba\u03c4\u03b1, 1871, \u03c3\u03b5\u03bb. 1-64.
[6]-\u039d\u03b9\u03ba\u03bf\u03bb\u03b1\u03bf\u03c2 \u039c\u03bf\u03c5\u03c3\u03c4\u03b1\u03ba\u03af\u03b4\u03b7\u03c2, \u0394\u03c1\u03c5\u03af\u03bd\u03bf\u03c0\u03bf\u03bb\u03b9\u03c4\u03b9\u03ba\u03ac, \u0395\u03ba\u03ba\u03bb\u03b7\u03c3\u03b9\u03b1\u03c3\u03c4\u03b9\u03ba\u03ae \u0391\u03bb\u03ae\u03b8\u03b5\u03b9\u03b1, \u0391\u03b8\u03ae\u03bd\u03b1\u03b9 1906.
[7]-\u0394. \u0395\u03c5\u03b1\u03bd\u03bd\u03b3\u03b5\u03bb\u03af\u03b4\u03b7\u03c2, \u0391\u03b9 \u03b1\u03c1\u03c7\u03b1\u03b9\u03cc\u03c4\u03b7\u03c4\u03b5\u03c2 \u03ba\u03b1\u03b9 \u03c4\u03b1 \u03b2\u03c5\u03b6\u03b1\u03bd\u03c4\u03b9\u03bd\u03ac \u03bc\u03bd\u03b7\u03bc\u03b5\u03af\u03b1 \u03c4\u03b7\u03c2 \u0392\u03bf\u03c1\u03b5\u03b9\u03bf\u03b4\u03c5\u03c4\u03b9\u03ba\u03ae\u03c2 \u0397\u03c0\u03b5\u03af\u03c1\u03bf\u03c5, \u039d\u03ad\u03bf\u03c2 \u0395\u03bb\u03bb\u03b7\u03bd\u03bf\u03bc\u03bd\u03ae\u03bc\u03c9\u03bd, 10 (1913).\u00a0
[8]-Dhimit\u00ebr Beduli, Kish\u00eb dhe kultur\u00eb, Instituti i Dialogut dhe i Komunikimit, Tiran\u00eb, 2006, faqe 55; Dhimit\u00ebr Beduli, Kisha Orthodhokse Autoqefale e Shqip\u00ebris\u00eb gjer n\u00eb vitin 1944, Botim i K.O.A.Sh-it, Tiran\u00eb, 1992, faqe 37.
[9]-Cop\u00ebza prej kryqit t\u00eb shenjt\u00eb peshonte rreth 152 gram\u00eb dhe ishte vendosur brenda nj\u00eb kutie druri t\u00eb punuar holl\u00eb. T\u00eb dyja an\u00ebt mbylleshin me tet\u00eb kap\u00ebse prej argjendi. Kryqi i Labov\u00ebs p\u00ebrfaq\u00ebson nj\u00eb relikuar t\u00eb shenjt\u00eb, q\u00eb mban brenda tij kutin\u00eb me nj\u00eb cop\u00ebz \u00a0druri nga kryqi i kryq\u00ebzimit t\u00eb Krishtit. Ai \u00ebsht\u00eb punuar me argjend dhe n\u00eb t\u00eb dy an\u00ebt paraqet skena ikonografike t\u00eb gdhendura. N\u00eb njer\u00ebn an\u00eb paraqitet skena e "Pag\u00ebzimit", nd\u00ebrsa n\u00eb an\u00ebn tjet\u00ebr skena e "Kryq\u00ebzimit". N\u00eb kat\u00ebr an\u00ebt e k\u00ebsaj skene jan\u00eb punuar me mjesht\u00ebri imazhet simbolike t\u00eb kat\u00ebr ungjillor\u00ebve. Sip\u00ebr kryqit paraqitet ungjillor Joani, n\u00ebp\u00ebrmjet figur\u00ebs s\u00eb shqiponj\u00ebs. Djathtas paraqitet ungjillor Marku, n\u00ebp\u00ebrmjet figur\u00ebs s\u00eb luanit, nd\u00ebrsa majtas ungjillor Matheu, me simbolin e njeriut. Figura e fundit \u00ebsht\u00eb ajo e ungjillor Lluk\u00ebs, e