{"id":67591,"date":"2025-03-29T12:43:59","date_gmt":"2025-03-29T11:43:59","guid":{"rendered":"https:\/\/orthodoxalbania.org\/2020\/?p=67591"},"modified":"2025-03-29T18:50:11","modified_gmt":"2025-03-29T17:50:11","slug":"fronezimi-i-kryepiskopit-te-ri-te-shqiperise-fortlumturise-se-tij-z-joan-ne-tirane-29-03-2025","status":"publish","type":"post","link":"https:\/\/orthodoxalbania.org\/2020\/2025\/03\/29\/fronezimi-i-kryepiskopit-te-ri-te-shqiperise-fortlumturise-se-tij-z-joan-ne-tirane-29-03-2025\/","title":{"rendered":"Fron\u00ebzimi i Kryepiskopit t\u00eb ri t\u00eb Shqip\u00ebris\u00eb, Fortlumturis\u00eb s\u00eb Tij, z. Joan, n\u00eb Tiran\u00eb 29.03.2025"},"content":{"rendered":"
<\/div>

Fron\u00ebzimi i Kryepiskopit t\u00eb ri t\u00eb Shqip\u00ebris\u00eb, Fortlumturis\u00eb s\u00eb Tij, z. Joan, n\u00eb Tiran\u00eb<\/strong><\/h4>\n

\"\"N\u00eb nj\u00eb atmosfer\u00eb t\u00eb mbushur me g\u00ebzim t\u00eb madh shpirt\u00ebror, n\u00eb Katedralen \u201cNgjallja e Krishtit\u201d n\u00eb Tiran\u00eb, t\u00eb mbushur plot me besimtar\u00eb dhe p\u00ebrfaq\u00ebsues t\u00eb shumt\u00eb, u zhvillua sot, m\u00eb 29 mars 2025, ceremonia e Fron\u00ebzimit t\u00eb Fortlumturis\u00eb s\u00eb Tij, Kryepiskopit t\u00eb Tiran\u00ebs, Durr\u00ebsit dhe gjith\u00eb Shqip\u00ebris\u00eb, Imzot Joan (Pelushi), si Primat i ri i Kish\u00ebs Orthodhokse Autoqefale t\u00eb Shqip\u00ebris\u00eb. Ky moment historik sh\u00ebnon fillimin e nj\u00eb epoke t\u00eb re p\u00ebr Kish\u00ebn Orthodokse Autoqefale t\u00eb Shqip\u00ebris\u00eb, pas ndarjes nga jeta t\u00eb Kryepiskopit t\u00eb ndjer\u00eb Anastas, i cili, p\u00ebr m\u00eb shum\u00eb se tridhjet\u00eb vjet, e ringjalli Kish\u00ebn nga rr\u00ebnojat e persekutimit t\u00eb eg\u00ebr ateist.<\/p>\n

Ceremonia nisi me hyrjen e Kryepiskopit t\u00eb ri n\u00eb kish\u00ebn katedrale, n\u00eb prani t\u00eb p\u00ebrfaq\u00ebsuesve t\u00eb t\u00eb gjitha Kishave Orthodhokse, p\u00ebrfaq\u00ebsive diplomatike, krer\u00ebve fetar\u00eb, zyrtar\u00ebve t\u00eb qeveris\u00eb dhe nj\u00eb numri t\u00eb madh besimtar\u00ebsh. Pas hyrjes, nga Episkopi i Kruj\u00ebs, hir\u00ebsi Anastasi, u lexua qarkorja e Sinodit t\u00eb Shenjt\u00eb p\u00ebr shpalljen e Kryepiskopit t\u00eb ri. M\u00eb pas, u zhvillua sh\u00ebrbesa e shenjt\u00eb sipas rregullit kishtar dhe vijuan fjal\u00ebt p\u00ebrsh\u00ebndet\u00ebse. I pari q\u00eb mori fjal\u00ebn ishte Mitropoliti i Apolonis\u00eb dhe Fierit, hir\u00ebsi Nikolla, i cili, n\u00eb em\u00ebr t\u00eb Sinodit t\u00eb Shenjt\u00eb, i dor\u00ebzoi Kryepiskopit t\u00eb ri shkopin kryebaritor. M\u00eb tej, fjalime mbajt\u00ebn nj\u00eb klerik nga Kryepiskopata e Tiran\u00ebs, Mitropoliti i Kalqedon\u00ebs, z. Emanuel, p\u00ebrfaq\u00ebsues i T\u00ebr\u00ebshenjt\u00ebris\u00eb s\u00eb Tij, Patriarkut Ekumenik, z. Vartholome dhe Presidenti i Republik\u00ebs s\u00eb Shqip\u00ebris\u00eb, Shk\u00eblqesia e tij, z. Bajram Begaj.<\/p>\n

