English (US)ShqipGreek
PROTESTË - Redaksisë së gazetës “Telegraf”
 
Kisha Orthodhokse Autoqefale e Shqipërisë
 
PROTESTË
 
Redaksisë së gazetës “Telegraf”
 
 
    Në gazetën tuaj të datës 24 mars 2015, u botua një histori e shpikur dhe plot fantazi të sëmurë me titull: “Priftërinjtë e Janullatosit nxjerrin Fan Nolin nga Kisha”, me anë të së cilës dezinformohet opinioni publik.
 
    Protestojmë me forcë kundër këtij shkrimi fyes për Kishën Orthodhokse.
 
    Emri i Kishës sonë, që në fillimet e shekullit të 20-të, është Kisha Orthodhokse Autoqefale e Shqipërisë (jo Kisha Ortodokse Autoqefale Shqiptare). Themeluesi i Kishës sonë është Jisu Krishti dhe jo ndonjë episkop.
 
    Identiteti i vërtetë i Kishës sonë përcaktohet nga nenet themeltarë 1 dhe 2 të Statutit të saj:
 
    “Neni 1 1. Kisha Orthodhokse Autoqefale e Shqipërisë, që ka si themelues dhe Krye të saj Zotin dhe Perëndinë tonë Jisu Krishtin, është institucion hyjnor, si prania dhe shfaqja në vend e Një Kishe të Shenjtë, Katholike dhe Apostolike e bashkuar në mënyrë të pandashme me Patriarkanën Ekumenike, me të gjitha Kishat simotra Autoqefale dhe ruan të paluajtshme burimet e besimit, d.m.th. Shkrimin e Shenjtë dhe Traditën e Shenjtë, si dhe Kanonet e Shenjta apostolike dhe sinodike.
 
    2. Titulli i saj zyrtar është Kisha Orthodhokse Autoqefale e Shqipërisë.
 
    Neni 2 1. Anëtarë të Kishës Orthodhokse Autoqefale të Shqipërisë janë të gjithë të pagëzuarit në Kishën Orthodhokse dhe janë banorë të Shqipërisë, pa dallim origjine”.
 
    Ky identitet njihet zyrtarisht nga Shteti Shqiptar me ligjin nr. 10057 të datës 22.01.2009 dhe është regjistruar zyrtarisht nga Gjykata kompetente e Rrethit Gjyqësor të Tiranës (nr. vendimi 2498 të datës 19.03.2009).
 
    Çdo përpjekje e ndryshimit dhe e shtrembërimit të emrit të saktë të Kishës sonë dhe e identitetit të saj nga qarqe të ndryshme të çfarëdo lloji, përbën fyerje të së vërtetës dhe kundër Kishës Orthodhokse Autoqefale të Shqipërisë.
 
    Përfundimisht, shkrime të tilla si ai që u botua në gazetën tuaj, minojnë harmoninë dhe bashkekzistencën fetare, me të cilën mburret vendi ynë.
 
 
    Tiranë 26.03.2015                                                                                                                                                                                                                  Nga Kryesekretaria e Sinodit të Shenjtë
 
 
https://lh3.googleusercontent.com/-WAffozwwdCk/VI8mGlNYdeI/AAAAAAAACiA/VUKAYiKDud8/w958-h626-no/untitled-216.jpg
11 nxënës të shkollës “Protagonistët” marrin Certifikatën GOLD të TOEFL Junior
    Në kuadër të pilotimeve me TOEFL Junior, më 5 mars 2015 u testuan maturantët e  shkollës së mesme shqiptaro - amerikane "Protagonistët". 
 
    Ditën e hënë, më 23 mars, në mjediset e shkollës “Protagonistët”  të Kishës, u zhvillua ceremonia e shpërndarjes së Certifikatave të TOEFL Junior. Maturantët e kësaj shkolle dolën shumë mirë në testim, falë punës që bëhet nga vetë ata në radhë të parë, por dhe mësuesve që japin lëndën e anglishtes dhe punojnë me përkushtim (disa nga mësueset, si dhe drejtorja e shkollës janë amerikane).
 
    Nga 20 nxënës që morën pjesë në testim, 11 prej tyre morën Certifikatën GOLD (nga 900 pikë të mundshme fituan mbi 845 pikë). Certifikatat e 11 nxënësve më të mirë u shpërndanë nga vetë  zv/ministrja e Arsimit dhe e Sportit znj. Nora Malaj, njëkohësisht dhe Kryetare e Maturës Shtetërore, me pjesëmarrjen e përfaqësuesve të organizatorëve amerikanë dhe shqiptarë të TOEFL Junior. Këto Certifikata janë të vlefshme dhe u bashkëngjiten dokumenteve të nxënësve në provimet e Maturës Shtetërore, e cila është Matura e parë për Gjimnazin tonë.
 
 
Doli në qarkullim gazeta "Ngjallja" e muajit mars 2015.
  Doli në qarkullim gazeta "Ngjallja" e muajit mars 2015. Në këtë numër do të lexoni:
 
- PROTESTË - Tiranë, 4 mars 2015

- Ungjillëzimi i Perëndilindëses - Dialogu midis Virgjëreshës Mari dhe Kryeengjëllit sipas disa Etërve të Kishës dhe theologëve të dy shekujve të fundit - nga Arkimandrit Kozma Sovjani

- Shërbesë përshpirtjeje dhe veprimtari me rastin e 50-vjetorit të fjetjes së Imzot Theofan Nolit

- VITI JUBILAR I THEOFAN NOLIT DHE KONTRIBUTI I TIJ PËR KISHËN - nga Dhimitër Qosja, Pedagog në Akademinë Teologjike “Ngjallja e Krishtit”, Shën Vlash, Durrës

- Turqia i jep nënshtetësinë edhe 10 episkopëve të tjerë orthodhoksë nga bota - nga Th.Dh

- SHËN MATRONA E SELANIKUT (27 mars)

- Martirja e re e Krishtit, Eleni Mahankova

- TË PAKTËN, KINI RESPEKT PËR TË VËRTETËN! - nga Prof. dr. Robert Andoni, Prof. dr. Aleksandër Sallabanda, Atë Emanuel Lusha, Atë Ilia Mazniku

- Doli në qarkullim SINAKSARI - (Vëllimi I, shtator - tetor)

- Dëmtimi i Kishës, dëmtim i gjithë shoqërisë - nga Violeta Plepi, Vlash Plepi, Teologë

