Zbulesa 13

1. Edhe ndenja mbi rërën e detit; dhe pashë një bishë që dilte nga deti, që kishte shtatë krerë e dhjetë brirë; dhe mbi brirët e saj dhjetë kurora, dhe mbi krerët e saj një emër blasfemie.
2. Edhe bisha që pashë shembëllente me leopard, dhe këmbët e saj ishin si të ariut, dhe goja e saj si gojë luani; dhe dragoi i dha asaj fuqinë e tij dhe fronin e tij dhe pushtet të madh.
3. Edhe pashë një nga krerët e saj si të plagosur për vdekje; dhe plaga e saj për vdekje u shërua; dhe gjithë dheu u çudit prapa bishës.
4. Edhe iu falën dragoit që i dha pushtet bishës, dhe iu falën bishës, duke thënë: Kush i ngjan bishës? Kush mund të luftojë me të?
5. Edhe iu dha asaj gojë që flet fjalë të mëdha dhe blasfemira, dhe iu dha asaj pushtet të bëjë luftë dyzet e dy muaj.
6. Edhe hapi gojën e saj me blasfemi kundër Perëndisë, që të blasfemojë emrin e tij, dhe tendën e tij, dhe ata që rrinë në qiell.
7. Edhe iu dha asaj të bëjë luftë me shenjtorët dhe t’i mundë; dhe iu dha asaj pushtet mbi çdo fis dhe popull dhe gjuhë dhe komb.
8. Edhe do t’i falen asaj gjithë ata që rrinë mbi dhe, emrat e të cilëve nuk janë shkruar në librin e jetës së Qengjit që është therur qëkurse është krijuar bota.
9. - Kush ka veshë, le të dëgjojë. -
10. Kush të sjellë tjetrin në skllavëri, në skllavëri do të shkojë; kush të vrasë me thikë, ai duhet të vritet me thikë. Këtu është durimi dhe besimi i shenjtorëve.
11. Edhe pashë një tjetër bishë që dilte nga dheu, dhe kishte dy brirë që shembëllenin me brirë qengji, dhe fliste si dragua.
12. Edhe bënte gjithë pushtetin e bishës së parë përpara saj; dhe bënte tokën dhe ata që rrinë mbi të t’i falen bishës së parë, së cilës plaga për vdekje iu shërua.
13. Edhe bënte shenja të mëdha, kaq sa edhe zjarr bënte të zbresë nga qielli mbi dhe përpara njerëzve.
14. Edhe mashtronte ata që rrinin mbi dhe me shenjat që iu dhanë asaj të bëjë përpara bishës, e u thoshte atyre që rrinin mbi dhe t’i bëjnë ikonë bishës që kishte plagën e thikës, dhe rroi.
15. Edhe iu dha asaj t’i japë frymë ikonës së bishës, aq sa edhe të flasë ikona e bishës, dhe të bëjë që të vriten ata që s’i falen ikonës së bishës.
16. Edhe bënte që të gjithë, të vegjlit e të mëdhenjtë, dhe të pasurit dhe të varfërit, dhe të lirët dhe skllevërit, të marrin një gërvishtje mbi dorën e tyre të djathtë, ose mbi ballet e tyre.
17. Edhe që të mos mundej ndonjë të blejë ose të shesë, përveç atij që ka gërvishtjen, ose emrin e bishës, ose numrin e emrit të saj.
18. Këtu është dituria; ai që ka mend le të bëjë llogari numrin e bishës; sepse është numër njeriu, dhe numri i saj është gjashtëqind e gjashtëdhjetë e gjashtë.