cila paraqitet me simbolik\u00ebn e kaut. N\u00eb vitin 1981, kur u \u00e7el Muzeu Historik Komb\u00ebtar u k\u00ebrkua q\u00eb kryqi i Labov\u00ebs t\u00eb p\u00ebrfshihej n\u00eb eksponatet e tij, por labovit\u00ebt nuk pranuan. Fatkeq\u00ebsisht, n\u00eb vitin 1989, kryqi \u00ebsht\u00eb grabitur nga persona, t\u00eb cil\u00ebt d\u00ebshironin t\u00eb fshinin nga kujtesa historike kish\u00ebn, ku gjendej cop\u00ebza prej kryqit t\u00eb shenjt\u00eb mbi t\u00eb cilin u kryq\u00ebzua Krishti. Kryqi ka k\u00ebto t\u00eb dh\u00ebna: Kodi QKIPK 1763, viti 559, materiali argjend, p\u00ebrmasat 46×17 cm. Katalogu i objekteve t\u00eb humbura 1990-2016, T\u00eb deklaruara t\u00eb humbura nga institucionet e trash\u00ebgimis\u00eb kulturore n\u00eb Republik\u00ebn e Shqip\u00ebris\u00eb, Qendra Komb\u00ebtare e Inventarizimit t\u00eb Pasurive Kulturore, Tiran\u00eb, 2017, faqe 45; Gazmend Muka, Kisha e Sh\u00ebn M\u00ebris\u00eb n\u00eb Labov\u00ebn e Kryqit, Albas, Tiran\u00eb, 2013, faqe 106-116; Andrea Mi\u00e7i, Labova e Kryqit, Globus R, Tiran\u00eb, 2010, faqe 62.\u00a0
[10]-Panairi vazhdoi t\u00eb b\u00ebhej n\u00eb Lunxhat deri n\u00eb vitet e mbret\u00ebrimit t\u00eb Kostandinit IV Pogonatit (668-685). Ky perandor vendosi q\u00eb panairi i madh q\u00eb b\u00ebhej n\u00eb Pelakos (Lunxhat), t\u00eb zhvendosej n\u00eb pjes\u00ebn e Kaonis\u00eb n\u00eb vendin e quajtur Pogon (q\u00eb p\u00ebrkonte me emrin e perandorit). N\u00eb k\u00ebt\u00eb panair, q\u00eb zgjaste nj\u00eb muaj, grumbulloheshin shum\u00eb njer\u00ebz. \u03a6\u03b9\u03bb\u03b9\u03c0\u03c0\u03b1\u03c2 \u039b\u03b9\u03c4\u03c3\u03b9\u03bf\u03c2, \u03a4\u03bf \u03c7\u03c1\u03bf\u03bd\u03b9\u03ba\u03bf \u03c4\u03b7\u03c2 \u0394\u03c1\u03bf\u03c0\u03bf\u03bb\u03b7\u03c2, Neraida, \u03c3\u03b5\u03bb. 22; Andrea Mi\u00e7i, Labova e Kryqit, Globus R, Tiran\u00eb, 2010, faqe 48-51. \u00a0\u00a0
[11] -Andrea Mi\u00e7i, Labova e Kryqit, Globus R, Tiran\u00eb, 2010, faqe 129-130.
[12] -F. Versakis, \u0392\u03c5\u03b6\u03b1\u03bd\u03c4\u03b9\u03b1\u03ba\u03bf\u03af \u03bd\u03b1\u03bf\u03af \u03c4\u03ae\u03c2 \u0392\u03bf\u03c1\u03b5\u03af\u03bf\u03c5 \u0397\u03c0\u03b5\u03af\u03c1\u03bf\u03c5, \u201c\u0391\u03c1\u03c7\u03b1\u03b9\u03bf\u03bb\u03bf\u03b3\u03b9\u03ba\u03ae \u0395\u03c6\u03b7\u03bc\u03b5\u03c1\u03af\u03c2\u201d, 1916, \u03c3\u03b5\u03bb. 114-117.