- Përshpirtje e veprimtari për Konstandin Kristoforidhin - nga Atë Stavri Çipi

- Deklaratë proteste e besimtarëve orthodhoksë të Beratit - Jemi të indinjuar nga cenimi i rrethimit të Katedrales së Tiranës

- Mitropolia e Korçës - Shteti, në bazë të Marrëveshjes, duhet të ishte ruajtës i objekteve kishtare

- NGA PROTESTA - E klerit të hirshëm të Mitropolisë së Shenjtë të Gjirokastrës - Për provokimin në Katedralen “Ngjallja e Krishtit, në Tiranë

- “Si të jetojmë një jetë me Krishtin” - Takim njëditor me të rinjtë orthodhoksë të Kyepiskopatës së Tiranës

- Tiranë - Takim i Lidhjes së Intelektualëve Orthodhoksë
Doli në qarkullim SINAKSARI - Vëllimi I, Shtator-Tetor
 
Doli në qarkullim SINAKSARI
 
Vëllimi I, Shtator-Tetor
 
 
    Ka pak kohë që në pikat e shitjes pranë kishave ortodokse në të gjithë vendin mund të gjesh edhe botimin më të fundit të Kishës Orthodhokse Autoqefale të Shqipërisë – SINAKSARIN, Jeta e shenjtorëve të Kishës Orthodhokse, Vëllimi I, muajt shtator-tetor.
 
    Ai është i pajisur me një Hyrje shpjeguese dhe me një parathënie nga Kryepiskopi Anastas, i cili ndër të tjera thotë: “Ekzistojnë rrëfime të shumta për jetën dhe kryesisht për martirizimin e shenjtorëve të ndryshëm, të cilat janë ruajtur si thesare në librat e quajtur “Sinaksarë”. Në mjaft raste, për arsye të dobisë shpirtërore, tregimet në fjalë bëhen në mënyrë të lirë, me shtesa të elementëve që nuk janë saktësuar. Nga shumica e përmbledhjeve që qarkullojnë, parapëlqyem për përkthim në gjuhën shqipe botimin e Sinaksarit që ka hartuar Manastiri i hirshëm i SimonoPetrës në Malin e Shenjtë Athos, sepse mbështetet në burimet më të mira dhe është hartuar me një përpunim kritik serioz. Ky vëllim përmban jetët e shenjtorëve, të cilët Kisha Orthodhokse i nderon dhe i kremton gjatë muajve shtator-tetor. Vepra do të plotësohet me botimin e vëllimeve të tjera, që do të përmbajnë shenjtorët që kremtohen gjatë muajve të tjerë. “
 
    Eshtë në proces puna për botimin edhe të muajve të tjerë, pasi secili vëllim do jetë mjaft voluminoz. Vëllimi i parë ka rreth 700 faqe dhe përfshin jetët e qindra shenjtorëve të krishterë orthodhoksë.
 
 
TË PAKTËN, KINI RESPEKT PËR TË VËRTETËN!
 
TË PAKTËN, KINI RESPEKT PËR TË VËRTETËN!
 
Replikë e botuar sot në gazetën “DITA” (11.03.2015)
 
Redaksisë së Gazetës “Dita”
 
 
    Gazeta juaj përsëri i habiti orthodhoksët shqiptarë me sulmin kundër Kishës Orthodhokse dhe me minimin që i bën në mënyrë indirekte harmonisë fetare. Në numrin e saj të datës 23 shkurt 2015, z. Bedri Islami, duke marrë shkas nga një deklaratë e shkurtër e Nënkryetarit të Parlamentit, z. Vangjel Dule, botoi një artikull të gjatë, gjoja “analizë”, me titull “Të rivrasim papa Kristo Negovanin”. Ky artikull është i mbushur me referime të pavërteta dhe të pabazuara në histori. Nga ana tjetër, më 28 shkurt 2015, në gazetën tuaj u botua një tjetër artikull me titull: “Na mjafton një Shën Kozma”, i prof. Skënder Gjonit, me sulme, pa lidhje me të vërtetën, kundër Kryepiskopit tonë, me etiketime të sëmura ndaj personazheve politikë dhe në përgjithësi i mbushur plot urrejtje kundër Greqisë, me hiperbola retorike e fantazime rreziqesh për të ardhmen. Qarqet në të cilat bëjnë pjesë të dy artikullshkruesit zbatojnë taktikën e njohur: “Shpif, shpif, se diçka do të mbetet”, e kjo ka vlerë veçanërisht për njerëzit e thjeshtë që nuk e dinë si është e vërteta. Kështu errësojnë persona dhe ngjarje me blozën e errët të dyshimit të lig. Ne që po ju drejtohemi, jemi klerikë dhe laikë besimtarë orthodhoksë shqiptarë, që prej shumë vitesh e njohim fare mirë realitetin dhe ndjejmë detyrimin që të flasim për të vërtetën në mënyrë analitike.  
 
    Z. Islami, që nuk është anëtar i Kishës Orthodhokse, ripërtyp retorika të dala mode, pohime dhe shpifje të cilat orthodhoksët i kanë denoncuar në vazhdimësi si të gënjeshtërta dhe që nuk përkojnë me realitetin. Ai ngul këmbë se Kryepiskopi “e ka mbushur Shqipërinë me priftërinj grekë”. Ia bëjmë të qartë se në Shqipëri, përveç Kryepiskopit  janë vetëm 4 klerikë qytetarë grekë, nga të cilët një është arvanitas dhe 5 gra laike. Ndërsa në komunitetet e tjera fetare punojnë me qindra klerikë, murgesha dhe laikë të huaj, pjesa më e madhe e të cilëve nuk flasin fare gjuhën shqipe dhe predikojnë në gjuhë të huaj. Prej fillimit të vitit 1992, Kryepiskopi Anastas u përpoq të krijojë një kler shqiptar të arsimuar dhe deri më sot ka dorëzuar më tepër se 160 klerikë shqiptarë.
 
