Filipianëve 2

1. Nëse ka pra ndonjë ngushëllim në Krishtin, ose ndonjë ngushëllim dashurie, ose ndonjë shoqëri të Shpirtit, ose dhembshuri e përdëllime,
2. bëjeni të plotë gëzimin tim, që të jeni në një mendje, duke pasur po atë dashuri, një shpirt të përbashkët e një mendje.
3. Mos bëni asgjë nga smira ose mendjemadhësia, por me përulësi, duke i vlerësuar të tjerët më të lartë se veten.
4. Mos u mendoni secili për të vetat, por secili edhe për punët e të tjerëve.
5. Edhe le të jetë tek ju po ajo mendje që ishte edhe në Jisu Krishtin,
6. i cili, duke qenë në formë Perëndie, nuk e quajti rrëmbim të qenët i barabartë me Perëndinë,
7. por zbrazi veten e tij duke marrë formë shërbëtori, duke u bërë i ngjashëm me njerëzit,
8. dhe duke u gjendur me pamje si njeri, e përuli veten e tij, duke u bërë i bindur deri në vdekje, dhe vdekje kryqi.
9. Prandaj edhe Perëndia e mbilartësoi dhe i fali emër që është mbi çdo emër,
10. që në emrin e Jisuit të përkulet çdo gju i atyre që janë në qiejt e mbi dhe e nën dhe,
11. dhe çdo gjuhë të rrëfejë se Jisu Krishti është Zot, për lavdi të Perëndisë Atë.
12. Prandaj, të dashurit e mi, siç u bindët përherë, jo si vetëm atëherë kur jam ndër ju, por shumë më tepër tani në mungesën time, punoni për shpëtimin e vetes suaj me frikë e me dridhje,
13. sepse Perëndia është ai që vepron tek ju edhe dashurinë edhe veprimin, sipas pëlqimit të tij.
14. Bëni gjithçka pa ankesa e pa kundërshtime,
15. që të jeni faqebardhë e të përsosur, bij Perëndie pa të metë, në mes të një brezi dredharak e të shtrembër, në mes të të cilëve ndriçoni si yje në botë,
16. duke mbajtur fjalën e jetës, për mburrjen time në ditën e Krishtit, se nuk brodha më kot, as u nuk u mundova më kot.
17. Po edhe në qoftë se bëhem spërkatje mbi therorin dhe shërbesën e besimit tuaj, gëzohem e ngazëllohem bashkë me të gjithë ju;
18. po ashtu edhe ju gëzohuni e ngazëllohuni bashkë me mua.
19. Edhe shpresoj në Zotin Jisu, të dërgoj së shpejti tek ju Timotheun, që të më ngushëllohet shpirti edhe mua, kur të marr vesh punët tuaja.
20. Sepse s’kam asnjë tjetër që të ketë shpirtin të njëjtë me timin, i cili të kujdeset për punët tuaja me zemër të çiltër.
21. Sepse të gjithë kërkojnë të plotësojnë interesat e tyre, jo ato të Jisu Krishtit.
22. Edhe e njihni provën e tij, se, si bir me të atin, punoi bashkë me mua për ungjillin.
23. Këtë pra, shpresoj të dërgoj menjëherë, sa të marr vesh si do të shkojnë punët e mia.
24. Edhe kam besim në Zotin se edhe vetë do të vij së shpejti.
25. Por mendova se është e nevojshme t’ju dërgoj Epafroditin, vëllanë dhe bashkëpunëtorin e bashkëluftëtarin tim, që ma dërguat ju dhe më shërbeu në nevojë,
26. sepse kishte shumë mall për ju të gjithë, dhe i vinte keq sepse dëgjuat se qe sëmurë.
27. Edhe vërtet u sëmur gati për vdekje; po Perëndia e përdëlleu, dhe jo vetëm atë, por edhe mua, që të mos kem hidhërim mbi hidhërim.
28. Prandaj jua dërgova atë juve më me nxitim, që të gëzoheni kur ta shihni përsëri, dhe unë të kem më pak hidhërim.
29. Priteni atë në Zotin me çdo gëzim dhe të keni nderim për njerëz të tillë,
30. sepse për punën e Krishtit u afrua deri në vdekje, duke rrezikuar jetën e tij, që të plotësojë mungesën e shërbimit tuaj për mua