[13] -Guntram Koch, Disa mendime p\u00ebr kish\u00ebn e Labov\u00ebs s\u00eb Kryqit, \u201cMonumentet\u201d, Nr. 1, Tiran\u00eb, 1987, faqe 27-52.
[14] -Panayotis Vokotopulos, Sh\u00ebnime p\u00ebr arkitektur\u00ebn kishtare nga shek.X n\u00eb shek. XIII n\u00eb Shqip\u00ebrin\u00eb e Jugut, 2000 vjet art dhe kultur\u00eb kishtare n\u00eb Shqip\u00ebri, Tiran\u00eb, 2003, faqe 140; \u03a0\u03b1\u03bd\u03b1\u03b3\u03b9\u03ce\u03c4\u03bf\u03c5 \u0392\u03bf\u03ba\u03bf\u03c4\u03bf\u03c0\u03bf\u03cd\u03bb\u03bf\u03c5, \u0397 \u03b5\u03ba\u03ba\u03bb\u03b7\u03c3\u03b9\u03b1\u03c3\u03c4\u03b9\u03ba\u03ae \u03b1\u03c1\u03c7\u03b9\u03c4\u03b5\u03ba\u03c4\u03bf\u03bd\u03b9\u03ba\u03ae \u03b5\u03b9\u03c2 \u03c4\u03b7\u03bd \u0394\u03c5\u03c4\u03b9\u03ba\u03ae\u03bd \u03a3\u03c4\u03b5\u03c1\u03b5\u03ac\u03bd \u0395\u03bb\u03bb\u03ac\u03b4\u03b1 \u03ba\u03b1\u03b9 \u03c4\u03b7\u03bd \u0397\u03c0\u03b5\u03b9\u03c1\u03bf\u03bd \u03b1\u03c0\u03cc \u03c4\u03bf\u03c5 \u03c4\u03ad\u03bb\u03bf\u03c5\u03c2 \u03c4\u03bf\u03c5 7\u03bf\u03c5 \u03bc\u03ad\u03c7\u03c1\u03b9 \u03c4\u03bf\u03c5 \u03c4\u03ad\u03bb\u03bf\u03c5\u03c2 \u03c4\u03bf\u03c5 10\u03bf\u03c5 \u03b1\u03b9\u03ce\u03bd\u03bf\u03c2, \u0398\u03b5\u03c3\u03c3\u03b1\u03bb\u03bf\u03bd\u03af\u03ba\u03b7 1975; \u03a0\u03b1\u03bd\u03b1\u03b3\u03b9\u03ce\u03c4\u03bf\u03c5 \u0392\u03bf\u03ba\u03bf\u03c4\u03bf\u03c0\u03bf\u03cd\u03bb\u03bf\u03c5, \u0397 \u03bc\u03b5\u03c3\u03b1\u03b9\u03c9\u03bd\u03b9\u03ba\u03ae \u03c4\u03ad\u03c7\u03bd\u03b7, \u201c\u039a\u03b1\u03b8\u03b7\u03bc\u03b5\u03c1\u03b9\u03bd\u03b7\u201d, 19 \u0399\u03b1\u03bd\u03bf\u03c5\u03b1\u03c1\u03b9\u03bf\u03c5 1997, \u03c3\u03b5\u03bb. 12.
[15] -Aleksand\u00ebr Meksi, Arkitektura e kishave t\u00eb Shqip\u00ebris\u00eb, Uegen, Tiran\u00eb, 2004, faqe 233-235.