    Z. Islami përsërit tezën se në Kishën Orthodhokse Liturgjia Hyjnore kryhet në gjuhën greke. Me siguri që nuk ka vizituar ndonjë kishë orthodhokse ku meshohet: në Shkodër, Durrës, Tiranë, Elbasan, Vlorë, Berat, Korçë etj., që të ndjekë ndonjë shërbesë. Nëse do ta kishte bërë këtë, do të ishte siguruar se të gjitha bëhen në gjuhën shqipe. Por, në fund të fundit, përse tërë kjo armiqësi ndaj gjuhës greke, në të cilën janë shkruar Ungjijtë dhe ku kryhet lavdërimi i Perëndisë për shekuj në Kishën Orthodhokse? Ditën dhe natën në qytete dhe fshatra të Shqipërisë dëgjohen lutje në arabisht. Por kur dikush lexon një lutje në gjuhën greke, pseudopatriotë të ndryshëm rendin të thërrasin “Skandal! Rrezik!”. Vallë si e konceptojnë lirinë fetare këta njerëz? Apo mos vallë Greqia është një vend armik? Në Greqi kanë gjetur punë me qindra mijëra shqiptarë, duke ndihmuar në përgjithësi ekonominë e këtushme. Sigurisht që të ardhmen e Shqipërisë nuk e ndihmon propaganda nacionaliste kundër fqinjëve, fobitë dhe urrejtja. Shkaku që dëgjohen zëra ekstremistë nacionalistë kundër Kryepiskopit Anastas, është fakti se ai beson dhe kontribuon në respektin e ndërsjellë dhe në mirëkuptimin midis popujve. Mos vallë gjatë gjithë këtyre viteve qeveritë shqiptare thonë gënjeshtra, kur pohojnë se vendi fqinj është “partner strategjik”? Se jemi së bashku në NATO etj? Se po ecim së bashku në Evropën e Bashkuar? Përse kjo skizofreni?
 
    Të dy artikullshkruesit nuk dinë as emrin e saktë të Kishës sonë. Ky emër nuk është Kisha Autoqefale Shqiptare, por “Kisha Orthodhokse Autoqefale e Shqipërisë”. Emri i vërtetë i Kishës sonë (që nga koha që ka Autoqefalinë), tregon se të gjithë banorët orthodhoksë të vendit, pavarësisht origjinës (shqiptarë, grekë, arumunë, sllavë etj.) janë anëtarë të kësaj Kishe me të drejta të barabarta. Sa i takon Kosinës, Përmetit dhe Boboshticës janë sajesa arbitrare. Kryepiskopi nuk ka pasur kurrë lidhje me to. Për përdhosjen e kishës në Përmet është diskutuar shumë dhe kjo çështje është trajtuar deri dhe në Parlamentin Evropian, ndaj nuk nevojitet të zgjatemi. Duke kapërcyer çdo lloj caku paturpësie ose duke mos njohur kuptimin e fjalëve, z. Islami mbërriti në pikën e fundit të mjerimit, duke e quajtur Kryepiskopin tonë “nekrofil”. Le të hapë fjalorin dhe le të mësojë se kjo fjalë është greqisht dhe do të thotë “devijacion seksual, kontakt erotik me të vdekur” (- nekrofili= dëshirë patologjike për kontakt seksual me kufoma, - nekrofil, që vuan nga nekrofilia). Me vulgaritete të këtij lloji ndërmerr të fyejë një personalitet të tërëndritshëm, të njohur për moralin e kristaltë.
 
    Z. Islami gjithashtu e akuzon Kryepiskopin se ndërton kisha. Mëkat është ky? Me veprën e tij, me të vërtetë të mrekullueshme, që ka kryer, Kryepiskopi ka ndihmuar jo vetëm komunitetin orthodhoks, por u ka ofruar punë qindra familjarëve shqiptarë, duke ndihmuar ekonominë shqiptare në përgjithësi. Kryepiskopi Anastas, nuk erdhi në Shqipëri dje dhe as nuk fshihet ndokund. Ka mbi 23 vjet që jeton e punon këtu. Ne e kemi ndjekur nga afër në të gjitha vështirësitë dhe sprovat e vendit. Ai u ka qëndruar pranë njerëzve në nevojë, duke i ndihmuar ata pa bërë dallime fetare ose të tjera, duke i mbështetur me të gjitha fuqitë (si, në peripecitë e vitit 1997, në Vlorë me tragjedinë e Otrantos, në përmbytjet e ndryshme në Veri dhe në Jug të vendit, duke ofruar gjatë gjithë këtyre viteve me qindra tonë ushqime, ilaçe, veshje etj.). Në periudhën e vështirë të vitit 1999, me iniciativën e tij u mobilizuan organizmat fetarë ndërkombëtarë, si Këshilli Botëror i Kishave dhe arriti të mbledhë mbi 10 milionë dollarë për të ndihmuar 33000 refugjatë të fesë myslimane nga Kosova. Sigurisht, z. Islami i injoron të gjitha këto fakte ashtu siç injoron p.sh. dhe Qendrën Diagnostike Mjekësore, të cilën Kryepiskopi e ka themeluar dhe e ka pajisur me aparaturat më të mira e më bashkëkohore, e cila vetëm në 12 vitet e fundit u ka shërbyer qindra mijë shqiptarëve, pa bërë diferencime. Për këto nuk kërkoi kurrë as shpërblim dhe as mirënjohje. Dhe sigurisht, as nuk priste kaq shumë helm dhe kaq shumë urrejtje për faktin se ka 23 vjet rresht që  i bën vetëm  mirë Shqipërisë.
 
    Z. Islami akuzon Kryepiskopin se pranon delegacione greke. Kryepiskopi takohet me delegacione dhe ambasadorë zyrtarë, parlamentarë nga vende të ndryshme. Ai vetë është  personalitet ndërkombëtar i njohur dhe i respektuar, dhe është e natyrshme që shumë veta duan ta takojnë. Edhe kjo është e dyshimtë? Madje edhe faktin se disa qarqe në Greqi, gjatë periudhës së vështirë që përballej vendi i tyre, e propozuan Kryepiskopin për President të Republikës së Greqisë, si një person të pranuar gjerësisht, i dashur dhe i respektuar nga të gjithë, u munduan ta paraqesin si provë të rrezikshmërisë së tij. Sigurisht, Kryepiskopi shpejtoi të deklarojë se “hierarku orthodhoks ka një detyrë kishtare konkrete dhe nuk mund të ketë poste politike”. Të dy artikullshkruesit në fjalë rreken ta paraqesin si politikan Kryepiskopin.  Është më se e qartë se paragjykimi etnik ua errëson logjikën. Por personaliteti i tij nuk është i njohur dhe i respektuar vetëm në Greqi. Ai njihet dhe respektohet dhe në ambiente kishtare ndërkombëtare. Shumë organizma ndërkombëtarë, si Këshilli Botëror i Kishave, Konferenca e Kishave Evropiane, por edhe organizmi mbarëbotëror fetar “Fetë për Paqen” (Religions for Peace),  e kanë vlerësuar me nderet më të larta. Shumë universitete në vende të ndryshme të botës e kanë shpallur “Doktor Nderi”. Gjithashtu edhe në Shqipëri është shpallur “Qytetar Nderi” i Tiranës, i Korçës dhe është nderuar me urdhrin “Gjergj Kastrioti Skënderbeu” nga Presidenti i Republikës z. B. Topi.
 
