Zbulesa 20

1. Edhe pashë një engjëll duke zbritur nga qielli, i cili kishte çelësin e pafundësisë, dhe një varg të madh në dorën e tij.
2. Edhe zuri dragoin, gjarpërin e vjetër, i cili është djalli dhe Satanai; dhe e lidhi atë një mijë vjet.
3. Edhe e hodhi në pafundësi dhe e mbylli, dhe e vulosi sipër tij, që të mos mashtrojë më kombet, deri sa të mbarojnë të një mijë vjetët; dhe pas këtyre duhet të zgjidhet për pak kohë.
4. Edhe pashë frone; dhe ndenjën mbi ata, dhe iu dha atyre të gjykojnë; dhe pashë shpirtrat e atyre që ishin therur për dëshminë e Jisuit, dhe për fjalën e Perëndisë, dhe të cilët nuk iu falën bishës, as ikonës së saj; dhe nuk morën gërvishtjen mbi ballin e tyre dhe mbi dorën e tyre; dhe ata rrojtën e mbretëruan bashkë me Krishtin të një mijë vjetët.
5. Edhe të vdekurit e tjerë nuk u ngjallën, deri sa të mbushen të një mijë vjetët. Kjo është ngjallja e parë.
6. I lumtur dhe i shenjtë është ai që ka pjesë në ngjalljen e parë. Mbi këta vdekja e dytë s’ka pushtet, por do të jenë priftërinj të Perëndisë, dhe do të mbretërojnë bashkë me atë një mijë vjet.
7. Edhe kur të mbarojnë të një mijë vjetët, do të zgjidhet Satanai nga burgu i tij.
8. Edhe do të dalë të mashtrojë kombet që gjenden në të katër anët e dheut, Gogun e Magogun, që t’i mbledhë ata për luftë, numri i të cilëve është si rëra e detit.
9. Edhe u ngjitën mbi gjerësinë e dheut, dhe rrethuan ushtrinë e shenjtorëve, dhe qytetin e dashur; dhe zbriti zjarr prej qiellit nga Perëndia, dhe i hëngri.
10. Edhe djalli që i mashtronte ata, u hodh në liqenin e zjarrit e të squfurit, ku ishte bisha dhe profeti gënjeshtar; dhe do të mundohen ditë e natë, në jetë të jetëve.
11. Edhe pashë një fron të bardhë të madh, dhe atë që rrinte mbi të, faqe të cilit iku dheu dhe qielli; dhe nuk u gjet vend për ata.
12. Edhe pashë të vdekurit, të vegjël e të mëdhenj, që rrinin përpara Perëndisë, dhe librat u hapën; dhe u hap një libër tjetër, i cili është i jetës; dhe u gjykuan të vdekurit nga ato që ishin shkruar në librat, sipas veprave të tyre.
13. Edhe deti dha të vdekurit që ishin në të, dhe vdekja dhe hadi dhanë të vdekurit që ishin tek ata; dhe u gjykuan gjithësecili sipas veprave të tyre.
14. Edhe vdekja dhe hadi u hodhën në liqenin e zjarrit. Kjo është vdekja e dytë.
15. Edhe ai që nuk u gjet i shkruar në librin e jetës, u hodh në liqenin e zjarrit.