[16]-Gazmend Muka, Kisha e Sh\u00ebn M\u00ebris\u00eb n\u00eb Labov\u00ebn e Kryqit, Albas, Tiran\u00eb, 2013, faqe 28-31.\u00a0
[17]-Dekori \u00a0strukturor i kish\u00ebs \u201cLindja e Hyjlind\u00ebses\u201d n\u00eb Labov\u00ebn e Kryqit \u00ebsht\u00eb i kuq\u00ebrrem\u00eb, e cila nuk \u00ebsht\u00eb gj\u00eb tjet\u00ebr ve\u00e7se nj\u00eb reminishenc\u00eb e ngjyr\u00ebs s\u00eb purpurt perandorake. \u00a0
[18]-Gazmend Muka, Kisha e Sh\u00ebn M\u00ebris\u00eb n\u00eb Labov\u00ebn e Kryqit, Albas, Tiran\u00eb, 2013, faqe 31-38; \u03a6\u03b9\u03bb\u03b9\u03c0\u03c0\u03b1\u03c2 \u039b\u03b9\u03c4\u03c3\u03b9\u03bf\u03c2, \u03a4\u03bf \u03c7\u03c1\u03bf\u03bd\u03b9\u03ba\u03bf \u03c4\u03b7\u03c2 \u0394\u03c1\u03bf\u03c0\u03bf\u03bb\u03b7\u03c2, Neraida, \u03c3\u03b5\u03bb. 22; Andrea Mi\u00e7i, Labova e Kryqit, Globus R, Tiran\u00eb, 2010, faqe 48-51. \u00a0 \u00a0
[19] -Gazmend Muka, Kisha e Sh\u00ebn M\u00ebris\u00eb n\u00eb Labov\u00ebn e Kryqit, Albas, Tiran\u00eb, 2013, faqe 74-75.
[20]-\u03a4\u03b9\u03c4\u03bf\u03c2 \u0393\u03b9\u03bf\u03c7\u03b1\u03bb\u03b1\u03c2, \u03a3\u03c4\u03b7 \u03b3\u03b7 \u03c4\u03bf\u03c5 \u03a0\u03c5\u03c1\u03c1\u03bf\u03c5, \u03b5\u03ba\u03b4\u03bf\u03c3\u03b5\u03b9\u03c2 \u0391\u03c3\u03c4\u03b5\u03c1\u03b9\u03c3\u03bc\u03bf\u03c3-\u039b\u03b9\u03b6\u03b1 \u0395\u03b2\u03b5\u03c1\u03c4, \u0391\u03b8\u03ae\u03bd\u03b1, 1995, \u03c3\u03b5\u03bb. 75.\u00a0
[21] -Me\u00e7ova \u00ebsht\u00eb nj\u00eb fshat vlleh\u00ebsh af\u00ebr Janin\u00ebs.\u00a0
[22]-Sipas Theofan Pop\u00ebs emrin Tune e p\u00ebrdorin vlleh\u00ebt si shkurtim t\u00eb emrit Naun.
[23]-\u03a0. \u03a0\u03bf\u03c5\u03bb\u03af\u03c4\u03c3\u03b1, \u0395\u03c0\u03b9\u03b3\u03c1\u03b1\u03c6\u03b1\u03af \u03ba\u03b1\u03b9 \u0395\u03bd\u03b8\u03c5\u03bc\u03ae\u03c3\u03b5\u03b9\u03c2 \u03b5\u03ba \u03c4\u03b7\u03c2 \u0392\u03bf\u03c1\u03b5\u03af\u03bf\u03c5 \u0397\u03c0\u03b5\u03af\u03c1\u03bf\u03c5, \u0395\u03c0\u03b5\u03c4\u03b7\u03c1\u03af\u03c2 \u0395\u03c4\u03b1\u03b9\u03c1\u03b5\u03af\u03b1\u03c2 \u0392\u03c5\u03b6\u03b1\u03bd\u03c4\u03b9\u03bd\u03ce\u03bd \u03a3\u03c0\u03bf\u03c5\u03b4\u03ce\u03bd, \u0391\u03b8\u03ae\u03bd\u03b1\u03b9, 1928, \u03c3\u03b5\u03bb. 64; Theofan Popa, Mbishkrime t\u00eb kishave n\u00eb Shqip\u00ebri, Tiran\u00eb, 1998, nr. 666, faqe 262.