    Në lidhje me dashurinë e Kryepiskopit për gjuhën shqipe, Fortlumturia e Tij studion vazhdimisht, lexon, kupton dhe flet saktë shqip. Ai mbërriti në Shqipëri në moshë të madhe (62 vjeç) dhe nuk ka mundësi të bëjë referate ose predikime. Por dihet nga të gjithë se meshon dhe mban mesazhe televizive në gjuhën shqipe. Respektin dhe dashurinë e tij për gjuhën shqipe e tregon gjithashtu fakti se që në vitin 1994 ngriti shtypshkronjën për botimin e periodikëve, gazetave, librave në gjuhën shqipe, përkujdeset për botimin e dhjetëra librave në shqip. Madje ka ngritur dhe financuar shkolla të të gjitha niveleve, ka dhënë bursa për mijëra nxënës për arsimimin e tyre në gjuhën shqipe. Ai i nxit vazhdimisht klerikët dhe bashkëpunëtorët e tij për një njohje sa më të mirë të saj. Për herë të parë në histori nga goja e tij u dëgjuan thënie liturgjike në shqip, në Konstandinopojë, Athinë, Bukuresht, Moskë, në Nish të Serbisë, në Sofie, Damask, Bejrut, Aleksandri etj., gjatë bashkëmeshimeve me primatë të tjerë orthodhoksë.
 
    Deri më sot u është dhënë shtetësia shqiptare qindra të huajve, turq, arabë, italianë, etj., që më së shumti nuk i njeh kush. Dhe gjoja na qenka e rrezikshme t’i jepet një greku, që shërbeu dhe punoi në një nga periudhat më të vështira për përparimin dhe begatinë e Shqipërisë, për vëllazërimin, mirëkuptimin e ndërsjellë dhe ndihmën reciproke midis popujve të Ballkanit. Problemi nuk krijohet nga dhënia e nënshtetësisë shqiptare, por nga mosdhënia e saj një personaliteti që ka ndihmuar Shqipërinë nga ana humanitare, kulturore dhe ekonomike, siç e parashikon ligji për dhënien e nënshtetësisë. Bëhet fjalë për një fyerje jo vetëm ndaj një personi, por kjo është fyerje ndaj komunitetit më të madh të krishterë të vendit. Kryepiskopi ynë e ka përfaqësuar dhe nderuar më së miri Kishën tonë Orthodhokse Autoqefale të Shqipërisë dhe vetë vendin, në ambiente fetare në rang botëror.
 
    Nga viti 1991 e deri tani që po flasim, kanë ndryshuar qeveri, presidentë, kryeministra. Shumica e tyre e vlerësojnë veprën dhe personalitetin e Kryepiskopit Anastas. E njohin si udhëheqësin e Kishës Orthodhokse Autoqefale të Shqipërisë. Emri i tij me cilësinë e Kryepiskopit përmendet edhe në ligjin nr. 10057 22/1/2009 dhe gjendet në vendime të gjykatave shqiptare. Shumë vende të zhvilluara do ta kishin për nder të rreshtonin me dëshirë ndër qytetarët e tyre një personalitet të këtij niveli. Të gjitha Kishat Orthodhokse në mbarë botën, e nderojnë në mënyrë të veçantë dhe e respektojnë (gjë që u shfaq më së miri në Shenjtërimin e Kishës Katedrale të Ngjalljes së Krishtit në Tiranë, më 1 qershor 2014).
 
    Fakti se ka pasur edhe të tjerë që e kanë luftuar për arsye të ndryshme, nuk na habit. Historia e Kishës është e mbushur me shembuj të tillë të ngjashëm. Krishti i paralajmëroi me kohë nxënësit e Tij: “Nëse më kanë përndjekur mua dhe ju do t’ju përndjekin” (Jn.15:20). Dhe për më tepër “Të lumur jeni kur t’ju poshtërojnë dhe t’ju përndjekin dhe të thonë çdo fjalë të ligë kundër jush me gënjeshtër për shkakun tim” (Matth.5:11).
 
    Kot shqetësohet z. Gjoni teksa thur fantazi për të ardhmen. Respekti i orthodhoksëve për shenjtërinë e një personi nuk lidhet me kombësinë dhe shtetësinë e tij. Kritere të tjera kanë rëndësi. Ndërgjegjja e shqiptarëve orthodhoksë për shenjtërinë e Shën Kozmait (të cilën e luftojnë me mllef qarqe të caktuara antiorthodhokse), nuk ka lidhje me ndonjë lloj shtetësie. Në atë kohë ai ishte nënshtetas i Perandorisë Osmane, siç kanë qenë edhe të gjithë shqiptarët. Kisha Orthodhokse Autoqefale e Shqipërisë nuk është, siç do ta donin disa, një farë shoqate etnike, OJQ, që u krijua në shekullin e 20-të. Është themeluar nga Vetë Jisu Krishti. Pikërisht Këtë kanë orthodhoksët si udhëheqës dhe shembull. Orthodhoksia ka karakter ekumenik, të mbarëbotshëm. Kisha ka perspektivë mbarënjerëzore, me qëllim vëllazërimin e njerëzve dhe popujve në një shoqëri të dashurisë. 
 
    Kur Kryepiskopi Anastas erdhi në Shqipëri, Kisha Orthodhokse Autoqefale e Shqipërisë ishte krejtësisht e shkatërruar. Ai kontribuoi më shumë se kushdo tjetër për ringritjen e saj, zhvillimin e plotë në një nivel që kurrë nuk është njohur më parë. Vepra e jashtëzakonshme fetare, sociale, shkencore, filantropike e Kryepiskopit Anastas është gjerësisht e njohur në qarqet ndërkombëtare kishtare. Ka prova të pakundërshtueshme, bilance zyrtare, libra, artikuj, në shumë gjuhë. Kisha e mrekullueshme katedrale në qendër të Tiranës, por edhe të tjera në Korçë, Berat, Fier, Shkodër, Durrës, do të na rikujtojnë kontributin e tij historik, të cilin më kot përpiqen ta vënë në pikëpyetje ata që ushqejnë dashakeqësi ndaj tij. Atë do ta kujtojnë me mirënjohje mijëra shqiptarë të të gjitha moshave, sepse i ndihmoi pa u kërkuar gjë. Por mbi të gjitha, figura dhe vepra e tij janë të vlerësuara lart në ndërgjegjen e besimtarëve orthodhoksë.
 
