Hebrenjve 3

1. Prandaj, vëllezër shenjtorë, pjesëtarë të thirrjes qiellore, vështroni apostullin dhe kryepriftin e rrëfimit tonë, Jisu Krishtin;
2. i cili është besnik tek ai që e bëri, sikurse dhe Moisiu qe besnik në gjithë shtëpinë e tij.
3. Sepse ky u lavdërua aq më tepër se Moisiu, sa ka më shumë nder se shtëpia ai që e ndërtoi atë.
4. Sepse çdo shtëpi ndërtohet prej dikujt; po ai që i ndërtoi të gjitha është Perëndia.
5. Edhe Moisiu qe besnik në gjithë shtëpinë e atij si shërbëtor, për dëshmi të atyre gjërave që do të fliteshin,
6. por Krishti, si bir mbi shtëpinë e tij, shtëpia e të cilit jemi ne, nëse mbajmë shtrënguar guximin dhe mburrjen e shpresës deri në fund.
7. Prandaj, siç thotë Shpirti i Shenjtë: “Sot në dëgjofsh zërin e atij,
8. mos i ashpërsoni zemrat tuaja si në pikëllim, në ditën e ngasjes në shkretëtirë,
9. ku etërit tuaj më nganë, më provuan, dhe panë punët e mia dyzet vjet.
10. Prandaj u zemërova me atë brez, dhe thashë: Përherë gënjehen në zemrën e tyre; dhe ata nuk i njohën udhët e mia.
11. Prandaj u betova në zemërimin tim: S’kanë për të hyrë në prehjen time”.
12. Vështroni, vëllezër, që të mos ketë asnjë prej jush zemër të ligë pabesie, që të ngrerë krye kundër Perëndisë së gjallë.
13. Po nxitni njëri-tjetrin përdita, deri sa quhet dita “Sot”; që të mos ashpërsohet ndonjë prej jush me gënjeshtrën e mëkatit.
14. Sepse jemi bërë pjesëtarë të Krishtit, nëse mbajmë shtrënguar deri në fund fillimin e besimit,
15. kur thuhet: “Sot, në dëgjofsh zërin e tij, mos i ashpërsoni zemrat tuaja si në pikëllim”.
16. Sepse disa veta, pasi dëgjuan, e pikëlluan atë, po jo të gjithë ata që dolën prej Egjiptit me anë të Moisiut.
17. Edhe me cilët u zemërua dyzet vjet? Vallë jo me ata që mëkatuan, të cilëve u ranë eshtrat në shkretëtirë?
18. Edhe për cilët u betua se nuk do të hynin në prehjen e atij, veç se për ata që s’bindeshin?
19. Edhe shohim se për pabesinë nuk mundën të hyjnë.