[24]-Jan\u00eb deklaruar t\u00eb humbura k\u00ebto ikona: Riza e Krishtit, kodi QKIPK 2006, nr. 1, viti 1770, me p\u00ebrmasat 40×30 cm dhe autor Joan Athanasin, Lindja e Krishtit, kodi QKIPK 2007, nr. 2, viti 1770, me p\u00ebrmasat 49×42 cm dhe autor Joan Athanasin, Prekja e Thomait, kodi QKIPK 2008, nr. 3, viti 1770, me p\u00ebrmasat 50×40 cm dhe autor Joan Athanasin, E diela e miroprur\u00ebseve, kodi QKIPK 2009, nr. 4, viti 1770, me p\u00ebrmasat 50×40 cm dhe autor Joan Athanasin, Rrethprerja, kodi QKIPK 2010, nr. 5, viti 1770, me p\u00ebrmasat 49×40 cm dhe autor Joan Athanasin, Shestja, kodi QKIPK 2011, nr. 6, viti 1770, me p\u00ebrmasat 41×40 cm dhe autor Joan Athanasin, E diela e ulokut, kodi QKIPK 2012, nr. 7, viti 1770, me p\u00ebrmasat 50×39 cm dhe autor Joan Athanasin, Sh\u00ebn Triadha, kodi QKIPK 2013, nr. 8, viti 1770, me p\u00ebrmasat 50×40 cm dhe autor Joan Athanasin, Lindja e Hyjlind\u00ebses, kodi QKIPK 2023, nr. 18, viti 1770, me p\u00ebrmasat 46×39 cm dhe autor Joan Athanasin, Ngjallja e Krishtit, kodi QKIPK 2014, nr. 9, autor Joan Athanasi, E diela e samaritanes, kodi QKIPK 2015, nr. 10, autor Joan Athanasi, Ngritja e Kryqit, kodi QKIPK 2016, nr. 11, autor Joan Athanasi, Hyrja e Sh\u00ebn Maris\u00eb n\u00eb tempull, kodi QKIPK 2017, nr. 12, autor Joan Athanasi, Shp\u00ebrfytyrimi, kodi QKIPK 2018, nr. 13, autor Joan Athanasi, Ngjallja e Llazarit, kodi QKIPK 2019, nr. 14, autor Joan Athanasi, Mesipendikostia, kodi QKIPK 2020, nr. 15, autor Joan Athanasi, Pes\u00ebdhjetorja, kodi QKIPK 2021, nr. 16, autor Joan Athanasi, Pa titull, kodi QKIPK 2022, nr. 17, autor Joan Athanasi. Katalogu i objekteve t\u00eb humbura 1990-2016, T\u00eb deklaruara t\u00eb humbura nga institucionet e trash\u00ebgimis\u00eb kulturore n\u00eb Republik\u00ebn e Shqip\u00ebris\u00eb, Qendra Komb\u00ebtare e Inventarizimit t\u00eb Pasurive Kulturore, Tiran\u00eb, 2017, faqe 48-50.
[25]-Gazmend Muka, Kisha e Sh\u00ebn M\u00ebris\u00eb n\u00eb Labov\u00ebn e Kryqit, Albas, Tiran\u00eb, 2013, faqe 99-103.
[26]-Gjat\u00eb pun\u00ebs hulumtuese studimore kemi arritur t\u00eb evidentojm\u00eb k\u00ebto ikona: Sh\u00ebn Kolli, me nr. inventari 5496 dhe p\u00ebrmasa 22×31 cm; Krishti, me nr. inventari 5967 dhe p\u00ebrmasa 43×53 cm, si edhe nj\u00eb ikon\u00eb q\u00eb nuk mund ta identifikojm\u00eb, me nr. inventari 6510 dhe p\u00ebrmasa 61×82 cm.
[27]-\u03a0. \u03a0\u03bf\u03c5\u03bb\u03af\u03c4\u03c3\u03b1, \u0395\u03c0\u03b9\u03b3\u03c1\u03b1\u03c6\u03b1\u03af \u03ba\u03b1\u03b9 \u0395\u03bd\u03b8\u03c5\u03bc\u03ae\u03c3\u03b5\u03b9\u03c2 \u03b5\u03ba \u03c4\u03b7\u03c2 \u0392\u03bf\u03c1\u03b5\u03af\u03bf\u03c5 \u0397\u03c0\u03b5\u03af\u03c1\u03bf\u03c5, \u0395\u03c0\u03b5\u03c4\u03b7\u03c1\u03af\u03c2 \u0395\u03c4\u03b1\u03b9\u03c1\u03b5\u03af\u03b1\u03c2 \u0392\u03c5\u03b6\u03b1\u03bd\u03c4\u03b9\u03bd\u03ce\u03bd \u03a3\u03c0\u03bf\u03c5\u03b4\u03ce\u03bd, \u0391\u03b8\u03ae\u03bd\u03b1\u03b9, 1928, \u03c3\u03b5\u03bb. 64; Theofan Popa, Mbishkrime t\u00eb kishave n\u00eb Shqip\u00ebri, Tiran\u00eb, 1998, Nr.604, faqe 246.