    Është koha, pra, që të gjithë ata që dëshirojnë me të vërtetë bashkekzistencën paqësore fetare të ndalojnë së fyeri, me të padrejtë dhe pa argumente, gjykimin e drejtë dhe patriotizmin e ne qindra mijëra shqiptarëve besimtarë orthodhoksë, që mburremi, dhe sinqerisht lavdërojmë Perëndinë që kreu i Kishës sonë është Kryepiskopi Anastas.
 
 
    Tiranë, 3 mars 2015
 
Prof. dr. Robert Andoni
 
Prof. dr. Aleksandër Sallabanda
 
Atë Emanuel Lusha
 
Atë Ilia Mazniku
Shërbesë përshpirtjeje dhe veprimtari me rastin e 50-vjetorit të fjetjes së Imzot Theofan Nolit
    Në një atmosferë festive, pas Liturgjisë Hyjnore, u përkujtua 50-vjetori i fjetjes së Imzot Theofan Nolit (13 mars 1965). Me këtë rast u krye Shërbesa e Përshpirtjes, që u drejtua nga Episkopi i Apollonisë, Hirësi Nikolla. Pastaj, të pranishmit morën pjesë në ceremoninë e vendosjes së emrit të Imzot Theofanit rrugës pranë kishës.
 
     Gjithashtu, vijoi edhe një program i pasur me himne kishtare, poezi dhe referate në lidhje me jetën dhe veprën e Imzot Theofan Nolit. Veprimtaritë u kryen me bekimin e  Fortlumturisë së Tij, Kryepiskopit të Tiranës, Durrësit dhe të Gjithë Shqiperisë, Imzot Anastasit. Në këto aktivitete morrën pjesë Kryetari i Bashkisë së Durrësit z.Vangjush Dako, autoritete vendore, përfaqësues të komuniteteve fetare, intelektualë dhe besimtarë të shumtë.
 
 
 
Çaste nga veprimtaritë në perkujtim të Imzot Theofan Nolit
 
 
 
    Video për veprimtaritë: Top Channel - https://www.youtube.com/watch?v=ZuoJsgS9F5c 

Deklaratë proteste e besimtarëve orthodhoksë të Beratit
 
Jemi të indinjuar nga cënimi i rrethimit të Katedrales së Tiranës
 
    Komuniteti i Krishterë Orthodhoks i Beratit, i indinjuar, proteston për ekzekutimin e vendimit të njëanshëm të Qeverisë për të hequr rrethimin e Kishës Katedrale “Ngjallja e Krishtit” në qendër të Tiranës. Ky veprim cenon rëndë autoritetin kishtar, por edhe sigurinë e Kishës dhe të objekteve që ndodhen brenda rrethimit.
 
    Ne solidarizohemi me vëllezërit tanë të komunitetit orthodhoks të Tiranës dhe u qëndrojmë pranë në këto ditë të vështira duke dëshmuar unitetin tonë, jo vetëm në këtë rast por në të gjitha  sprovat e vazhdueshme që ka kaluar dhe po kalon Kisha jonë.
 
    I bëjmë thirrje Qeverisë, e cila krenohet në botë me harmoninë tonë fetare, të respektojë dhe të jetë garante e “Marrëveshjes ndërmjet Këshillit të Ministrave dhe Kishës Orthodhokse Autoqefale të Shqipërisë” dt. 22/01/2009 ligji 10057, duke mbrojtur vendet e shenjta dhe duke rritur sigurinë e tyre.
 
    Shpresojmë që autoritetet qeveritare të reflektojnë rreth këtij veprimi si dhe të bashkëpunojnë për të gjetur në kohë zgjidhjen e këtij problemi.
 
Berat, më 08/03/2015
 
 
DEKLARATË, PROTESTË PËR PRISHJEN E RRETHIMIT TË KATEDRALES
 
 
 
 
Deklaratë për Mediat nga Mitropolia e Shenjtë Korçë
 
Deklaratë për Mediat nga Mitropolia e Shenjtë Korçë 
pas prishjes së rrethimit të Katedrales "Ngjallja e Krishtit" Tiranë
 

Nga protesta e klerit të Mitropolisë së Gjirokastrës
 
NGA PROTESTA E KLERIT TË MITROPOLISË SË GJIROKASTRËS
PËR PROVOKIMIN NË KISHËN KATEDRALE “NGJALLJA E KRISHTIT”, NË TIRANË
 
    Ne, klerikët e Mitropolisë së Shenjtë të Gjirokastrës, në emër edhe të enorive në të cilat shërbejmë, bashkojmë zërin tonë të protestës për provokimin shumë të rëndë në dëm të Kishës sonë. Ajo që u bë, duke shkelur pronën e Kishës së Hirshme Katedrale të Ngjalljes së Krishtit, nuk është çështje vetëm e pak metrave truall.
 
    Nuk është i rastësishëm zgjedhja e objektivit. Në zemër të Kryeqytetit dhe në mes të Kreshmës së Madhe. Bëhet fjalë për mentalitete të cilat nuk kemi asnjë predispozicion t’i pranojmë pa protestuar.
 
    Me po të njëjtën sjellje acaruese po përballemi edhe gjatë këtyre ditëve në Gjirokastër, në Enorinë e Kryeengjëjve, në lagjen Varrosh.
 
    Ne klerikët dhe besimtarët Orthodhoksë jemi të bashkuar rreth Kryepiskopit tonë Anastas për të denoncuar këto akte abuzimi dhe njëherësh të paralajmërojmë se përbëjnë në thelb minim të bashkekzistencës paqësore.
 
