2 Timotheut 4

1. Të urdhëroj pra unë përpara Perëndisë dhe Zotit Jisu Krisht, që ka për të gjykuar të gjallë e të vdekur në dukjen e tij dhe në mbretërinë e tij:
2. Prediko fjalën, qëndro me kohë e pa kohë, qorto, bjer në sy, nxit me çdo lloj zemërgjerësie e me mësim.
3. Sepse ka për të ardhur koha kur nuk do të durojnë mësimin e shëndoshë, por do të mbledhin grumbull pranë vetes së tyre mësues sipas dëshirave të tyre, për të gudulisur veshët.
4. Edhe nga e vërteta do t’i largojnë veshët, dhe do të kthehen të shkojnë pas përrallave.
5. Po ti rri zgjuar në të gjitha, vuaj, bëj punë ungjillori, shërbesën tënde mbaroje.
6. Sepse unë tani jam duke derdhur gjakun, dhe koha e ikjes sime arriti.
7. Luftën e mirë luftova, udhën e mbarova, besimin e ruajta.
8. Pastaj më mbetet kurora e drejtësisë, të cilën do të ma japë në atë ditë Zoti, gjykatësi i drejtë; dhe jo vetëm mua, por dhe gjithë atyre që duan dukjen e tij.
9. Përpiqu të vish shpejt tek unë.
10. Sepse Dhimai më la, sepse deshi këtë botë, dhe shkoi në Thesalonik; Krisku në Galati; Titoja në Dalmaci.
11. Vetëm Llukai është bashkë me mua. Markun merre me vete dhe sille bashkë me ty; sepse më është i vlefshëm në punë.
12. Edhe Tihikun e dërgova në Efes.
13. Kur të vish, sill gunën që lashë në Troadë pranë Karpit, dhe librat, po më fort pergamenat.
14. Aleksandër bakërpunuesi shumë të liga më bëri; Zoti ia shpagoftë sipas punëve të tij.
15. Prej tij edhe ti ruhu, sepse shumë rri kundër fjalëve tona.
16. Në mbrojtjen time të parë asnjë nuk erdhi bashkë me mua, po të gjithë më lanë, mos iu numëroftë atyre për mëkat.
17. Por Zoti më ndenji pranë e më dha fuqi që me anën time të përmbushet predikimi, dhe të dëgjojnë gjithë kombet; dhe shpëtova nga goja e luanit.
18. Edhe Zoti do të më shpëtojë nga çdo punë e keqe, dhe do të më ruajë për mbretërinë e tij qiellore; të cilit i qoftë lavdia në jetë të jetëve. Amin.
19. Përshëndet Priskilën dhe Akilën, dhe shtëpinë e Onisiforit.
20. Erasti mbeti në Korint; dhe Trofimin e lashë të sëmurë në Melitë.
21. Përpiqu të vish përpara dimrit. Të përshëndet Efvuli dhe Pudi dhe Lini dhe Klaudia, dhe gjithë vëllezërit.
22. Zoti Jisu Krisht qoftë bashkë me shpirtin tënd. Hiri qoftë bashkë me ju. Amin.