1 Thesalonikasve 1

1. Pavli dhe Siluani dhe Timotheu, kishës së Thesalonikasve që është në Perëndinë, Atin, dhe në Zotin Jisu Krisht; hir mbi ju dhe paqe prej Perëndisë, Atit tonë, dhe prej Zotit Jisu Krisht.
2. Falënderoj Perëndinë përherë për të gjithë ju, dhe ju kujtojmë në faljet tona,
3. duke kujtuar pa pushim punën e besimit tuaj, dhe mundimin e dashurisë, dhe durimin e shpresës në Zotin tonë Jisu Krisht, përpara Perëndisë edhe Atit tonë.
4. Sepse e dimë, vëllezër të dashur prej Perëndisë, zgjedhjen tuaj.
5. Sepse ungjilli ynë nuk u bë tek ju me fjalë, po edhe me fuqi, edhe me Shpirt të Shenjtë, edhe me shumë bindje, siç e dini ç’bëmë ndërmjet jush për ju.
6. Edhe ju bëtë siç bëmë ne dhe Zoti, sepse e pritët fjalën në shtrëngime të shumta, po me gëzim të Shpirtit të Shenjtë;
7. aq sa u bëtë shembull për të gjithë besimtarët në Maqedoni e në Akai.
8. Sepse prej jush oshëtiu fjala e Zotit, jo vetëm në Maqedoni e në Akai, po edhe në çdo vend arriti zëri i besimit tuaj në Perëndinë, kaq sa ne s’kemi nevojë të flasim gjë;
9. sepse vetë ata tregojnë për ne, çfarë hyrjeje patëm ndër ju, dhe si u kthyet nga idhujt tek Perëndia, që t’i shërbeni Perëndisë së gjallë e të vërtetë,
10. dhe të prisni Birin e tij nga qiejt, të cilin e ngjalli prej së vdekurish, Jisuin, që na shpëton nga zemërimi që vjen.