    Nuk kemi për ta ndërprerë protestën tonë, sepse shteti na ka borxh shumë, tepër shumë. Jetët e vëllezërve tani priftërinj që u ekzekutuan nga regjimi i mëparshëm, vlerat e pazëvendësueshme të të shenjtave që u grabitën në kishat tona, vetë kishat që na i rrëzuan nga themelet apo i përdhosën, pasurinë e paluajtshme të manastireve tona që ende nuk po na e dorëzojnë. Le të mos shtohen edhe të tjera episode.
 
 
Gjirokastër, më 5 mars 2015
PROTESTË - Për prishjen e rrethimit të Katedrales së Tiranës
 
KISHA ORTHODHOKSE AUTOQEFALE E SHQIPËRISË
 
 
PROTESTË
 
 
    Kisha Orthodhokse Autoqefale e Shqipërisë proteston kundër vendimit të Qeverisë për të hequr rrethimin e Kishës Katedrale “Ngjallja e Krishtit” në qendër të Tiranës. Ky veprim vë në rrezik sigurinë e këtij vendi të shenjtë, ku vijnë njerëz të çdo moshe e në mënyrë të veçantë shumë të rinj dhe fëmijë.
 
    Kompleksi i Kishës Katedrale ka tri hyrje në katin e nëndheshëm (atë të Qendrës Kulturore, sallat e rinisë dhe të fëmijëve, si dhe sallën e prezantimit të librave). Ruajtja e gjithë këtyre ambienteve bëhet pothuajse e pamundur pa pasur një rrethim elementar të jashtëm, veçanërisht kur bie nata dhe në kushtet e mungesës së sigurisë ku jetojmë sot.
 
    Vendimi i Qeverisë u mor në tetor 2014, pa informuar Kishën Orthodhokse. Lajmërimi i parë dhe dërgimi i planit urbanistik iu bë Kishës nga firma ndërtuese që mori përsipër punimet, më 12 janar 2015. Më 14 janar, u dha premtimi nga ana e Qeverisë se do të hartohej një plan i ri, për të cilin do të ekzistonte një marrëveshje përfundimtare, ku do të binin dakord të dyja palët. Plani i ri që u dërgua vetëm në fund të muajit shkurtit në 2/3 e tij ishte i njëjtë me atë të mëparshëm. Përfaqësuesi i Kishës u përgjigj se nuk jemi plotësisht dakord me planin e ri. Më 2 mars punëtorët e firmës ndërtuese, pa një njoftim zyrtar, prenë rrethimin me kangjella dhe shkulën vargun e qiparisave dhe të bimëve të tjera dekorative të anës veriore të kompleksit.
 
    Oborri i Kompleksit është njëkohësisht edhe tarraca e kateve të nëndheshme të Kompleksit ku ndodhen makineri të shtrenjta të ajrimit, depozita nafte dhe uji si dhe instalime komplekse elektrike. Këto ndërhyrje arbitrare përbëjnë rrezik për sigurinë si të sipërfaqes së oborrit, ashtu dhe të kateve të nëndheshme.
 
    Këto veprime vijnë në kundërshtim të hapur me ligjin 10057/ datë 22.1.2009 “Marrëveshja ndërmjet Këshillit të Ministrave dhe Kishës Orthodhokse Autoqefale të Shqipërisë” që garanton respektimin dhe mbrojtjen e vendeve të shenjta të Kishës Orthodhokse. Jemi të detyruar të protestojmë kundër këtyre shkeljeve që plagosin ndjenjat e të krishterëve orthodhoksë dhe bashkëjetesën paqësore fetare.
 

SQARIM PËR PIKËN KRYESORE TË PROTESTËS

 

    Mbi të gjitha protestojmë për konfiskimin de facto të planifikuar të vendit të shenjtë të Kishës Katedrale Orthodhokse “Ngjallja e Krishtit” në qendër të Tiranës. Me heqjen e kufirit perëndimor të truallit, pronë e Kishës, dhe kthimit të tij në ambient publik, vendi i shenjtë i oborrit të hyrjes së Kishës, bëhet shesh publik, ku gjatë njëzet e katër orëve mund të shkelë kushdo, madje edhe kafshët pa zot. Këtë veprim e konsiderojmë sakrilegj dhe fyerje tjetër të radhës kundër Kishës Orthodhokse.  

 
Tiranë, 4 mars 2015
 
 
 
Nga libri i Profetit - Isaia 49:6-10. Nga Gjeneza 31:3-16. Nga libri i Fjalëve të Urta 21:3-21.
Nga libri i Profetit - Isaia 49:6-10.
 
Ai thotë: "Është tepër pak që ti të jesh shërbëtori im për të lartuar përsëri fiset e Jakobit dhe për të kthyer ata që kanë shpëtuar nga Izraeli. Të kam vendosur si dritën e kombeve, me qëllim që të jesh Shpëtimi im deri në skajet e tokës".
 
Kështu i thotë Zoti, Çliruesi i Izraelit, i Shenjti i tij, atij që përbuzet nga njerëzit, që urrehet nga kombi, shërbëtorit të sundimtarëve: "Mbretërit do të shohin dhe do të ngrihen, princat do të bien përmbys për shkak të Zotit që është besnik të Shenjtit të Izraelit që të ka zgjedhur.
 
Kështu thotë Zoti: "Në kohën e hirit unë ta kam plotësuar dëshirën dhe në ditën e shpëtimit të kam ndihmuar; do të të ruaj dhe do të të bëj aleancën e popullit, për ta ringjallur vendin, për të të shtënë në dorë trashëgimitë e shkatërruara, për t'u thënë robërve: "Dilni", dhe atyre që janë në terr: "Shfaquni". Ata do të kullosin gjatë rrugëve dhe në të gjitha lartësitë e braktisura do të kenë kullotat e tyre.
 
Nuk do të kenë as uri as etje, nuk do të goditen më as nga vapa as nga dielli, sepse ai që ka mëshirë për ta do t'i udhëheqë dhe do t'i çojë te burimet e ujit.
 
Nga Gjeneza 31:3-16.
 
Pastaj Zoti i tha Jakobit: "Kthehu në vendin e etërve të tu dhe te fisi yt, dhe unë do të jem me ty". Atëherë Jakobi dërgoi e thirri Rakelën dhe Lean, që të vinin në fushat pranë kopesë së tij, dhe u tha atyre: "Unë e shoh që fytyra e atit tuaj ndaj meje nuk është si më parë; por Perëndia i atit tim ka qenë me mua. Dhe ju e dini se unë i kam shërbyer atit tuaj me tërë forcën time, ndërsa ati juaj më ka mashtruar dhe ka ndryshuar pagesën time dhjetë herë, por Perëndia nuk e lejoi të më bëjë të keq.
 
