Jakovit 5

1. Ejani tani ju të pasurit, qani e ulërini për të këqijat që do të vijnë mbi ju.
2. Pasuria juaj u kalb, dhe rrobat tuaja jua brejti mola.
3. Ari dhe argjendi juaj u ndryshkën, dhe ndryshku i tyre do të jetë dëshmi kundër jush, dhe do të hajë mishrat tuaj si zjarr; mblodhët thesarë për ditët e fundit.
4. Ja tek bërtet paga që ua keni mbajtur punëtorëve që korrën arat tuaja; dhe britmat e korrësve hynë në veshët e Zotit Savaoth.
5. U kënaqët e dëfryet mbi dhe; ushqyet zemrat tuaja si në ditë therjeje.
6. Dënuat dhe vratë të drejtin; dhe ai nuk ju rri kundër.
7. Duroni pra, vëllezër, deri në ardhjen e Zotit. Ja bujku tek pret frutin e paçmueshëm të dheut, e ka durim për atë, deri sa të marrë shiun e hershëm e të vonin.
8. Duroni edhe ju, forconi zemrat tuaja; sepse ardhja e Zotit u afrua.
9. Mos u ankoni kundër njëri-tjetrit, vëllezër, që të mos dënoheni. Ja gjykatësi tek rri përpara dyerve.
10. Merrni shembull, o vëllezër të mi, nga vuajtjet dhe durimi i profetëve, që folën në emrin e Zotit.
11. Ja tek lumturojmë ata që durojnë. Keni dëgjuar për durimin e Jovit, dhe patë fundin prej Zoti, se Zoti është fort përdëllimtar dhe i dhembshur.
12. Edhe para së gjithash, vëllezër të mi, mos u betoni, as për qiellin, as për dhenë, as ndonjë tjetër betim; po le të jetë po-ja juaj, po, dhe jo-ja, jo; që të mos bini në dënim.
13. Vuan ndonjë nga ju? Le të falet. Gëzohet ndonjë? Le të psalë.
14. Është i sëmurë ndonjë ndër ju? Le të thërresë pleqtë e kishës, dhe le të falen për atë, e le ta lyejnë me vaj në emrin e Zotit.
15. Dhe urata që është me besim do ta shpëtojë atë që lëngon, dhe Zoti do ta ngrerë atë; dhe në pastë bërë mëkate, do t’i falen.
16. Rrëfejani fajet njëri-tjetrit, dhe faluni njëri për tjetrin, që të shëroheni. Shumë fuqi ka lutja e të drejtit, kur bëhet me shpirt.
17. Ilia ishte një njeri që pësonte si ne, dhe u fal duke u lutur që të mos bjerë shi; dhe nuk ra shi mbi dhe tre vjet e gjashtë muaj.
18. Edhe përsëri u fal, dhe qielli dha shi, dhe toka dha frutin e saj.
19. Vëllezër, në daltë ndonjë nga ju jashtë udhës së të vërtetës, dhe ta kthejë ndonjë atë,
20. le ta dijë se ai që kthen një mëkatar prej udhës së tij të gabuar, do të shpëtojë një shpirt nga vdekja, dhe do të mbulojë një shumicë mëkatesh.