[28] -\u039a. \u03a0. \u0396\u03b1\u03b2\u03b9\u03c4\u03b6\u03b9\u03b1\u03bd\u03bf\u03c5, \u0391\u03c1\u03c7\u03b5\u03b9\u03b1 \u03b5\u03b8\u03bd\u03b9\u03ba\u03c9\u03bd \u03b5\u03c5\u03b5\u03c1\u03b3\u03b5\u03c4\u03c9\u03bd, \u039c\u03b5\u03c1\u03bf\u03c2 \u0391, \u0391\u03b8\u03b7\u03bd\u03b1, 1930, \u03c3\u03b5\u03bb. 185, 189, 190.
[29]-Mbrojtja e monumenteve, Botim i Institutit t\u00eb Monumenteve t\u00eb Kultur\u00ebs, Tiran\u00eb, 1974, faqe 33; Trash\u00ebgimia Kulturore akte ligjore dhe n\u00ebnligjore, Ministria e Kultur\u00ebs, Rinis\u00eb dhe Sporteve, Tiran\u00eb, 2003, faqe 89.
[30] -Andrea Mi\u00e7i, Labova e Kryqit, Globus R, Tiran\u00eb, 2010, faqe 59.
[31]-Gazmend Muka ka lindur m\u00eb 11 maj 1964. Pas p\u00ebrfundimit t\u00eb Institutit t\u00eb lart\u00eb t\u00eb Arteve m\u00eb 1986 filloi pun\u00eb si shef i laboratorit t\u00eb restaurimit t\u00eb veprave t\u00eb artit mesjetar n\u00eb Institutin e Monumenteve t\u00eb Kultur\u00ebs, dega Berat, ku ka realizuar projekte t\u00eb r\u00ebnd\u00ebsishme: restaurimi i afreskeve t\u00eb kishave t\u00eb kalas\u00eb, ikonave t\u00eb ndryshme t\u00eb muzeut \u201cOnufri\u201d, studimi dhe restaurimi i kishave q\u00eb kan\u00eb pikturuar v\u00ebllez\u00ebrit \u00c7etiri, restaurimin e ikonave t\u00eb vogla t\u00eb \u00c7etir\u00ebve n\u00eb ikonostasin e kish\u00ebs \u201cFjetja e Sh\u00ebn M\u00ebris\u00eb\u201d n\u00eb kalan\u00eb e Beratit. Ai ka marr\u00eb pjes\u00eb n\u00eb katalogimin e fondit t\u00eb ikonave t\u00eb Beratit. N\u00eb vitin 1994 Gazmend Muka \u00ebsht\u00eb specializuar n\u00eb Bolonj\u00eb t\u00eb Italis\u00eb dhe m\u00eb 1999 n\u00eb Paris, n\u00eb lidhje me teknikat e restaurimit dhe historis\u00eb s\u00eb artit bizantin. N\u00eb vitin 2000 mbrojti doktoratur\u00ebn n\u00eb shkencat historike me punimin: Ikonografia e \u00c7etir\u00ebve n\u00eb artin bizantin. N\u00eb vitet 2002-2003 ka drejtuar Institutin e Monumenteve t\u00eb Kultur\u00ebs. Gazmend Muka ka botuar artikuj t\u00eb shumt\u00eb te revista shkencore \u201cMonumentet\u201d, si edhe ka botuar disa libra: Art\u2019th\u00ebnia Bizantin\u00eb te \u00c7etir\u00ebt (1999), Kisha e \u201cLindjes s\u00eb Sh\u00ebn M\u00ebris\u00eb\u201d n\u00eb labov\u00ebn e Kryqit (2013) etj. Gazmend Muka nd\u00ebrroi jet\u00eb m\u00eb 16 janar 2012.<\/p>\n