Në qoftë se ai thoshte: "Krerët laramane do të jenë pagesa jote", e tërë kopeja pillte qengja laramane; dhe po të thoshte: "Krerët vija vija do të jenë pagesa jote", tërë kopeja pillte qengja vija vija. Kështu Perëndia ia hoqi bagëtinë atit tuaj dhe ma dha mua. Një herë, në kohën kur kopetë hynin në afsh, unë ngrita sytë dhe pashë në ëndërr që cjeptë që ndërzenin femrat ishin vija vija, me pulla dhe lara lara. Dhe engjëlli i Perëndisë më tha në ëndërr: "Jakob!". Unë iu përgjigja: "Ja ku jam!". Atëherë ai tha: "Ço tani sytë dhe shiko: tërë deshtë që ndërzejnë femrat janë vija vija, me pulla dhe lara- ara, sepse pashë të gjitha ato që të punon Labano. Unë jam Perëndia i Bethelit, ku ti ke vajosur një përmendore dhe më lidhe një kusht.
 
Tani çohu, lëre këtë vend dhe kthehu në vendlindjen tënde". Rakela dhe Lea iu përgjigjën dhe i thanë: "Mos kemi ndoshta ne akoma pjesë dhe trashëgimi në shtëpinë e atit tonë? A nuk na ke trajtuar si të huaja për arsye se na ka shitur dhe veç kësaj ka ngrënë edhe paratë tona? Të gjitha pasuritë që Perëndia i hoqi atit tonë janë tonat dhe të bijve tanë; prandaj bëj të gjitha ato që Perëndia të ka thënë".
 
Nga libri i Fjalëve të Urta 21:3-21.
 
Të zbatosh drejtësinë dhe paanësinë është një gjë që i pëlqen Zotit më shumë se flijimi. Sytë krenarë dhe një zemër kryelartë, që janë llamba e të pabesëve, janë mëkat. Synimet e njeriut të kujdesshëm çojnë me siguri në bollëk, por ai që ngutet do të bjerë me siguri në varfëri. Të përfitosh thesare me një gjuhë gënjeshtare është një kotësi kalimtare e atij që kërkon vdekjen. Dhuna e të pabesëve merr tutje, sepse ata nuk pranojnë të zbatojnë drejtësinë. Rruga e njeriut të fajshëm është dredha dredha, por njeriu i drejtë vepron ndershmërisht. Është më mirë të banosh mbi qoshen e një çatie se sa në një shtëpi bashkë me një grua grindavece.
 
Shpirti i të pabesit dëshiron të keqen; as shoku i tij nuk gjen mëshirë në sytë e tij. Kur tallësi ndëshkohet, i thjeshti bëhet i urtë; por kur i urti mësohet ai fiton dije. I drejti vëren me kujdes shtëpinë e të pabesit dhe përmbys të pabesët, sepse janë të këqij. Kush mbyll veshin ndaj britmës së të varfërit, do të bërtasë edhe ai, por nuk do të ketë përgjigje. Një dhuratë që bëhet fshehtas e fashit zemërimin dhe një dhuratë që jepet nën dorë qetëson zemërimin e fortë. Të bësh atë që është e drejtë është një gëzim për të drejtin, por është një rrënim për ata që kryejnë paudhësi.
 
Njeriu që largohet nga rruga e maturisë ka për të banuar në kuvendin e të vdekurve. Ai që i do qejfet do të jetë në varfëri, ai që e do verën dhe vajin nuk do të pasurohet. I pabesi do t'i shërbejë si shpërblim të drejtit; dhe i paudhi në vend të njerëzve të drejtë. Është më mirë të banosh në një shkretëtirë se sa me një grua grindavece dhe ngacmuese. Në shtëpinë e të urtit ka një thesar të çmuar dhe vaj, por njeriu budalla i bën të gjitha rrush e kumbulla.
 
Kush ndjek drejtësinë dhe dhembshurinë ka për të gjetur jetën, drejtësinë dhe lavdinë.
 

 

Leximet biblike të ditës - VIDEO

Hierodëshmor Ipati i Gangrës. Omologjet Akaqi. Inocenti i Moskës.
Hierodëshmor Ipati i Gangrës.
 
Ishte episkop i Gangrës, episkopatë e rëndësishme në Paflagoni, në veri të Azisë së Vogël, në kohën e shën Konstandinit të Madh. Mori pjesë në Sinodin e Nikesë (325) dhe solli shumë heretikë në besën e drejtë me mësimet dhe shkrimet e tij të frymëzuara. Në çdo dioqezë ngriti kisha në të cilat caktoi priftërinj të formuar. Ngriti dhe shtëpi bamirësie. Rrugëtimet e tij baritore i bënte me një mushkë i shoqëruar nga dy murgj. Mënyra e jetesës së tij i përngjante shën Joan Pagëzorit, dhe me gjithë përgjegjësitë e tij si bari, jetonte në qetësi, si murg dhe preferonte të tërhiqej në një shpellë, të lutej e të meditonte mbi Shkrimin e Shenjtë.
 
Në qetësinë e shpellës së tij dha substancën e shkrimeve të tij, dhe në veçanti të komentit të Fjalëve të Urta të Solomonit, drejtuar një nxënësje të tij fisnike, Gajana. Pas leximit të librit ajo pati një transformim rrënjësor, kaq sa shpërndau tërë pasurinë te të varfrit. I ndihmonte besnikët e tij edhe me të mira materiale. Fama e tij si çudibërës arriti deri te perandori Konstant (352-360), i cili e thirri Ipatin në Konstandinopojë dhe i kërkoi ta çlironte nga një dragua i tmerrshëm që qëndronte para dyerve të thesarit perandorak dhe ndalonte hyrjen. Sapo shenjti u shfaq para dragoit, i lëshoi në gojë shkopin e tij dhe thirri emrin e Zotit tonë Jisu Krisht. E tërhoqi bishën dhe e hodhi në zjarrin që ishte bërë gati për të. Në shenjë mirënjohjeje, Konstanti gdhendi fytyrën e shenjtorit në portën e thesarit dhe e çliroi Gangrën nga taksat vjetore, të cilat i shtypnin të varfrit; edhe pse kishte simpati për shenjtin, nuk hoqi dorë nga herezia ariane. 
 