\"\"N\u00eb fjal\u00ebn e Fron\u00ebzimit, Fortlumturia e Tij, Kryepiskopi Joan, shprehu mir\u00ebnjohjen e thell\u00eb ndaj Per\u00ebndis\u00eb dhe ndaj t\u00eb gjith\u00eb atyre q\u00eb kan\u00eb kontribuar n\u00eb ringritjen dhe rrug\u00ebtimin e Kish\u00ebs s\u00eb Shqip\u00ebris\u00eb. I prekur, ai u shpreh: \u201cFal\u00ebnderojm\u00eb dhe nderojm\u00eb martir\u00ebt e Iliris\u00eb, t\u00eb cil\u00ebt p\u00ebrhap\u00ebn drit\u00ebn e besimit n\u00eb trojet ku jetojm\u00eb, me gjakun dhe jet\u00ebn e tyre; et\u00ebrit dhe shenjtor\u00ebt q\u00eb ruajt\u00ebn drit\u00ebn e besimit nd\u00ebr shekuj; si dhe d\u00ebshmor\u00ebt e rinj, t\u00eb cil\u00ebt, n\u00eb koh\u00ebt m\u00eb t\u00eb v\u00ebshtira p\u00ebr Kish\u00ebn dhe vendin ton\u00eb, dhan\u00eb jet\u00ebn p\u00ebr t\u00eb mbrojtur besimin, identitetin komb\u00ebtar dhe gjuh\u00ebn e tyre.\u201d<\/p>\n

Kryepiskopi i ri p\u00ebrmendi n\u00eb m\u00ebnyr\u00eb t\u00eb ve\u00e7ant\u00eb paraardh\u00ebsit e tij, duke theksuar kontributin e ve\u00e7ant\u00eb t\u00eb Theofan Nolit dhe t\u00eb Kryepiskopit Anastas, p\u00ebr t\u00eb cilin u shpreh: \u201cAi nuk u mjaftua vet\u00ebm n\u00eb rind\u00ebrtimin e mureve dhe t\u00eb infrastruktur\u00ebs fizike t\u00eb Kish\u00ebs, por p\u00ebrpjekja e tij thelb\u00ebsore ishte t\u00eb nd\u00ebrtonte nj\u00eb Kish\u00eb ku Zoti t\u00eb adhurohej \u2018n\u00eb shpirt dhe n\u00eb t\u00eb v\u00ebrtet\u00eb\u2019.\u201d<\/p>\n

\"\"Fortlumturia e Tij, Kryepiskopi Joan, shpalosi shtat\u00eb shtylla themelore t\u00eb misionit t\u00eb tij t\u00eb ri: ruajtjen e Tradit\u00ebs s\u00eb Shenjt\u00eb, forcimin e unitetit brenda Kish\u00ebs, ruajtjen e ekuilibrit midis \u201cUngjillit t\u00eb Mbret\u00ebris\u00eb\u201d dhe \u201cUngjillit Social\u201d, mbrojtjen e vlerave t\u00eb martes\u00ebs dhe t\u00eb familjes, ruajtjen dhe forcimin e bashk\u00ebjetes\u00ebs fetare n\u00eb Shqip\u00ebri, inkurajimin e t\u00eb rinjve p\u00ebr t\u00eb dashur atdheun e tyre dhe p\u00ebr t\u00eb mos e braktisur at\u00eb, si dhe kultivimin e marr\u00ebdh\u00ebnieve me t\u00eb gjitha Kishat dhe bashk\u00ebsit\u00eb e tjera fetare. \u201cPersonalisht do t\u00eb p\u00ebrpiqem me gjith\u00eb fuqin\u00eb time t\u2019i sh\u00ebrbej grigj\u00ebs q\u00eb m\u00eb \u00ebsht\u00eb besuar nga Per\u00ebndia, duke pasur gjithmon\u00eb parasysh fjal\u00ebt e Zotit se \u2018Biri i njeriut nuk erdhi p\u00ebr t\u2019u sh\u00ebrbyer, por p\u00ebr t\u00eb sh\u00ebrbyer\u2019,\u201d p\u00ebrfundoi Fortlumturia e Tij.<\/p>\n

\"\"Fortlumturia e Tij, Kryepiskopi Joan, me emrin civil Fatmir Pelushi, ka lindur n\u00eb Tiran\u00eb n\u00eb vitin 1956. Ai u pag\u00ebzua fshehurazi n\u00eb vitin 1979, gjat\u00eb periudh\u00ebs s\u00eb persekutimeve, nga at\u00eb Kozma Qirjo, i cili m\u00eb von\u00eb u b\u00eb Episkopi i Apolonis\u00eb. Ka ndjekur studimet n\u00eb deg\u00ebn e Psikologjis\u00eb n\u00eb Universitetin e Tiran\u00ebs dhe m\u00eb pas n\u00eb Fakultetin Teologjik t\u00eb Kryqit t\u00eb Shenjt\u00eb n\u00eb Boston, ku u dallua p\u00ebr rezultatet e tij t\u00eb shk\u00eblqyera. U dor\u00ebzua dhjak dhe prift n\u00eb vitin 1994, nd\u00ebrsa n\u00eb vitin 1998 u zgjodh Mitropolit i Kor\u00e7\u00ebs, detyr\u00eb t\u00eb cil\u00ebn e mbajti p\u00ebr nj\u00ebzet e shtat\u00eb vjet, duke zhvilluar nj\u00eb veprimtari t\u00eb pasur baritore, shpirt\u00ebrore dhe shoq\u00ebrore. Ka p\u00ebrfaq\u00ebsuar Kish\u00ebn Orthodhokse Autoqefale t\u00eb Shqip\u00ebris\u00eb n\u00eb shum\u00eb konferenca dhe dialog\u00eb nd\u00ebrorthodhoks\u00eb dhe nd\u00ebr t\u00eb krishter\u00eb dhe ka shkruar e p\u00ebrkthyer nj\u00eb s\u00ebr\u00eb veprash teologjike n\u00eb gjuh\u00ebn shqipe.<\/p>\n

