2 Timotheut 1

1. Pavli, apostull i Jisu Krishtit me anë të vullnetit të Perëndisë, sipas premtimit të jetës që është në Jisu Krishtin,
2. Timotheut, birit të dashur, i qoftë hir, përdëllim, paqe prej Perëndisë, Atit, dhe prej Jisu Krishtit, Zotit tonë.
3. Falënderoj Perëndinë, të cilin e lus që nga prindërit e mi me ndërgjegje të kthjellët, se pa pushim të kujtoj në faljet e mia natë e ditë,
4. edhe se, kur kujtoj lotët e tu, kam mall të të shoh, që të mbushem me gëzim;
5. sepse sjell ndër mend besimin tënd pa hipokrizi që është tek ti, i cili qëndroi më parë te gjyshja jote Loida, dhe tek nëna jote Evnika; dhe më është mbushur mendja se ka qëndruar edhe tek ti.
6. Për këtë shkak të kujtoj ty të ngjallësh përsëri dhuratën e Perëndisë, e cila është tek ti me anë të vënies së duarve të mia mbi ty.
7. Sepse Perëndia s’na ka dhënë shpirt frike, po fuqie dhe dashurie e urtësie.
8. Mos ki turp pra për dëshminë e Zotit tonë, dhe për mua të burgosurin e tij; por vuaj bashkë me mua për ungjillin sipas fuqisë së Perëndisë;
9. i cili na shpëtoi dhe na thirri me thirrje të shenjtë, jo sipas punëve tona, po sipas vendimit të tij dhe sipas hirit që na u dha në Jisu Krishtin që përpara kohëve të përjetshme,
10. edhe që u shfaq tani me anë të dukjes së shpëtimtarit tonë Jisu Krisht, i cili prishi vdekjen, dhe nxori në dritë jetën dhe pavdekësinë me anë të ungjillit.
11. Për këtë u vura unë predikues dhe apostull e mësues i kombeve;
12. gjë për të cilën edhe i pësoi këto; por nuk kam turp; sepse e di kujt i kam besuar, dhe më është mbushur mendja se ai mund të ruajë atë që më besoi deri në atë ditë.
13. Ruaj formën e fjalëve të shëndosha që dëgjove prej meje, me besim e me dashuri që është në Jisu Krishtin.
14. Të mirën që t’u besua ruaje me anë të Shpirtit të Shenjtë që rri ndër ne.
15. Ti e di këtë, se të gjithë ata që janë në Azi më kthyen krahët, prej të cilëve është Figjeli dhe Hermogjeni.
16. Zoti dhëntë përdëllim në shtëpinë e Onisiforit, sepse shumë herë më dha zemër dhe s’pati turp prej hekurave të mia,
17. po kur erdhi në Romë, më kërkoi me shumë nxitim dhe më gjeti.
18. Zoti i dhëntë atij të gjejë përdëllim nga Zoti në atë ditë. Edhe sa më shërbeu në Efes, ti i di mirë.