Në rrugën e kthimit, Ipati u kap nga skizmatikët novatorë që e urrenin. U hodhën mbi të dhe e goditën me gurë, me shkopinj e me shpata. Gjysmë i vdekur, shenjti gjeti pak fuqi për të thënë këto fjalë: “Zot, mos ua llogarit për mëkat” (Vep. 7:60). Një grua mori një gur dhe e qëlloi për vdekje. Vrasësit e fshehën trupin e tij në kashtë dhe u larguan. Pas pak kohësh, pronari i arës erdhi për të marrë kashtën e t’ua hidhte kafshëve, por dëgjoi zëra engjëllorë që psalnin dhe një dritë e mbulonte vendin ku prehej trupi i shenjtit. Banorët e Gangrës erdhën dhe e morën trupin e bariut të tyre dhe e vendosën në një arkë të shenjtë. Vrasësja pasi e qëlloi me gur shenjtin u demonizua, por kur preku lipsanin e tij u shërua. Varri i shën Ipatit u bë më pas një burim mrekullish.
 

 

Predikimi i së Djelës

 

Ungjillëzimi

    Festa e Ungjillëzimit të Virgjëreshës Mari është në 25 Mars, nëntë muaj para Krishtlindjes. Ajo është kremtimi i lajmërimit të lindjes së Krishtit te Virgjëresha Mari, siç është shkruar në Ungjillin e Shën Llukës: Në muajin e gjashtë, engjëlli Gabriel u dërgua nga Perëndia në një qytet të Galilesë, që quhej Nazaret, te një e virgjër, që ishte fejuar me një njeri që quhej Josif, nga shtëpia e Davidit; dhe emri i Virgjëreshës ishte Maria. Dhe engjëlli hyri te ajo dhe tha: "Gëzohu, o hirplote, Zoti është bashkë me ty; e bekuar je ti në mes të grave". Por, ajo kur e pa u turbullua nga fjalët e tij dhe pyeste vetveten çfarë kuptimi mund të kishte një përshëndetje e tillë. Dhe engjëlli i tha: "Mos ki frikë, Mari, sepse ke gjetur hir para Perëndisë. Dhe ja, ti do të mbetesh shtatzënë dhe do të lindësh një djalë dhe do t’ia vesh emrin Jisu. Ai do të jetë i madh dhe do të quhet Biri i Shumë të Lartit; dhe Zoti Perëndi do t’i japë fronin e Davidit, atit të tij; dhe do të mbretërojë mbi shtëpinë e Jakovit përjetë, edhe mbretëria e tij nuk do të ketë kurrë mbarim". Dhe Maria i tha engjëllit: "Si do të ndodhë kjo, përderisa unë nuk njoh burrë?" Dhe engjëlli, duke u përgjigjur, i tha: "Fryma e Shenjtë do të vijë mbi ty dhe pushteti i Shumë të Lartit do të të mbulojë me hijen e vet; prandaj edhe foshnja e shenjtë që do të lindë prej teje, do të quhet Bir i Perëndisë. Dhe ja, Elisabeta, far’ e fisi yt, edhe ajo, në pleqërinë e saj, mbeti shtatzënë me një djalë; dhe ky është muaji i gjashtë për atë, që e quanin shterpë, sepse me Perëndinë asgjë s’është e pamundshme". Atëherë Maria tha: "Ja shër-bëtorja e Zotit; le të më ndodhë sipas fjalës sate". Dhe engjëlli u largua prej saj (Lluka 1:26-38).

 

Radio "Ngjallja" Live


 

 

Patriarkana Ekumenike Patriarkana e Aleksandrisë

Patriarkana e Antiokisë
Patriarkana e Jerusalemit
Patriarkana e Rusisë
Patriarkana e Serbisë
Patriarkana e Rumanisë
Patriarkana e Bullgarisë
Patriarkana e Gjeorgjisë
Kisha e Qipros
Kisha e Greqisë
Kisha e Polonisë
Kisha e Shqipërisë
Kisha e Çekisë & Sllovakisë
 
 

Kryepiskopi Anastas

...

Read More

Vështrim i përgjithshëm 1991-2013

    Me rifitimin e lirisë së besimit, pas persekutimit të egër shumëvjeçar (1945-1...

Read More

Sinodi i Shenjtë

Sinodi i Shenjtë i Kishës Orthodhokse Autoqefale të Shqipërisë përbëhet nga: Kryepiskopi i ...

Read More

Besimi Orthodhoks

          Në këtë seksion të faqes sonë të internetit, be...

Read More

Historia e Kishës

            ...

Read More

Dhiata e Re

   Librat e parë të shkrimeve të Dhiatës së Re janë katër ungjijtë e Shën Mattheut, ...

Read More

Kryepiskopata e Shenjtë e Tiranës, Durrësit

Kryepiskop: Kryepiskopi i Tiranës, Durrësit dhe i gjithë Shqipërisë, Fortlumturia e Tij Anastasi. Episkopë Ndihmës: Episkopi i Apollonisë, Hirësia e Tij Nikolla;  Episkopi i Krujës, Hirësia e Tij Andoni. Episkopi i Amantias Hirësia e Tij Nathanail. Episkopi i Bylisit Hirësia e Tij Asti. Selia: Tiranë. Kisha Orthodhokse Autoqefale e Shqipërisë, Rr. e Kavajës 151, Tiranë, Albania. Tel. (00355) 4–2234.117, 4–2235.095, fax 4–2232.109.

 

______________________________________________

Mitropolia e Shenjtë e Beratit

Mitropolit: Mitropoliti i Beratit, Vlorës dhe Kaninës, Hirësia e Tij Ignati. Selia: Lagja "22 Tetori", Berat. Tel. (00355) 32–238 120, tel.- fax 32–238.120. 

Mitropolia e Shenjtë e Gjirokastrës 

Mitropolit: Mitropoliti i Gjirokastrës, Hirësia e Tij Dhimitri. Selia: Gjirokastër. Lagja 11 Janari, Gjirokastër. Tel. (00355) 84–242.66, fax 84–237.73.

___________________________________________

Mitropolia e Shenjtë e Korçës

 

Mitropolit: Mitropoliti i Korçës, Hirësia e Tij Joani. Selia: Korçë. Rr. "Kryepiskopi Anastas", nr. 2, Korçë, Albania. Tel. (00355) 82–242.876, fax 82–246.100. Epitrop Arkihieratik: Atë Ilia Kotnani.

Kalendari 2015