N\u00eb ceremonin\u00eb e Fron\u00ebzimit t\u00eb Kryepiskopit t\u00eb ri t\u00eb Kish\u00ebs Orthodhokse Autoqefale t\u00eb Shqip\u00ebris\u00eb mor\u00ebn pjes\u00eb: Presidenti i Republik\u00ebs s\u00eb Shqip\u00ebris\u00eb, Shk\u00eblqesia e Tij, z. Bajram Begaj, Kryetarja e Kuvendit, znj. Elisa Spiropali, Z\u00ebvend\u00ebskryeministrja dhe Ministrja e Infrastruktur\u00ebs dhe e Energjis\u00eb, znj. Belinda Balluku si dhe Ministri p\u00ebr Evrop\u00ebn dhe Pun\u00ebt e Jashtme, z. Igli Hasani. T\u00eb pranish\u00ebm ishin, gjithashtu, Ministri i Mbrojtjes i Greqis\u00eb, z. Nikos Dendias dhe Ministrja e Arsimit, znj. Sofia Zacharaki. Selia e Shenjt\u00eb u p\u00ebrfaq\u00ebsua nga Kryepiskopi z. Flavio Pace, i shoq\u00ebruar nga p\u00ebrfaq\u00ebsues t\u00eb nivelit t\u00eb lart\u00eb t\u00eb Vatikanit. Nga Kishat Orthodhokse mor\u00ebn pjes\u00eb Mitropolit\u00ebt: Emanuel i Kalqedon\u00ebs dhe Serapioni i Paramithis\u00eb, Filiat\u00ebve dhe Gjiromerit (nga Patriarkana Ekumenike), Serafimi i Zimbabves\u00eb dhe Angol\u00ebs (nga Patriarkana e Aleksandris\u00eb), Ignati Al-Houshi i Franc\u00ebs, Evrop\u00ebs Per\u00ebndimore dhe Jugore (nga Patriarkana e Antiokis\u00eb), Nektari i Anfidonit (nga Patriarkana e Jerusalemit), Nestori i Korsunit dhe Evrop\u00ebs Per\u00ebndimore (nga Patriarkana e Rusis\u00eb), Theodhosi i Rashk\u00ebs-Prizrenit dhe Arsenio i Nishit (nga Patriarkana e Serbis\u00eb), Nifoni i T\u00ebrgovishtit (nga Patriarkana e Rumanis\u00eb), Serafimi i Nevrokopit dhe Grigori i Vrac\u00ebs (nga Patriarkana e Bullgaris\u00eb), Gerasimos Sarasenicze i Zugdidit dhe \u00c7aisit (nga Patriarkana e Gjeorgjis\u00eb), Peshkopi Kristofor i Karpasias (nga Kisha e Qipros), Justini i Kren\u00ebs s\u00eb Re, Athanasi i Sisanit dhe Siatist\u00ebs, Nektari i Korfuzit, Kaliniku i Kosturit (nga Kisha e Greqis\u00eb), Peshkopi Pavllo (Tokajuk) (nga Kisha e Polonis\u00eb), Kryepeshkopi Gjergji i Mihalovc\u00ebs dhe Kosic\u00ebs (nga Kisha e \u00c7ekis\u00eb dhe Sllovakis\u00eb), Josifi i Tetov\u00ebs dhe Gostivarit dhe Jakovi i Shtipit (nga Kisha e Maqedonis\u00eb s\u00eb Veriut), Nikodhimi i Bostonit (n ga Kisha Orthodhokse e Amerik\u00ebs \u2013 OCA). Patriarkana e Jerusalemit u p\u00ebrfaq\u00ebsua, gjithashtu, nga priftmurgu Irine, nd\u00ebrsa Patriarkanat e Mosk\u00ebs dhe t\u00eb Serbis\u00eb u p\u00ebrfaq\u00ebsuan p\u00ebrkat\u00ebsisht nga arkimandrit\u00ebt Irine dhe Andrea.<\/p>\n

Pas p\u00ebrfundimit t\u00eb ceremonis\u00eb u shtrua nj\u00eb drek\u00eb zyrtare n\u00eb nder t\u00eb Kryepiskopit t\u00eb ri dhe t\u00eb t\u00eb ftuarve t\u00eb pranish\u00ebm.<\/p>\n<\/div>

<\/div><\/div>

D\u00ebgjoni Live<\/strong><\/em><\/h4>\n